Hnauëne Laka Itre Atr a Qaja Ka Hape Ka Pë Ihnimine Akötresie?
KA QA NGÖNE ICETRÖN: HAPEU, KA PË IHNIMINE AKÖTRESIE?
Hnauëne Laka Itre Atr a Qaja Ka Hape, Ka Pë Ihnimine Akötresie?
HAPEU, xou nyipunieti kö la kola qeje Akötresieti tune caha? Ame itre xan, tre angatr a xou, ngo ame kowe la ka ala nyim, tre thatre kö angatr; nge hetre itre xane pala kö ka mekune ka hape, ka pë ihnimin Akötresie. Pine nemene lai?
Ame la itre xa hna lepe hnei hulö, tre angatr a thele la kepine matre Akötresieti a nue troa traqa koi angatre la itre ewekë cili. Hapeu, Akötresieti kö a semesinene la itre atr? Hnime kö Nyidrëti la itre atr?
Ame itre xan, angatr a mekune tune lai, ke hnei angatre hna e la itre edromë e hnine la Tusi Hmitrötr, ka tune la iwë atraqatre ekö ngöne lo hneijine Noa. Angatr a ajane troa atre ka hape, maine ka ihnimi Akötresie, hnauëne pena laka Nyidrëti a humuthe la itre atr ngöne lo hneijine i Noa? Hapeu, ka pë ihnimine Nyidrë?
Maine jë, hnei nyipunieti fe hna hane hnyinge tune lai. Maine pena, hna hnyinge tune lai koi nyipunie hnei itre xan, ngo thatreine kö nyipunieti troa sa. Hane pe cahu tane ka troa xatua nyipunieti troa sa caha itre hnying.
METHI SË LA ATR KA PË IHNIMIN
Eje hi lai laka, methi së la atr ka pë ihnimin, pine laka hetrenyi the së la atreine troa wange la loi me ngazo. Nge celë hi lai ka aisapengönë së memine la öni, ke hna xupi së hnei Akötresie “hnaiji nyidë.” (Genese 1:27) Kola hapeue lai? Kola hape, hnei Nyidrëti hna aijijë së troa xome la thiina i Nyidrë, me itre aqane nyi trepene i Nyidrë ka hmitrötr, ka aijijë së troa atre la loi me ngazo. Haawe, maine hna xupi së hnaiji Nyidrë, nge methi së la atr ka pë ihnimin, tre hapeu, tha kolo kö lai a hape, ka methinëne fe Akötresie la thiina cili?
Celë hi lai hna inine hnene la Tusi Hmitrötr, pine laka kola qaja hnyawane koi së hnei Akötresie e hnine la Wesi Ula i Nyidrë ka hape: “Ite jëng’ a draië qa hune la ite jë i nyipunie ; nge ite mekuneng’ a draië qa hune la ite mekune i nyipunie.” (Isaia 55:9) Maine öni së jë hi ka hape, ka pë ihnimin Akötresie, tre hapeu, tha easë jë kö lai a ameköti Nyidrë, me qaja ka hape, ka draië kö la itre jë së hui Nyidrë? Qëmekene la troa canga qeje Akötresie, ma loi e tro pe sa pane thele me atre hnyawa la itre nyine anyipicine göi Nyidrë. Hne së hna lapaa majemine canga hnyinge ka hape, ‘Hapeu ka pë ihnimi lae Akötresie?’ Ngo loi pe tro sa hnyinge ka hape, hnauëne la easa mekune ka hape, ame la itre xa aqane ujë i Nyidrë tre tune lo ka pë ihnimin? Tro sa pane thele troa atre la nyipi aliene la kola hape, “ka pë ihnim.”
Ame la easa qeje ketre ka hape, ka pë ihnimin, tre hnene laka hne së hna thele troa qeje pengöne la itre aliene hni angeic. Nge ame la pengöne la atr ka ka pë ihnim, tre atr ka madrine troa öhnyi itre xan e akötr, maine pena ka tha drenge kö la akötre i angatr. Maine tro la ketre keme a wameucëne la kuku göne hi matre troa akötrëne la hni nyën, tre tro së ka hape, keme ka pë ihnimin. Ngo maine tro angeic a wameucëne la kuku matre troa inine me thupë nyën, öni së jë hi ka hape, keme ka loi. Ame itre xa ijin, tre saqe hi la itre atr troa iqeje gele, ke thatre kö angatr la kepine matre ujë jë tune lai la ketre atr.
Tro sa pane ce ithanatane la lue xa kepine matre kola mekune hnene la itre atr ka hape, ka pë ihnimin Akötresie; kola qaja la itre hulö hne së hna melëne enehila me itre iameköti hne së hna qaja e hnine la Tusi Hmitrötr. Hapeu, hetre itre ewekë kö ka anyipicine ka hape, ka pë ihnimin Akötresie?
[Iatr ne la götran 3]
Hna xupi së cememine la atreine troa utipin, me methinëne la atr ka pë ihnimin