ANGE HANE JU LAPAUNE TUI ANGATR

“Hnei Noa Hna Ce Trotro Me Akötesie”

PANE tupathe ju së troa mekune la pengöne la mele i Noa ekö. Noa a drenge la kola nango catrehnine la ju i angeic, ene pe pane lapatithe ju hi angeic la ketre isinöe hna sa, me goeëne la aka hna nyiqaane cane hë. Kola punepune la koltra hna than ngöne la aka, nge kola drenge hnei Noa la mejene huliwa. Kola isa enije hnene la itre nekö i angeic matre cile jë la aka. Kolo fe a hane ixatua hnene la ifënekö i Noa memine la itre tresi angeic, nge traqa koi itre macatre ne angatr a catre huliwa. Tru hë la huliwa hna kuca, ngo tru pala kö la itre nyine troa kuca!

Kola mekune hnene la nöjei atr, ka hape, ma ka nango menu lae Noa me hnepe lapa i angeic. Kolo pala hi a mama trootro la aka, nge kolo jë petre hi ka hape, tha jele nyipicine fe kö angatre la iwë ka troa traqa. Ame koi angatr, kösë hi lo kolo lai a qenahmo angatr. Angatr a mekune ka hape ka hmo Noa nge tru pe hi la hnei angeice hna aluuzine la mele i angeic, me mele ne la hnepe lapa i angeic ngöne lai huliwa cili. Ngo tha celë kö la aqane goeë Noa lai hnei Iehova Akötresie.

Kola qaja hnene la Wesi Ula i Akötresie ka hape: “Hnei Noa hna ce trotro me Akötesie.” (Genese 6:9) Kola hapeue lai? Tha kolo kö lai a qaja ka hape, hnei Akötresieti hna uti a tro celë fene me ce tro me Noa. Nge, tha kolo pena kö a qaja ka hape, hnei Noa hna tro hnengödrai eë matre ce tro me Akötresieti e koho. Ngo hnene laka, ka hnimi Akötresieti Noa me drenge thenge Nyidrëti hnyawa, matre kösë lo Noa a ce tro me Akötresie, tune la aqane trongene la lue tremesineen. Celë hi matre kolo pë hë a cinyanyi jë e hnine la Tusi Hmitrötr ka hape: “Hnei angeice hna ahnëjinëne la fene hnengödrai hnene [lapaune i angeic].” (Heberu 11:7) Tro sa trotrohnine tune kaa la hnaithanata celë? Nemene la aqane tro sa xomi ini qa ngöne la tulu i Noa?

NGAZO LA FEN, NGO ATR KA MEKÖTI ANGEIC

Ame ngöne lo hneijine i Noa, canga tro ngazo jë hi la itre atrene la fen. Ngazo hë ekö lo itre atr ngöne lo hneijine i Enoka qaqaa i Noa, nge ketre trahmanyi ka meköti nyidrë. Ase hë Enoka qatr ekö thingehnaeane ka hape, tro ha amekötine la itre atr ka ngazo ne la fen. Ame hë ngöne la hneijine i Noa ngazo catre hë la itre thiina ne la itre atr. Ame koi Iehova, ngazo hë la fene hnengödrai, ke tiqa ha la fene hnene la iangazo. (Genese 5:22; 6:11; Iuda 14, 15) Ngo pine nemene matre ngazo catre jë hi la thiina ne la itre atr?

Hnene la itre angela i Akötresieti hna kuca la ewekë ka ngazo. Hna pane icilekeu me Akötresieti hnene la ketre, lo angeic a jelengazo Nyidrë me upi Adamu me Eva troa kuca la ewekë ka ngazo; ene pe ati ëje i angeice ju pë hë ka hape Satana. Ame hë ngöne lo hneijine i Noa, kolo fe a hane icilekeu me Akötresieti hnene la itre xa angela. Hnei angatre hna tro trije la göhne i angatr e hnengödrai, me uti kowe la fene hnengödrai, me xome la pengö i atr, matre troa faipoipo memine la itre föe ka mingöming. Itre angela ka pi tru cili la itre ka amenune la itre atr.—Genese 3:1-5; 6:1, 2; Iuda 6, 7.

Ketre, ame hë la kola hnaho hnene la itre angela memine la itre föe, tre angatr a hnahone la itre nekönatr ka tru matrane me ka tru trenge catr. Kola qeje angatre hnei Tusi Hmitrötr ka hape, itre qea hmae, kola hape, itre ka akeinyi itre xan. Nge hnene la itre matrane atr cili ka isi, matre kola tiqa la fene hnengödrai hnene la iangazo, me nöjei pengöne thiina ka sis. Hna e hi la etrune la itre atr ka mekune ka hape, ame koi Akötresie, “atraqate la ngazo i ate e celë fen, nge ngazo o drai pala hi la nöjei mekun’ asë e kuhu hni nyën.” Qa ngöne lai, Iehova pë hë a amekötine jë me qaja ka hape, thupene la 120 lao macatre, tro hë Nyidrëti a apatrene la itre atr ka ngazo qa celë fen.—Genese 6:3-5.

 Pane mekune jë nyipunie, ka hape, nyipunieti a hiane la ha nekö i nyipunie ngöne la fene ka tune lai! Celë hi lai hna kuca hnei Noa. Ka lolo la thiina ne la föe hnei angeice hna faipoipo memin. Ame hë la kola 500 lao macatre i Noa, kola hnaho nekö i angeice hnene la fö i angeic; a köni nekö trahmany: Sema, Hama, me Iafeta. a Ketre huliwa ka tru ekö koi nyidro lue trefëne troa thupëne lai köni nekö i nyidro qa ngöne la itre thiina ka ngazo ne la itre atr ka ce mele me angatr ekö. Maine jë pi tro fe hi lo lai köni nekönatr trahmanyi a goeëne la “itete cate ekö,” itre “ate ka hlemu,” ene lo itre ka qea hmae. Jole ekö koi Noa me ifënekö i angeice troa sawa la itre atr troa qaja aloine la itre ka qea hmae kowe la ha nekö i nyidro, ngo hnei nyidroti hna inine koi nyudreni la itre trenge nyipici qaathei Iehova, Akötresieti ka methinëne la iangazo. Nyidroti ekö a isiine troa xatuane la itre nekö i nyidro troa atre ka hape, kola akötrë Iehova hnene la iangazo me ngazo ka haöthe la fen.—Genese 6:6.

Tro hi la itre keme me thine ne la hnedrai së a trotrohni Noa me ifënekö i angeic, ke easë mina fe a mele enehila ngöne la fene hna haöthe hnene la iangazo me itre thiina ka ngazo. Celë hi lai hne së hna öhne ngöne la itre nyine iamadrinë hna kuca kowe la itre nekönatr. Itre keme me thine ka inamacan a thele troa xatuane la itre nekönatr matre tha tro kö nyudreni a xome la itre thiina cili. Qa ngöne lai angatr a ini nyudreni la pengö i Iehova, Akötresieti trene tingeting, nge ka troa apatrene la iangazo. (Salamo 11:5; 37:10, 11) Ijije hi tro la itre keme me thin a inine la itre nekönatr troa loi thiina ngöne la fene celë ka ngazo, ke celë hi lai hna traqa kow hnei Noa me föe i angeic ekö. Ame hë la kola tru la köni nekö i nyidro, tre itre thupëtresiji ka loi thiina angatr, nge hnei angatre hna faipoipo memine la itre föe ka hane wang atrunyi Akötresie ngöne la mele i nyudren.

“CANEJU THATRAQAI ’Ö LA AKA”

Ame ju hi la ketre ijin, saze hnyawa pi hi la mele i Noa. Nge pine laka hnimi angeice catre hnei Iehova, haawe Nyidrëti pë hë a thuemacanyi angeic jë ka hape, ase hë Nyidrëti mekune troa apatrene la fene ka ngazo. Akötresieti pë hë a upi Noa jë, me hape: “Caneju thatraqai ’ö la aka, gofa la ëjene la sinöe.”—Genese 6:14.

Tha he kö lo aka, tune la aqane mekuna ne la itre xan. Pëkö meken, nge pëkö ipun, ketre pëkö ujin nge pëkö ka thupe gejë, nge pë pena kö götrane gaa raonene la aka. Kösë lo ikes ka tru pe. Hnei Iehova hna qaja koi Noa la itre tulu ne la aka, memine la aqane troa can, me upi angeice troa pele koltran e kuhu trön me e koho hnine la aka. Nge hnei Nyidrëti fe hna qaja koi Noa la kepin; öni Nyidrë: “Tro ni a akaca trane la fene hnengödrai hnei iwë . . . Tro ha meci la nöjei ewekë asëjëihë e celë fen.” Ngo hnei Iehova mina fe hna qaja koi Noa ka hape: “Tro eö a lö hnine la aka, eö, me ite nekö i ’ö, me ifënekö i ’ö, me ite föe ne la ite nekö i ’ö ce me eö.” Qa i Noa mina fe troa xome la itre öni ka isapengön. Ame hë la kola troa traqa la Iwë atraqatr, tro hmekuje hi a mele la itre ka lö kowe la aka!—Genese 6:17-20.

Tha huliwa ka co kö la hna ahnithe koi Noa. Atraqatre la aka hna troa cane hnei angeic: 133 met la eqean, 22 met la eisaisan, nge 13 met la edraiën. Pëkö he sinöe enehila hna hane cane tune lai. Hapeu hnei Noa kö hna kötrene la hnëqa celë, maine qeje ejolen, maine sixetë pena la aqane huliwa? Kola sa hnene la Tusi Hmitrötr: “Hnei Noa hna kuca asë tune lo hnei Akötesieti hna ahnithe koi angeic ; tune hi lai hnei angeice hna kuca.”—Genese 6:22.

 Traqa koi 40 maine 50 lao macatre ne huliwa Noa. Itre macatre ne troa sa me hule la itre sinöe, me sa agö, me tratraun, me iothekeun. Ka köni drikene la aka, me nyimu hnahag, nge ca qëhnelö. Hna nango fe kö e koho hun xötreith, nge hna kuca matre nango tutupe la hen, matre tha tro kö a lö timi la aka.—Genese 6:14-16.

Kola tro la itre macatre, nge Noa a madrin, ke kolo ha mama trootro la aka hnei angeice me hnepe lapa i angeice hna can! Hetrenyi la ketre jole hnei angatre hna troa qëmeke kow. Kola qaja hnei Tusi Hmitrötr ka hape Noa la “ate cainöjëne la thina ka meköt.” (2 Peteru 2:5) Haawe, hnëqa i Noa mina fe troa qaja kowe la itre atrene la fene ka ngazo nge ka tha meku Akötresieti kö ka hape, easenyi hë troa apatrenyi angatr. Nemene ju hë la hnei angatre hna kuca? Öni Iesu Keriso pë hë e thupene göi angatre ka hape ‘tha nyipi ewekëne kö angatr’ la maca i Noa. Hna xome la mele i angatr hnene la nöjei pengöne jol, ene la troa xeni me ij me faipoipo. (Mataio 24:37-39) Celë hi matre, drei jë kö la kola hnyima sai Noa ekö me hnepe lapa i angeic; me ewekë akökötrenyi koi angatr, me thele troa lepi angatre pena.

Ngo tha hnei Noa kö me hnepe lapa i angeice hna cil. Ngacama pëkö ka ajolë Noa ekö me hnepe lapa i angeic troa eatrëne la itre pane hnëqa i angatr, ngo kola jele hmo angatr hnene la itre atr. Eloine pe, hnei Noa kö me hnepe lapa i angeice hna eatrëne hnyawa la huliwa i angatr. Ketre tulu ka lolo kowe la itre hnepe lapa ka hmi Keresiano, la tulu i Noa me hnepe lapa i angeic. Easë mina fe a melëne la “ite drai hnapin” ne la fene celë hna qaja hnei Tusi Hmitrötr. (2 Timoteo 3:1) Hnei Iesu hna qaja ka hape, troa ceitune la hneijine së memine lo hneijine kola cane la aka hnei Noa. Maine tro la itre atrene la fen a drei simine la maca ne la Baselaia i Akötresie, maine hnyima fë, maine icilekeu memin pena, loi e tro la itre Keresiano a mekune la tulu i Noa. Casi hi la hnei angeice hna melën, memine la hna melëne hnene la itre Keresiano enehila.

“LÖJË HNINE LA AKA”

Kolo pala hi a tro la itre macatre, nge ame ju hi la ketre ijin, cile hë la aka. Ame hë la kola troa 600 lao macatre i Noa, tre kola meci la itre xa sinee i angeic. Hna pane meci hnei Lameka, keme i angeic. b Thupene jë hi la faifi lao macatre, kolo pena ha meci hnei Methusela, qaqaa i angeic, nge 969 lao macatre i nyidrë; nyidrëti hi lo lai ka mel aqeany hune la nöjei atr asë. (Genese 5:27) Methusela hi me Lameka lo lue ka hane ce mele me Adamu ekö.

Ame pala hi ngöne lai macatre cili, hnei Noa hna kapa la ketre maca ka hnyipixe qaathei Iehova Akötresie; öni Nyidrë: “Löjë hnine la aka, eö, memine la lapa i ’ö asë.” Nge hnei Nyidrëti fe hna upi Noa troa alöne la itre öni ka isapengön; isa ala sevene la itre öni ka pui loi thatraqane la itre huuj, nge isa ala lue pë hë la munën.—Genese 7:1-3.

Ketre pengöne kö la ewekë hna öhne hnei Noa. Kola isa xulu la itre öni qa cailo: tro jë kö la itre ka tro, nge sesë jë kö la itre ka sesë, itre xan a wewë, nge itre xan a tro hmiitr maine tro eziezi trootro. Kola isa traqa la itre öni ka isapengön, itre öni ka mem, me itre öni ka ses. Tha mano kö Noa engëne la itre öni, me wesitrëne itre ej, me nango kuca hnyawane itre xan, matre alö nyudreni asë ngöne la itre hnahage ne la aka. Kola qaja e hnine la Tusi Hmitrötr ka hape kola “lö koi Noa hnine la aka” hnene la itre öni.—Genese 7:9.

Ame lo itre ka luelu, tre angatr a hnyinge ka hape: ‘A hna lö tune kaa la itre öni a tro koho hnine aka? Nge hnei nyudreni hna atreine ce mele tune kaa memine la itre xa öni ngöne la itre hnahage ne la aka?’ Ngo hapeue la mekuna i nyipunie, jole kö kowe la Atre Xupe la nöjei pengöne öni troa amemëne itre ej, matre alöne itre eje hnine la aka? Nga Iehova hi lo ka thawa luëne lo Hnagejë Ka Palulu me acilëne lo jö ekö. Hapeu, thatreine pë hë Nyidrëti kuca matre tro loi la huliwa  hnei Nyidrëti hna ahnithe koi Noa? Ohea, tha jole kö koi Nyidrë!

Maine ju tro Akötresieti a thele la itre xa jëne troa amelene la itre öni. Ngo hnei Nyidrëti hna ahnithe la hnëqa celë kowe la atr, matre amekunë angeic ka hape, ka tru angeice koi Nyidrë, ke hnei Nyidrëti hna xupi angeic cememine la atreine troa musinëne la nöjei pengöne hna xup e celë hune ihnadro. (Genese 1:28) Celë hi kepine matre itre xa keme me thine enehila a e koi ha nekönatr la itre xötre ne la Tusi Hmitrötr ka qeje Noa, matre ini nyudreni ka hape, ka tru koi Iehova la itre atr me itre öni hnei Nyidrëti hna sipu xup.

Ame hë la kola easenyi la ijine troa traqa la Iwë Atraqatr, Iehova a thuemacanyi Noa ka hape, caa wiike pe hi matre traqa pi la Iwë. Ma drei jë la kola enije hnei Noa me hnepe lapa i angeice ngöne la ijine cili. Ketre ijine angatr a pane alöne la itre öni hnine la aka, me xeene la a i nyudreni ngöne la itre göhnen, me xome fe la trengetrenge i angatr, lapa ka cahae. Ma föe i Noa jë memine la itre ifëtresi nyidro la ka nyihnyawane la ketre götrane ne la aka, matre nyi göhne i angatr.

Ngo tune kaa lo itre xa atr? Pë ju pë hë ka tha öhne la kola tro xötrë la itre öni me lö hnine la aka. Ngacama öhne hi angatre la itre hatrene ka amamane ka hape, ce Iehova me Noa, nge Nyidrëti a amanathithine la itre huliwa i angeic, ngo ‘tha nyipi ewekëne kö angatr’ la itre hatrene cili. Tha tro kö sa sesekötre la kola tha semesinene hnei angatre la ewekë celë. Ame la itre atr enehila, tre tha nyipi ewekëne kö angatre la itre hatrene ka amamane ka hape, easa melëne la itre drai hnapine ne la fene celë. Angatr a trongëne lo hnei Peteru aposetolo hna qaja ka hape, troa xulu la nöjei ka ihnyima sai, a kola hnyima fë la itre ithuemacanyi qaathei Akötresie. (2 Peteru 3:3-6) Tro ha ihnyima sai hnene la itre atr cili, tune lo aqane hnyima sai Noa ekö me hnepe lapa i angeice hnene lo itre atr.

Ngo eue hë la angatr a hmaca? Kola sa hnei Tusi Hmitrötr ka hape ame hë la Noa me hnepe lapa i angeic, me itre öni asë hë e koho hnine la aka, tre “hnei Iehova hna thinge qëhnelö angeice pe.” Ma drei pe la angatr a igoenyi ngöne lo Iehova a thinge ju la qëhnelö. Maine pena, pë ju hi meje i angatre lo kola nyiqaane mani! Mani ju pë hë lai, a tha mano kö, uti hë la tha öhne la fen hnene la iwë atraqatr, tune lo hna thingehnaeane hnei Iehova.—Genese 7:16-21.

Hapeu madrine kö Iehova la kola meci hnene la itre atr ka ngazo? Ohea! (Ezekiela 33:11) Nyidrëti pe lo ka nue ijine koi angatr, me trengeneune laka ma tro angatr a amekötine la itre jë i angatr. Ngo hapeu, thatreine pala ha angatre troa saze? Pane mekune ju hi së la pengö i Noa. Ame la Noa a ce trootro me Iehova me drenge thenge la itre hna amekötin asë hnei Nyidrë, tre sipu hatrene hi lai ka hape, ijije tro la itre atr a isiine troa mel. Nge hnene la lapaune i Noa matre hnëjine hë la itre atrene la hneijine i angeic; ke aqane qajaqaja hi Noa lai ka hape, ngazo la aliene hni ne la itre atr cili. Celë hi lai ka amele Noa me hnepe lapa i angeic. Maine tro nyipunieti a lapaune tui Noa, tro hë nyipunieti a mel, nge tro fe nyipunieti a amelene la itre xa atr. Tro fe nyipunieti a ce trootro me Iehova Akötresie, tui Noa ekö. Nge tro hë nyipunieti a ce sinee me Nyidrë uti hë epine palua!

[Ithueamacany]

[Iatr ne la götran 12]

[Iatr ne la götran 13]

Hnei Noa ekö me föe i angeice hna isiine troa thupë ha nekönatr qa ngöne la itre thiina ka ngazo

[Iatr ne la götran 14, 15]

Mama hi koi itre atr ka hape ce Akötresieti me Noa, ngo hnei angatr hna hnyima sai angeic, me drei simine la maca hna tro fë