Hapeu La Itre Hulö, Hatrene Jë Kö Laka Ka Pë Ihnimine Akötresie?

ÖNI ITRE XAN: “Pine laka Akötresieti la ka musinëne la fen, Nyidrëti la ka axulune la itre hulö; haawe, ijije troa qaja ka hape, ka pë ihnimin Nyidrë.”

ÖNI TUSI HMITRÖTR: “Fene hnengödrai asëjëihë a meköle thene la ate ka ngazo.” (1 Ioane 5:19) Drei la “ate ka ngazo”? Kola sa hnei Tusi Hmitrötr ka hape, Satana. (Mataio 13:19; Mareko 4:15) Hapeu nyipici kö lai? Maine Satana la ka musinëne la fen, tro angeic a ukune la itre atr troa tha imeku, me meciun, me xome la aqane waiewekë i angeic. Hapeu tha celë jë kö la itre itine ka mama thene la itre atr enehila, nge ka uku angatr troa huliwane menune la ihnadro? Kola hmekë së hnene la itre ka inamacane ka hape, hetre ethanyine la troa huliwane menune la ihnadro; ke celë hi lai ka troa axulune la itre hulö, maine ka troa kuca matre ngazo catr la aqane troa lepi së hnene itre ej.

Ngo pine nemene matre Akötresieti a nue Satana troa musinëne la fene hnengödrai? Pine laka, hnene lo lue pane keme me thine së hna icilekeu memine la mus i Akötresieti ekö. Ala nyimu catre fe la itre atr ka xome la thiina i nyidro. Pine laka hnei angatre hna iëne troa thipetrije la musi cile i Akötresie, haawe, kolo pena ha musi koi angatre hnene la ithupëjia me Nyidrë, ene Satana. Celë hi kepine matre hnei Iesu hna ati ëje i Satana ka hape, “tane celë fene hnengödrai.” (Ioane 14:30) Ngo hapeu, tro kö Satana a musi epine palua? Ohea!

Ka akötre koi Iehova a troa goeëne la aqane axösisine Satana la itre atr. Nge kola treije la hni Iehova ngöne la Nyidrëti a goeëne la itre atr a akötr. Ame la kola melëne hnene la angetre Isaraela ekö la itre ijine akötr, öni Tusi Hmitrötr göi Akötresieti ka hape: “Tha ithupëjia nyidë me angate ngöne la ite aköte i angat.” (Isaia 63:9) Nge pine laka, Akötresieti a utipine la itre atr, easenyi catre hë tro Nyidrëti a apatrene la musi ne la atre pë ihnim, ene Satana. Hnei Nyidrëti hna ië Iesu Keriso Hupuna i Nyidrë, nge joxu ka meköti me loi thiina, matre troa musi uti hë epine palua.

THANGANE KOI SË: Thatreine kö la mus i Satana troa thupëne la itre atr qa ngöne la itre hulö, ngo atreine hi Iesu. Hnei Iesu hna amelene la itretre drei nyidrëti ngöne la ketre ijine wene. Easa e e hnine la Tusi Hmitrötr: “Hnei nyidëti hna . . . shawa la eny, me ulatine kowe la gejë, ka hape, The ilu kö, humuju ; ame hna pateju la eny, me haodrai atraqate pi.” Önine jë hi lo itretre dreng e hnyinge ka hape: “Ka ue la ate celë laka dei nyidëti hnene la enyi me gejë ?” (Mareko 4:37-41) Hatrene hi lai koi së ka hape, tro Iesu a thupën asë elany la itre atr ka drengethenge nyidrë.—Daniela 7:13, 14.

[Ithueamacany]

[Iatr ne la götran 4]

Hnei Akötresieti hna hamëne kowe la Hupuna i Nyidrë la mene nyine troa apatrene la itre hulö.