Kola sa Hnei Tusi Hmitrötr

Pine nemene matre thatreine jë kö troa tingetinge la fen?

Lue kepine ka tru hna qaja hnei Tusi Hmitrotr. Ame la hnapan, ngacama nyipi lolo la itre ewekë hna kuca hnene la itre atr, ngo tha hna xupi angatre kö troa isa amekötine la itre hna feke ca hnei angatr. Ame la hnaaluen, tre, tha eatre kö la itre hna mekune hnene la itre atr, pine laka, “fene hnengödrai asëjëihë a meköle thene la ate ka ngazo,” Satana lo Diabolo. Celë hi matre, gufa kö la trengecatre hna kuca hnene la itre atr, matre troa tingetinge la fene hnengödrai.—E jë la Ieremia 10:23; 1 Ioane 5:19.

Thatreine jë pi kö troa hetrenyi la tingeting e celë fen, pine laka itre atr a meku angatre hi me thele troa pi mama. Ngo tro kö elanyi a hetrenyi la tingeting, e troa cile la ketre musi ka atreine troa inine la itre atr e cailo fen troa ajane la meköt me hane imeku.—E jë la Isaia 32:17; 48:18, 22.

Drei la ka troa acile la tingeting e celë fen?

Hnene la Akötresie Kapucatinasë hna thingehnaeane laka, tro asë hi la nöjei atr elanyi a lapa fene la musi ka cas. Ej a troa nyihnane la musi ne la itre atr. (Daniela 2:44) Tro Iesu Hupuna i Akötresieti a Tixene la Tingeting. Tro nyidrëti a apatrene la ngazo qa celë fen, me inine la itre atr la aqane troa mele tingeting.—E jë la Isaia 9:6, 7; 11:4, 9.

Ame hë enehila, itre milio la itre atr e cailo fen ka drei Keriso me xome la Wesi Ula i Akötresie, matre troa inine la itre atr la aqane troa ce mele tingeting. Nge calemi hë la ijine troa tingeting asë la fen.—E jë la Isaia 2:3, 4; 54:13.

Maine nyipunieti a ajane la itre xa ithuemacany, goeëne ju lo mekene 3 ne la itusi celë Nemene La Nyipi Ini Hna Hamën Hnei Tusi Hmitrötr?, hna kuca hnene la Itretre Anyipici Iehova

[Iatr ne la götran 10]

Tro kö a hetrenyi la tingeting e cailo fen, e tro la ketre musi a saze la hni ne la itre atr

[Hna xome ngön la foto]

Fatmir Boshnjaku