JËNE MADRINE KOWE LA HNEPE LAPA

Itre Ka Nyi Hnaaluene Faipoipo

HERMAN: * “Hna tith la pane föenge hnei kaaser, ene pe meci pi angeic thupene la 34 lao macatre ne faipoipo nyiho. Ame hë la eni hmaca a faipoipo me Linda, tre öni angeice ka hape, tru pala ha la hnenge hna lapaa qaja la itre ewekë ka aisapengönë angeic memine lo pane föeng. Nge ame la elëhni catre jë Linda, tre hnene laka itre sineenge fe a lapaa qaja aloine lo pane föeng.”

LINDA: “Ame hë la eni me Herman a ase faipoipo, kösë lo pane föe i angeice pala hi la hna wang atrun. Eni a atrehmekune laka, tru catre la hnei angeice me itre sinee i angeice hna hnim me qaja aloin lo pane föe i angeic. Ame itre xa ijin, thatre hë ni ka hape, Herman kö a hnimi ni tune la aqane hnime angeice lo pane föe i angeic?”

Hnei Linda hna sei hna cil memine lo pane föi angeic. Nge madrine catre angeic me Herman laka, hnei nyidroti hna iöhny me faipoipo. Ngo atrehmekune hi nyidroti laka, hetre itre jole ka xulu koi nyidro lue ka nyihnaaluene faipoipo, lo tha hna melëne kö hnene la itre ka aca faipoipo hi. *

Nemene la mekuna i nyipunie, ngöne la nyipunieti a nyihnaaluene faipoipo? Kola sa hnei Tamara, ketre föe ka faipoipo hmaca, köni macatre thupene la hna sei hna cile ka hape: “Ame la easa xötrei faipoipo, nge pane faipoipo, easa mekune ka hape, troa cile huti la faipoipo së. Ngo ame la easa nyihnaaluene faipoipo, tre ma tro ha saze la mekuna së, pine la aqane trongene la pane faipoipo së.”

Ngo ame pe, ala nyimu pi hë la itre trefëne ka mele madrine thupene la hna nyihnaaluene faipoipo. Haawe, maine madrine hi angatr, ijije hi tro fe nyipunieti a hane madrin! Ngo nemene la nyine troa kuca? Hane hi cahu  köni jole ka tru, me itre trepene meköti ka troa xatua nyipunie troa cile kowe la itre jole cili. *

PANE JOL: NYIPUNIETI A ISIINE MATRE THA TRO KÖ A AJOJEZINE LA MELE I NYIPUNIE HNENE LA FAIPOIPO HNAPAN.

Kola qaja hnei Ellen, ketre föe ka mel e Afrique du Sud ka hape: “Thatreine kö tro ni a thëthëhmine lo itre hnenge hna melëne memine lo föeng hnapan; the qaja pala ha e tro ni me föeng a ihamë ngöne la itre götrane hnenge hna lapaa majemine tro kow ekö, memine lo föeng hnapan. Ame la pun e itre xa ijin, tre eni ha qaja la ka aisapengönëne la föeng memine lo föeng hnapane ekö.” Maine ka faipoipo hë ekö la fö i nyipunie, nge angeic a lapaa porotrikëne la hnei angeice hna melëne ekö memine lo fö i angeice hnapan, tre ma tro nyipunieti lai a wesitr.

IXATUA: Loi e tro nyipunieti a atrehmekune hnyawa laka, thatreine kö tro nyipunie, maine fö i nyipunieti pena a thëthëhmine la itre hna melëne memine la hnei nyipunie hna pane ikötresai memin; the qaja pala ha e itre macatre ne ce mel. Hnene la itre xa atr hna jelenyipicine ka hape, ame ngöne la itre xa ijin, sesëkötre ju hi angatr la angatr a hëne la fö i angatr, hnene la ëje ne lo fö i angatr hnapan! Nemene la nyin kowe la itre jole ka tune la? Kola sa hnene la Tusi Hmitrötr ka hape: “Ce hni ju nyipunie.”—1 Peteru 3:8.

The wathebone kö kowe la fö i nyipunie troa porotrikëne la hnei angeice hna melëne ekö memine lo fö i angeice hnapan. Maine öni angeice ka hape, angeic a ajane troa pane porotrikën, trotrohni angeice ju, nge drei angeice ju cememine la hni ka utipin. Nge the canga mekune kö ka hape, ma angeic a thele troa qaja la ka aisapengönë nyipunie memine lo fö i angeice hnapan. Kola qaja hnei Ian, ketre thupëtresiji ka nyihnaaluene faipoipo, a traqa koi treene hë lao macatre enehila ka hape: “Tha hnei Kaitlyn kö hna wathebo ni troa porotrikëne lo pane föeng ekö. Ngo angeice pe a goeëne lai, kösë jëne tro angeic a trotrohnine la pengö i eni enehila.” Ame itre xa ijin, jëne tro hi nyipunieti lai a atre la nyine troa kuca matre tro nyipunieti a acatrene catrëne la aqane imelekeu i nyipunie memine la hnei nyipunieti hna faipoipo memin.

Loi e tro nyipunieti a wang atrune la itre thiina ka loi ne la fö i nyipunie enehila, memine fe lo itre thiina laka, pëkö thei itre xa atr. Maine jë, tro fe nyipunieti a öhne laka, hetre itre thiina me itre hna atreine hnene la pane fö i nyipunieti ekö, nge ka pë fe kö thene la fö i nyipunie enehila. Ame pe, hetre itre hna atreine fe hnei angeice ngöne la itre xa götran. Qa ngöne lai, acatrene catrëne jë la aqane imelekeu i nyipunie memine la fö i nyipunie enehila, qa ngöne la hna mekune me kapa madrine la ewekë ka loi hna öhne thene la fö i nyipunie, “ngo tha qa thei kete kö.” (Galatia 6:4) Öni Edmond, ketre thupëtresiji ka nyi hnaaluene faipoipo ka hape: “Isapengöne catre la aqane imelekeu së me lue sinee, a ka tune fe hi göi lue hne së hna faipoipo memin.”

Nemene la aqane troa atreine tulu ithanata göne lo fö i nyipunie hnapan, memine la fö i nyipunie enehila? Öni Jared: “Hnenge hna ithanata hnyawa me föeng, me qaja ka hape, ame la eni a pane faipoipo ekö, tre kösë hnenge hna cinyanyine la ketre itus ka lolo memine la pane föeng. Ame itre xa ijin, fe mina pi hi ni a e, me lapa mekune la itre ewekë ka lolo hna melën. Ngo tha eni hmaca kö a melëne la aliene la itus cili. Eni hmaca pena a cinyanyine la ketre itus memine la föeng, tus i nyiho, nge celë hi lai hnenge hna melën enehila, nge madrine ni.”

PANE TUPATHE JU LA: Hnyingëne jë kowe la fö i nyipunie, maine jole koi angeice troa drenge la kola porotrikëne lo pane fö i nyipunieti ekö. Nge wange ju la ijine ka loi ne troa ithanatane lai mekune cili.

HNAALUENE JOL: NYIPUNIETI A TUPATH MATRE TRO LA ITRE SINEE A MAJEMI KOWE LA HNAALUENE FÖ I NYIPUNIE.

Kola qaja hnei Zavie, ketre thupëtresij ka sei hna cile me faipoipo hmaca thupene la sikisi lao macatre, ka hape: “Thupene jë hi la nyiho a faipoipo, kolo ha qaja hnene la föeng ka hape, kösë lo kola waipengö i angeic hnene la itre xa sineeng.” Ame pena Leo tre öni angeice ka hape: “Ame la itre xa atr tre, öhnyi ni hi hnei angatr e cil, ngo sesëkötre mina ju hi ni la angatr a qaja kowe la föeng ka hape, hnime catr angatr la pane fö i angeic, nge meku angeice catre hnei angatr!”

IXATUA: Trotrohnine ju fe la itre sinee i nyipunie. Öni Ian: “Eni a mekune laka, ame itre xa ijin, tre akötre kowe la itre sinee së, maine hmahma pena angatr troa ce me easë, nge patre hë lo hnei angatr hna pune majemine ce öhnyi së memin. Qa ngöne lai, loi e “troa metöt, me amamane la thina ka menyike asë kowe la nöjei ate asë.” (Tito 3:2) Nue ijine pi kowe la itre sinee me itre atrene la hnepe lapa i nyipunie. Ame itre xa ijin, ame hë la easa nyihnaaluene faipoipo, tre kolo fe lai a saze la aqane imelekeu së me itre sinee. Kola qaja hnei Zavie, ka hape, ame hë e thupen, tre lolo hmaca ha la aqane imelekeu i nyidro memine la itre sinee i nyidro. Nge öni angeic:  “Hnei nyiho mina fe hna thele troa ce sinee memine la itre xan ka atre nyiho pë hë thupene la hnei nyiho hna faipoipo, ke nyiho a öhne laka, ketre jëne ixatua fe.”

Mekune ju la itre aliene hni ne la fö i nyipunie ngöne la nyipunieti a troa iöhnyi hmaca memine la itre ka hekö hë ce sinee me nyipunie. Maine nyipunieti a öhne laka kola troa ithanatane la pane fö i nyipunie, loi e troa tuluthe la itre ithanata me atreine waiewekë hnyawa matre tha tro kö a mekune hnene la fö i nyipunie, ka hape, kola wang aconyi angeic. Kola qaja hnei Tusi Hmitrötr ka hape: “Hetete ewekë kösë hna thine hnei taua; ngo nyine ameune la sesepeneqe ne la ate ka inamacan.”—Ite Edomë 12:18.

PANE TUPATHE JU LA: Canga mekune jë ka hape, nemene elany la itre ewekë ka troa ajolë nyipunie maine fö i nyipunieti pena. Nge canga ithanatane jë me fö i nyipunie la aqane tro epone elany a ce sa kowe la itre hnyinge ne la itre sinee i epon, memine la itre hnei angatre hna qaja göne la mele i epon me isa fö i epone hnapan.

HNAAKÖNINE JOL: JOLE TROA MEJIUNE KOI FÖ I NYIPUNIE, KE HNA NYI XETË TRIJI NYIPUNIE HNENE LO FÖ I NYIPUNIE HNAPAN.

Kola qaja hnei Andrew, ketre thupëtresiji hna trije hnei föe hmunë, ka hape: “Ame la hnenge hna xouene catrëne ekö, tre ene la troa nyi xetë triji ni hmaca.” Ame hë e thupen, angeice pë hë a ikötresai hmaca jë me Riley. Nge öni angeic: “Eni ekö a lapaa hnehengazo me hnyinge ka hape, ka ihmeku jë kö ni memine lo fö i Riley hnapan? Eni a xou wanga tha eje ju kö, nge triji ni jë hnei angeic matre thele ketre trahmanyi pena.”

IXATUA: The cile kö troa fe la hni nyipunie koi fö i nyipunie. Ke öni Tusi Hmitrötr: “Tha nyipi ewekë la ite mekun’ e tha hna ithanatan.” (Ite Edomë 15:22) Hnene laka hnei Andrew me Riley hna isa fe la hni nyidro matre mejiune jë ketre koi ketre. Öni Andrew: “Hnenge hna qaja koi Riley ka hape, ame koi ni tha sei hna cile kö la nyin kowe la itre jol; nge ketre lolo pi fe la hning la Riley a qaja koi ni ka hape, casi hi la mekuna i nyiho. Qaane ju hi lai, mejiune catre hë ni koi angeic.”

Maine hna nyi xetëne trije la fö i nyipunie hnene la fö i angeice hnapan, kuca jë la itre ewekë matre tro angeic a mejiune koi nyipunie. Ame la lue xa trefën, Michel me Sabine, lue ka isa sei hna cile me föe hmunë, tre hnei nyidroti hna ce axeciëne laka, maine hnei ketre e nyidro hna iöhnyi hmaca memine la isa fö i nyidroti hnapan, tre troa thuemacanyi ketre. “Ame koi nyiho, celë hi nyin matre isa tingetinge nyiho, nge tro pala hi a hetrenyi la imejiunekeu.”—Efeso 4:25.

PANE TUPATHE JU LA: Maine föe a ithanata me ketre trahmany, maine trahmanyi pena la ka ithanata me ketre föe, maine jëne telefon, maine jëne ëternet, maine ketre aqane ithanata kö, tre tha tro kö a aqeane menun.

Ala nyimu la itre atr ka alua faipoipo nge ka mele madrin; haawe, ijiji nyipunieti fe hi. Ma tro ha tro loi hnyawa, ke isa atrepengöi nyipunieti hë hnei nyipunieti kö. Öni Andrew: “Tru catr la madrine hnenge hna melën ngöne la eni a faipoipo me Riley. Traqa enehila koi 13 lao macatre ne faipoipo nyiho, nge casi hnyawa ha nyiho, nge tha ajane kö nyiho troa thapa la ewekë cili qaathei nyiho.”

[Ithueamacany]

ISA HNYINGE JË KA HAPE . . .

▪ Nemene la itre ewekë ka loi thene la föeng hnenge hna ajane catrën?

▪ Maine tro la ketre atr a porotrikëne lo föeng hnapan, nemene la nyine tro ni a kuca, matre troa tingetinge la hni ne la föeng, me atrehmekune laka, angeice la hnenge hna wang atrun?

[Iatr ne la götran 8]

[Iatr ne la götran 10]

Loi tro epone lue trefën a ce kuca la itre ewekë matre hetre nyine qaja epin