E Traqa Jë Sei Hna Cil

“Ketre goe ju pe hi ni. Lolo hi la aqane meleng, nge ame ju la ketre ijin, lapa menu ju pe hi ni.”—MARK, * ca macatre ne sei hna cil.

“Ka iatre la föeng memine la ketre jajiny ka ce xötre hi memine la nekö i nyiho jajiny. Ame hë la nyiho a sei hna cil, ketre uqa pi ni ke patre hë lai ka wepeI lapa; ngazo pe, kösë Io eni fe a hmahma, nge hleuhleu la meleng.” —EMMELINE, 17 hë lao macatre ne sei hna cil.

Ame itre xan, angatr a sei hna cil, matre uqa pi; ame pena itre xan, tre tha ajane kö troa sei hna cil, ngo patre hë föe hmunë qa kuhu hnalapa. Ngo ame pe, hleuhleu pi hë la mele ne la itre atr, thupene la hna sei hna cil. Maine ka xötrei sei hna cile fe nyipunie, maine jë, tro fe nyipunieti lai a hane öhne la itre jole ka fetra thupene la hna sei hna cil. Eloine pe, tro hë nyipunieti lai a öhnyi ixatua qa hnine la Tusi Hmitrötr, matre atreine nyipunie troa elë hune la itre jole ka fetra thupene la hna sei hna cil.

PANE JOL: ITRE MEKUNE KA IAJOJEZI.

Kola hnehengazo göi mani, me ha nekönatr, nge hleuhleu ka tru, ke kolo pë hë a lapa casi pe, nge tha canga patre kö qa kuhu hni së la itre mekune cili. Kolo fe a qaja hnene la ketre föe ka inine la pengöne la mekuna ne la atr, ka hape, itre macatre thupen, eje pala kö thene la ka sei hna cil la mekune laka, hna thoi koi angeic me triji angeic, nge haitre hë la mele koi angeic, nge pë hë madrin, nge kola hace fë laka, angeice casi pë hë.

NYINE TROA KUCA

▪ The hmahma kö troa treij. Maine jë, mekune pala kö nyipunie lai ka tro triji nyipunie, memine la ejolene la aqane ce mele i epon. Ngo ma hace catre kö la hni nyipunie qa ngöne laka, tha traqa ju kö nyipunie kowe la madrine nyine tro la lue trefën a kapa qa ngöne la faipoipo.  (Ite Edomë 5:18) Tha nyine hmahmane kö lai la troa “teij.”—Ate Cainöj 3:1, 4.

▪ The umë kö. Nyipici laka, pi tro kö sa lapa cas e easa treij, ngo thupëne kö, ke tha loi kö troa umë pala ju pë hë. (Ite Edomë 18:1) Porotrikëne jë memine la itre sinee i nyipunie la itre mekune ka iakeukawany, the lapaa qaja angazone kö lai ka triji nyipunie, wanga ananyi nyipunieti jë hnei angatr, ngacama nyipici ju hë la hnei nyipunie hna qaja. Maine hetre mekune ka tru nyine troa axeciën, thupene la hna sei hna cil, sipo ixatua ju thene la ketre sinee hnei nyipunie hna atre hnyawa.

▪ Wange hnyawa kö la mele i nyipunie. Ame la itre ewekë hna hnehengazon thupene la hna sei hna cil, tre celë hi lai itre xa ka hamë kucakuca me meci koi së, ka tune lo tasio me akötre he. Xeni hnyawa jë pe, nge enije jë; nge mekune kö mano hnyawa.—Efeso 5:29.

▪ Xometrije pi la itre ewekë ka aelëhni nyipunie maine lo itre ka tha nyipi ewekë pena; ngo amë hnyawa ju kö la itre pepa ka nyipi ewekë. Maine hetrenyi la itre ewekë ka troa akötrë nyipunie, ka tune lo itre foto ne faipoipo, xawane ju nge amë hnyawane ju pe ngöne ikareto, göi itre nekö i nyipunieti pë hë elany.

▪ Faifi lao mekune ka iajojezi. Öni Olga, ketre hna nyixetë trije hnei föe hmunë nge ka sei hna cil, ka hape: “Tha mano kö ni thele ka hape, ‘A nemene jë la elolone lai jajinyi hung?’ ” Olga pë hë a wang atrehmekun e thupen ka hape, casi hi la thangane la hna lapaa mekune tune lai, ene la “hni ka aköt.”—Ite Edomë 18:14.

Hnei itre xan hna pane fejane la itre mekuna i angatr, matre xatua angatr troa thupëne me nyidrawane la itre mekuna i angatr. Maine aja i nyipunie troa hane tune lai, tupathe ju troa nyihnane la itre mekune ka ngazo hnene la itre mekune ka lolo. (Efeso 4:23) Hane hi cahu lue aqane troa kuca:

Mekune Hna Lapa Fë: Zönge la kola nyixetë triji ni hnene la föeng.

Mekun Ka Loi: Tha hnene kö ka hape, ka tune eni lai, ke tro hë angeic a triji ni.

Mekune Hna Lapa Fë: Ce mele pena ju hi ni memine la ketre trahmanyi ka pë hnënyengön.

Mekun Ka Loi: Ka loi kö la tro ni a tro qëmek, matre madrine ni, ngazo troa xei koi itre ewekë hnapan.

▪ The drenge kö la itre ithanata ka iakötrë. Ame itre xa ijin, kola meku nyipunie hnene la itre sinee i nyipunie, ngo ithanata menu jë hi angatr, me qaja ka hape: ‘Nyine uën, ketre ka pë hnënyengöne lae angeice lai;’ maine pena troa qaja ka hape: ‘Methi Akötresie la troa sei hna cil!’ * Hetre nyipi kepine matre Tusi Hmitrötr a qaja ka hape: “The mekune kö kowe la nöjei tenge ewekë asë hna qaja.” (Ate Cainöj 7:21) Öni Martina, ka lue macatre ne sei hna cile hë, ka hape: “Tha eni kö a drenge la itre ithanata ka akötr, eni pe a thele la mekuna i Akötresie. Ke sisitria kö la itre mekuna i Nyidrë hune la itre mekuna së.”—Isaia 55:8, 9.

▪ Thithi jë koi Akötresie. Nyidrëti a thuecatre kowe la itre ka hmi koi Nyidrë troa “nuepi koi nyidëti la kuke hnine asëjëihë” i angatr, nge sisitria catre kö ngöne la itre ijine jol.—1 Peteru 5:7.

TUPATHE JU LA: Cinyanyine ju la itre xötr ne la Tusi Hmitrötr ka troa xatua nyipunie, nge amë ju fe ngöne la itre götrane ka troa canga mama koi nyipunie. Hetrenyi la itre xötr hna amë hë e caha, ngo hane fe la itre xa xötr ka xatuane la itre ka sei hna cil: Salamo 27:10; 34:18; Isaia 41:10; me Roma 8:38, 39.

HNAALUENE JOL: KA ITRIJ.

Öni Juliana, ka sei hna cil thupene la 11 lao macatre ne faipoipo, ka hape: “Hnenge hna sipone ielene kowe la föenge troa lapa. Ngo ame hë la angeic a tro triji ni, ke elëhni ju pe hi ni koi angeic memine lai föe ka ce mama me angeic.” Ala nyimu la itre hna tro trij, ka lapa fë elëhni pe kowe lai ka triji angatr, a traqa koi itre macatre.  Ngazo pe, hnene laka hetre nekönatre hë, celë hi lai ka upi angatre troa iöhnyi hmaca.

NYINE TROA KUCA

▪ Loi thiina ju. Ithanatane ju hi la itre mekune ka ijij, nge ka nyipi ewekë; the aqeane menune kö. Nyimutre la itre ka öhne laka, celë hi aqane tro lai a lapa tingetinge me ketre.—Roma 12:18.

▪ Thupëne kö la aqane ithanata. Maine easa drenge ka hape, kösë lo kola pi akötrë së hnei ketre, mekune kö la hna qaja hnei Tusi Hmitrötr, ka hape: “Ame la ate xome hnöthe la ite tenge ewekë i angeic, te, ate wangate hmekun.” (Ite Edomë 17:27) Maine jole koi nyipunie troa sa hnyawane matre tro loi la porotrik, ijije hi troa qaja koi angeice ka hape: “Ma loi tro hmaca pë hë nyiso a iöhnyi e thupen, troa ithanatane lai mekun.”

▪ The ijelekeune kö la itre jole i nyipunie, memine la itre jole ne lai ka triji nyipunie, ene la itre hna ithanatane ngöne la hna kootr, maine itre jole göi mani, maine göi itre sine meci pena.

TUPATHE JU LA: Ame la nyipunieti mina a troa ithanata memine lai ka triji nyipunie, thupëne kö la itre hatrene ka troa qajaqaja koi nyipunie ka hape, elëhni hë la ketre e epon. Nge maine nyipi ewekë, sipone jë tro hmaca a ithanata e ketre ijin, maine pena troa cinyany ngöne Ëternet göi troa sisedrëne lai porotrike i epon.—Ite Edomë 17:14.

HNAAKÖNINE JOL: ITRE NEKÖ I NYIPUNIE.

Kola mekune hmaca hnei Maria la ewekë ka traqa thupene ju kö lo hna sei hna cil: “Tha mano kö la neköng jajinyi treij, nge nyëne hmaca a zije jidr. Nge ame la mama i nyën, tre angeic a thele troa juetrëne la hace i angeic, ngo ame pe, öhne hi ni.” Ngazo pe, maine jë tha ijije kö la traeme maine trenge catre i nyipunie pena, göi troa xatuane la itre nekö i nyipunie ngöne lai ijine nyudreni a akötr.

NYINE TROA KUCA

▪ Thuecatre i nyudreni jë troa fe la hni nyudreni koi nyipunie, ngacama tro hë nyudreni a ‘ewekë menu’ e itre xa ijin.—Iobu 6:2, 3.

▪ Isa kuci hnëqan. Nyipici laka, nyipunieti fe a aja ixatua, nge maine jë tro nyipunieti a mekune laka, ijije hi troa xatua nyipunie hnene la nekö i nyipunie. Ngo tha meköti kö, nge tha loi kö koi nekönatre troa thue la itre jole i ka tru. (1 Korinito 13:11) The xomi nyëne kö ceitu me nyine troa qeje jole kow, nge the upi nyëne kö troa nyi trenge ewekë i nyipunie memine lai ka triji nyipunie.

▪ Eköthe hnyawane jë la mele i nyën. Ka loi koi nekönatr e tha tro kö a saze hnalapa, ngo tro pe a trongëne hnyawa la porogarame hna eköth. Ngo ame la ka sisitria catre kö, tre ene la troa xatuane la nekönatre troa easenyi koi Akötresie, jëne la hna e lapaane la Tusi Hmitrötr, me sine la hmi ne la hnepe lapa.—Deuteronomi 6:6-9.

TUPATHE JU LA: Ame ngöne la wiik, amexeje jë kowe la nekö i nyipunie ka hape, tru la ihnimi nyipunie koi nyën, nge tha zö i nyëne kö la epone lue trefën a sei hna cil. Sa jë la itre hnyinge i nyën, ngo the qaja angazone kö lai ka triji nyipunie.

Ijiji nyipunieti hi troa hane mele madrin, ngacama ka sei hna cile nyipunie. Öni Melissa, ka faipoipo koi 16 lao macatre ka hape, “Ame la nyiho a sei hna cil, öninge ka hape, ‘Tha pi tro kö ni a mele tune la.’ ” Ngo ame hë enehila, madrine hë angeic, ngacama hnei angeice hna pane melëne la itre ijine akötr. Öni angeic: “Lolo hë la melenge enehila, ke tha hnenge hmaca kö hna thele troa bëeke hmaca kowe la itre ewekë ka ase hë.” ▪

[Ithueamacany]

ISA HNYINGE JË KA HAPE . . .

▪ Hnenge kö hna hane xomi ijine troa pane treije thupene la hna sei hna cil?

▪ Nemene la nyine tro ni a kuca, matre tha tro hmaca kö ni a lapaa elëhni kowe lai ka triji ni?

[Iatr ne la götran 9]

Nue pi kowe la Wesi Ula i Akötresie troa xatua nyipunie ngöne ijine jol

[Iatr ne la götran 10]