Kola qaja hnine la ketre itus ka hape, ame ju fe kö la kola meci la atr ka ngazo, angeice hi a tro kowe la ihu eë ka tha hane kö pi, nge e cili tro pala pë hë angeic a akötr uti hë epine palua. (Catechism of the Catholic Church) Kola qaja hnene la itre xa hene ne hmi, ka hape, ame la itre atr hna kuiëne hnine la ihu eë, tre, thatre angatre hmaca kö hnei Akötresie.

“Tro kö a meci la ate kuca la ngazo.” (Ezekiela 18:4) Nge “tha ’te kö la kete ewekë hnei ite ka meci hë.” (Ate Cainöj 9:5) Maine thatre hmaca kö hnene la atr ka mec la ketre ewekë, tro angeice lai a drenge tune kaa la idreuthi ne la ihu eë, maine akötre qa ngöne la hna triji angeice hnei Akötresie?

Ame e hnine la itre xa Tusi Hmitrötr, ngöne la Isisinyikeu Hnapan me Isisinyikeu Ka Hnyipixe, easa öhne la kola qeje “ifereno,” ngo göi tro hi a qaja la pengöne la itre atr, e meci hë angatr. Ka tune ngöne la tusi Iobu, lo angeic a xomi akötrëne la mec i angeic; öni angeice ngöne la thith: “Epi tro enëtilai a juetë ni e hedis [“hnine la ifereno,” Tusi Hmitrötr Douay-Rheims, qene papale].” (Iobu 14:13) Iobu ekö a ajane matre mano pi angeic, tha hnine kö la ketre götrane gaa iaxösisi, maine götrane ka ananyi angeice qaathei Akötresie; ngo angeice hi lo a qaja la hua.

Pëkö atr ka ajane troa easenyine la Akötresieti ka iaxösisi, Akötresieti pe lai hna xele ma wang. Önine la ketre föe qa Mexique, ene Rocío ka hape: “Kola ini huni qa ngöne la eahuni a nekönatr ka hape, hetrenyi lo ihu eë. Pine laka, xouenge catre la ewekë cili, jole koi ni troa mekune ka hape, hetrenyi thei Akötresieti la itre thiina ka lolo. Öninge pena kö ka hape, Akötresieti ka wesitre lapa Nyidrë, nge ka pë fe kö hni ne utipin.”

Ngo saze ju hi la aqane goeë Akötresieti hnei Rocío, ke atre hë angeice la hna qaja hnei Tusi Hmitrötr göne la aqane iameköti hnei Nyidrë, memine la pengöne la itre ka mec. Öni angeice jë hi: “Kösë lo kola mele hmaca la ngönetreing, ke ka tune lo ketre ehnefe hna una. Qaane ju hi lai, hmaloi hë koi ni troa lapaune ka hape, Akötresieti a ajane la nyine loi koi së, nge Nyidrëti a hnimi së, nge ijije fe tro ni a hane hnimi Nyidrë. Eni hë a goeë Nyidrë ceitu me ketre kem ka xome hnyawane la itre nekö i nyidrë, nge ka ajane la loi koi nyudren.”—Isaia 41:13.

Ala nyimu la itre atr ka hmi koi Akötresie, ke angatr a xouen wanga kuië angatre pi kowe la ihu eë; ngo tha aja i Akötresieti kö troa nyi hlue i Nyidrë pine laka, angatr a xoue Nyidrë. Ke öni Iesu: “Qâ i ’ö troa aja Joxu [Iehova, MN] Akötesi ’ö.” (Mareko 12:29, 30) Ame mina fe la easa atrehmekune ka hape, ka meköti pala hi la itre huliwa i Akötresie, hmaloi ju fe hi koi së troa hane mejiune kowe la aqane tro Nyidrëti a iameköti elany. Nge ce mejiune së hi me Elihu, sinee i Iobu ekö, atre qaja ka hape: “Iananyi la ngazo me Akötesie, kete tune la thina ka ngazo me Kapucatinasë.”—Iobu 34:10.