KA QA NGÖNE ICETRÖN | ITRE TRENGATHOI KA AJÖLE SË TROA HNIMI AKÖTRESIE
Thatre Hë La Ëje i Akötresie
MEKUNA NE LA ITRE ATR
Hnene la ketre ka inamacane hna qaja ka hape, pëkö ewekë ka anyipicine ka hape hetre ëje i Akötresie, nge thatre pena kö së ka hape, drei la ëje i Nyidrë.—Professor David Cunningham, Theological Studies.
NYIPICI QA HNINE LA TUSI HMITRÖTR
Öni Akötresie: “Iehova ni, celë hi ëjeng.” (Isaia 42:8) Ame la “Iehova,” tre qene Heberu, nge kola hape, ‘Atre Aejën.’—Genese 2:4.
Iehova a ajane tro sa qaja la ëje i Nyidrë. Kola qaja hnene la Tusi Hmitrötr ka hape: “Hënejë la atesiwa i nyidë ; amamanejë thene la ite nöje la ite huliwa i nyidë ; nge thue macane jë laka ka sisitia la atesiwa i nyidë.”—Isaia 12:4.
Hnei Iesu ekö hna hane qaja la ëje i Akötresie. Öni nyidrë koi Iehova ngöne lo nyidrëti a thith: “Hnenge hna amamane koi angate [ene lo itretre drei Iesu] la atesiwa i cilie nge trokönia amaman.” Hnauëne laka qaja jë Iesu kowe la itretre drei nyidrë la ëje i Akötresie? Öni nyidrëti kö ka hape: “Mate eje kö e kuhu ite hni angate la ihnim, tune lo hna hnimi ni hnei cilie, nge ini e kuhu ite hni angat.”—Ioane 17:26.
ENYIPIEWEKËN
Önine la ketre ka inamacane ka thele troa atre la pengö i Akötresie ka hape, thatreine kö la atr ka thatre kö la ëje i Akötresie troa atrepengöi Nyidrëti hnyawa, nge maine ketre mene hi Akötresieti koi angeic, thatreine kö tro angeic a hnimi Nyidrë.
Ame Victor, tre ka tro pala hi angeic troa hmi e nöjei wiik, ngo angeic a qaja ka hape, tha nyipi atre Akötresieti kö hnei angeic. Ngo öni angeic: “Ame pe, eni ha inin e thupen ka hape, Iehova la nyipi ëje i Akötresie, nge kösë jëne eni hi lai a nyiqaane atre Nyidrë. Ka tune lo ka hape, hnenge hna lapaa drei itre xan e qeje Nyidrë, ngo eni petre hi la a xötrei iöhnyi me Nyidrë. Qaane ju hi lai, eni ha goeë Nyidrë ceitu me ketre atre hi, nge eni ha thele troa easenyi koi Nyidrë.”
Ame la troa juetrëne maine nyihnane la nyipi ëje i Akötresie, tre kösë lo kolo hi lai a xometrije qa hnine la Tusi Hmitrötr
Ame Iehova, tre, ketre Nyidrëti fe a hane easenyine la itre atr ka hëne la ëje i Nyidrë. Ase hë Nyidrëti ahnithe kowe la itre ka “mekune la atesiwa i nyidë,” ka hape: “Tro ni a hnimi angate tune la ate hnime la nekö i angeic’ ate dei angeic.” (Malaki 3:16, 17) Akötresieti mina fe a amanathithine la itre atr ka hëne la ëje i Nyidrë. Öni Tusi Hmitrötr: “Tro ha mele angat’ asë angete hëne la atesiwa i Joxu.”—Roma 10:13.
