KOLA tu hnei Rahaba e hmahmakany qa ngöne la mamalama, nge lai hë ngöne la hnapapa i Ieriko. E cili lo hna traqa itronyi hnene la trongene isi Isaraela. Ketre drai hmaca ne tro angatr a tro kanothe la traon; kola so la dro hnene la tronge i angatr, nge tha idrei kö koilo hnene la kola ihonyi la wenge trutru.

Ka mele Rahaba e Ieriko; nge atre asë hi angeice la itre gojenyi ne la traone cili, memine la itre uma, me itre hna maketr, me hna salem. Goi atre fe angeice la itre atr ne la nöje cili. Ma drenge jë hi angeice laka, kola elë trootro la xou i angatr, ke tha trotrohnine kö angatre la kepine matre kola tro kanoth e nöjei drai la traone i angatr hnei angetre Isaraela. Kola mexeme draië la mejene la itre trutru e kuhu ngöne la itre göjenyi ne la traon, ngo goi tha seseu fe Rahaba, maine xou pena.

Öhne hë Rahaba ekula lo hmahmakany la kola nyiqaane tro hnene la angetre Isaraela, nge hnaasevenene draine hë. Öhne hi angeice la kola tro nyipine la trongene isi, la itretre huuj ka ufi trutru, me kapa trongëne la pua ne isisinyikeu ka nyihatrene ka hape, ce Iehova Akötresieti me angatr. Pane mekune jë së la Rahaba a tu qa ngöne la mamalama i angeic ka qëmeke kowe kuhu tröne lai traon, nge kola të la iwanakoime i angeic hune lo eno ka palulu. Kola amekunë Rahaba hnene lai eno cili ka hape, tro kö angeice me hnepe lapa i angeic a mele pe, ngöne la ijine kola troa lep apatrene lai traon. Hapeu, ka ihnihni lae Rahaba kowe la sipu nöje i angeic? Ohea, tha mekuna i Iehova kö lai; Nyidrëti pe a goeë angeic ceitu me ketre föe ka tru lapaun. Ngo tro sa pane ce wange la pengö i Rahaba, memine la itre ini nyine tro sa xome qaathei angeic.

Föe ne gojenyi Rahaba ekö. Kola xouene ekö hnene la itre xa ka inamacan nge ka qeje pengöne la Tusi Hmitrötr, troa qaja la ithuemacanyi cili; celë hi kepine matre öni angatre ka hape, ketre atre cilë hôtel hi Rahaba. Ngo tha Tusi Hmitrötre kö a qaja juetrën, maine qaja aloine pena la itre ithuemacany. (Iosua 2:1; Heberu 11:31; Iakobo 2:25) Ame ekö thene la angetre Kanana, tre tha hna qaja angazone kö la huliwa i Rahaba. Ngacama celë hi aqane waiewekë i angetre Kanana lai, ngo ame pe, hnei Akötresie hna xup la nöjei atr asë cememine la mekuthethew, ene la atreine troa wang la loi me ngazo. (Roma 2:14, 15) Nge ma drenge jë hi Rahaba ekö ka hape, ngazo la aqane mele i angeic. Ngo ame pe, jole hë koi angeice troa nuetrije lai huliwa cili, tune la itre xa atr enehila, nge ma pë jë kö ketre jëne mani koi angeic me hnepe lapa i angeic.

Ma ka ajane jë fe hi Rahaba troa hetre mele ka loi. Majemi hë la itre atr ne la nöje cili troa goeëne la iaxösisi, me nöjei pengöne huliwa ka sisi hna kuca, ka tune la troa ixom hnene la itre atrene la hnepe lapa ka cas, me ce meköle me itre öni. (Levitiko 18:3, 6, 21-24) Ame la ketre kepine matre kola haöthe la nöje cili hnene la nöjei pengöne huliwa ka ngazo, tre hnei hmi. Hetrenyi ekö la itre uma hmitrötr hna xup thatraqane la huliwa ne la itre föe ne gojeny, me thatraqane la itre haze ka tui Baala me Moleka, lo itre hna huujëne kow la itre nekönatr hna kuiëne koi eë.

Tha sihngödri kö koi Iehova la itre ewekë cili hna kuca e Kanana. Nge pine la nöjei ewekë ka ngazo cili, öni Iehova: “Ngazo hë la nöj ; nge tro ni a nyi thupene kow’ eje la hulö ne ej, nge kola hmitane tije hnene la nöje la itete lapan’ ej.” (Levitiko 18:25) Nemene la aqane tro Akötresieti a “nyi thupene kow’ eje la hulö ne ej”? Öni Nyidrëti e thingehnaeane koi angetre Isaraela:  “Tro Iehova Akötesi ’ö a helëne isa acone la ite nöje cili qëmeke i ’ö.” (Deuteronomi 7:22) Ase petre kö Iehova thingehnaeane ekö catr kowe la lapa i Aberahama, ka hape tro angatr a hetrenyi la nöje cili, nge “Akötesie ka tha ’teine thoi” Nyidrë.—Tito 1:2; Genese 12:7.

Ngo hnei Iehova mina fe hna ahnithe ka hape, tro Nyidrëti a apatrene trije la itre xa lapa ne Kanana. (Deuteronomi 7:1, 2) Meköti la aqane “amekötine [Nyidrë] la fene hnengödrai,” ke atre Nyidrëti la hni ne la nöjei angetre Kanana, nge öhne hi Nyidrëti la etrune la ngazo me mekune ka sisi e kuhu isa hni angatr. (Genese 18:25; 1 Aqane Lapa Ite Joxu 28:9) Tune kaa jë la mele i Rahaba, thupene la angeic a atre ka hape tro fe a hane lep apatrene la traone i angeic? Pane mekune jë së la hnei angeice hna mekun, ngöne lo angeic a drenge la itre hna qaja göne la nöje Isaraela. Drenge hë angeice laka, hnei Akötresieti hna thapa la nöje i Nyidrë qa ngöne la ithahluë, me ngaane la trongene isi ne la angetre Aigupito, nöje ka catre ngöne la fene hnengödrai asë ngöne la ijine cili. Easenyi hë matre lepi Ieriko jë pena hnei angetre Isaraela! Ngo tha tro trije ju kö angetre Ieriko la itre huliwa i angatr ka ngazo. Celë hi kepine matre Tusi Hmitrötr a qaja göne la angetre Kanana ne lo hneijine i Rahaba ka hape, “angete tha idei.”—Heberu 11:31.

Ngo tha hnei Rahaba kö hna tui angatr. Itre macatre hë ne angeic a drei meje i angetre Isaraela, me Iehova Akötresie angatr, nge angeic a hai angatr. Isapengöi Iehova catre memine la itre haze ne Kanana! Tha ka axösisine kö Akötresie la nöje i Nyidrë, ngo Nyidrëti pe a nyixöle i angatr; ketre, Nyidrëti a hamëne koi angatre la itre trepene meköti ka atrunyi angatr, ngo tha ka ahmahmanyi angatre kö. Akötresieti Nyidrë ka wang atrune la itre föe, ngo tha hnei Nyidrëti kö hna xomi nyudren kösë nyine itön, maine salemëne pena, matre tro la itre trahmanyi a ce meköle memin, nyine huuje kowe la ketre hmi ka iangazo. Ame la Rahaba a atre ka hape, kola hunuma hnene la angetre Isaraela hmekune lo hneopegejë Ioridano, treqene troa lepi angetre Kanana, tre ma hnei angeice jë hna pane hnehengazone la nöje i angeic. Hapeu, hnei Iehova kö hna waipengöi Rahaba, me öhne thei angeice la thiina ka loi?

Ala nyimu enehila la itre atr ka tui Rahaba. Ma jole koi angatre troa tro trije la ketre aqane mele ka ahleuhleunyi angatr me thapa la madrine i angatr; nge angatr a mekune ka hape, pëkö ka hane semesinee angatr, nge ka pë hnënyengöne angatr. Kola amamane hnene la pengö i Rahaba ka hape, pëkö ketre e easë hna tha wang atrune kö hnei Akötresie. Ngazo ju hë la mekuna së göi së kö, ngo “tha iananyi kö nyidë me eëshë asëjëihë.” (Ite Huliwa 17:27) Ka easenyi Akötresie kowe la nöjei atr ka lapaune koi Nyidrë; Nyidrëti a treqe angatr, nge hetre aja i Nyidrë troa thue mejiune koi angatr. Hapeu, ka hane fe kö Rahaba lapaun?

Ame ju hi lai ketre drai, qëmekene tro la angetre Isaraela a tro kanoth e Ieriko, hna pane traqa koi Rahaba hnene la lue trehnyiwa. Nyidroti a tro juetrë matre tha tro kö a wang atrehmekunyi nyidro hnene la itre atr ne la traon. Ngazo pe ala nyimu la itre atr e cili, ka alamekëne la itre trehnyiwa, matre wang ka hape, tha angetre Isaraela jë kö? Maine jë, canga mama ju hi koi Rahaba la pengö i nyidro. Tha hnene kö laka, tha majemine kö Rahaba öhnyi trehnyiwa e fenifeni qëhnelö thei angeic, ngo hnene laka, tha ajane kö nyidro troa ce meköl me Rahaba; nyidroti hi a thele hnë troa meköl.

Nyidroti lo lue atre Isaraela, hna up troa alamekëne la nöj. Iosua la atre upi nyidro, troa waipengöi Ieriko,  ene la itretre kë zin, memine la ihnadro. Celë hi traone ne Kanana lai hnei angetre Isaraela hna troa pane lep, nge ka catre kö la traone cili hune lo itre xan. Iosua hi a ajane troa atre la pengöne la itre ithupëjia, hnei angeice me itre isi jini angeic hna troa ixelë memin. Hna thë hi hnene lo lue thupëtresiji troa tro kowe la hnalapa i Rahaba. Ke hnalapa ne föe ne gojenyi lai, nge hna traqa kow hnei nöjei pengöne atr. Maine jë, nyidroti a ajane troa hnangenyëne la itre porotrike ne la itre atr, matre troa xomi ithuemacany qa ngön.

Kola qaja hnei Tusi Hmitrötr ka hape “hna kapa aloine la lue maca” hnei Rahaba. (Iakobo 2:25) Hnei angeice hna alö nyidro kowe la hnalapa i angeic, nge ngacama angeic a nango mekuhni, ngo hnei angeice pe hna kepe nyidro. Maine jë, angeic a ajane troa hane atrepengöi Iehova, Akötresie i nyidro.

Ngazo pe, traqa fe hë e cili la itre maca ne la joxu ne Ieriko! Drenge hë e cahu ka hape, qa ha thei Rahaba hnene la lue atre Isaraela. Nemene la nyine tro Rahaba a kuca? Maine tro angeic a juetrëne la lue trehnyiwa, tro angeice me hnepe lapa i angeic a traqa koi ewekë ka ngazo. Tro ha humuth la hnepe lapa i angeic asë hnene la angetre Ieriko, pine lai. Atre hnyawa ha Rahaba enehila la pengöne lo lue thupëtresij. Atre hë angeice laka, lolo ju kö la thiina i Iehova hune la itre haze i angeic, nge ijine tro hi angeice lai a amë la mejiune i angeice koi Iehova.

Hohopatre hi la ijine tro Rahaba a axeciëne la nyine kuca; ngo loi pe, loi la wang atrehmekune i angeic, ene pe canga enije jë hi angeic. Angeice pë hë a juetrëne ju lo lue atre alamekëne la nöj fene la itre ene lino, hnei angeic hna jön e koho hun la uma i angeic. Angeic a tro jë kowe lo itre maca ne la joxu, me qaja ka hape: “Hna traqa koi ni la lue ate, ngo tha ’te kö ni la qa i nyidoti ngön ; nge e kola thinge la qanahag’ e jid, ame hna löpi la lue ate, nge tha ’te kö ni la hnei lue ate hna tro kow ; canga nyenyape thenge nyido, ke tro nyipunie a e nyido.” (Iosua 2:4, 5) Easa pane mekune la Rahaba a pane cile qëmekene la itre maca i joxu. Drei jë kö la kola manomano la wenethëhmi angeic!

Ngo canga drei angeice ju hi hnei angatr! Ame hnei angatre hna canga nyenyape me kuhu thenge la itre götrane gaa tëtë ne la hneopegejë Ioridano. (Iosua 2:7) Lolo ju hi la hni Rahaba. Ase hë Rahaba amenune la itre ka ihumuth, ke tha tro kö angatr a atre ka hape, ekaa lo lue thupëtresij; celë hi matre, mele kö la lue hlue i Iehova, hnei angeic.

Rahaba a nyenyape hmaca jë a tro kowe la uma i angeic e koho, me thuemacanyi nyidro la itre hnei angeice hna kuca. Ketre, angeic a qaja ju fe koi nyidro la ketre ithuemacany ka lolo, nge ka hamë madrine koi nyidro: ene laka tru la hna xouene la angetre Isaraela hnene la angetre Ieriko. Ame la hna xouene catrëne hnene la angetre Kanana, tre ene la mene i Iehova, Akötresie ne la angetre Isaraela! Rahaba a qaja ju fe la ketre mekune ka sisitria catr, a koi së mina fe enehila. Öni angeic: “Iehova Akötesi nyipunie la Akötesieti e koho hnengödrai me e celë fen.” (Iosua 2:11) Hetre  ini hnei angeice hna kapa qa ngöne la itre ithuemacany hnei angeice hna drenge göi Iehova: ka loi kö la troa mejiune kowe la Akötresie ne la angetre Isaraela. Angeice pë hë a lapaune ju koi Iehova.

Ka xeci hnyawa koi Rahaba ka hape, tro ha ngaane la angetre Ieriko hnene la nöje i Iehova. Qa ngöne lai, angeic a sipone ju kowe lo lue ka alamekëne la nöj, troa amele angeice me hnepe lapa i angeic. Hna kapa la sipo i angeic, nge nyidroti a sipo angeice jë tha tro kö angeic a qajaqaja la hnei angatr hna ce axeciën, nge troa athipe la eno ka palulu ngöne la mamalama i angeic, ngöne la ngöne uma ka qëmeke kowe e kuhu tröne la traon, matre tro la itre sooce i angetre Isaraela a thupë angeice me hnepe lapa i angeic.—Iosua 2:12-14, 18.

Hetrenyi la ketre ini ka sisitria hne së hna xom qa ngöne la tulu i Rahaba. Kolo hnei Tusi Hmitrötr hna qaja ka hape, kola “lapaune [qa] ngöne la hna deng.” (Roma 10:17) Drei mejene hë angeice la itre ithuemacany ka nyipici, ka qaja la mene me meköt i Iehova Akötresie; angeic a amë ju la lapaune me mejiune i angeice koi Nyidrë. Ame enehila, tru catre hë la itre ithuemacany ka ini së la pengö i Iehova. Tro kö sa thele troa atrepengöi Nyidrë, me amë la lapaune së kowe la Tusi Hmitrötr, lo Wesi Ula i Nyidrë?

Ame hna nuenue pi lo lue atre alamekëne la nöje qa ngöne la mamalama, tune la aqane upi nyidro hnei Rahaba, me canga kötr kowe la itre wetr. Tru la itre ngönemenyi e cili ngöne la itre gojenyi ne tro kowe la itre wetr, e kolopi ne Ieriko; e cili la hnei nyidroti hna za, treqene matre traqa maca pi la itre ka ithel ngöne la traon. Nyidroti pë hë a bëeke jë kowe la angetre Isaraela, matre troa hamëne la itre ithuemacany qaathei Rahaba.

Ame hë e thupen, drei jë kö la kola hmengöhmengöne hnei xou hnene la angetre Ieriko, ke drenge hë angatr ka hape, hnei Iehova hna aweliwelëne la Hneopegejë Ioridano, matre nyi jë i angetre Isaraela. (Iosua 3:14-17) Ame koi Rahaba, celë hi ewekë lai ka anyipicine ka hape, loi la aqane axecië mekune i angeic, ene la troa amë la lapaune i angeice koi Iehova.

Ame ngöne la drai cili, angetre Isaraela hi lai a nyiqaane tro kanoth e Ieriko. Ngöne la drai, tro angatr a aca kanothe la traon, uti hë la hnaasikisine drai. Ame hë ngöne la hnaasevenene drai, ketre pengöne kö. Tune lo aqane qaja ngöne la qaane la tane mekune celë, hnei angatr hna nyiqaane tro e hmahmakany, me tro kanothe jë la traon, acas, me alu, me akön, nge tha fenesi pala kö la tronge i angatr. (Iosua 6:15) Ngo kolo jë a ue hnene la angetre Isaraela?

Ame hë la angatr a umuthe la hnaasevenene tro kanoth e Ieriko, ngöne lai hnaasevenene drai, angatr a cile ju. Pë ju fe hi mejene trutru. Hnetime ju hi e koilo. Mama hi la kola hnehengazo la iatrene la traon. Ame ju hi la Iosua a hamëne la hatren, ene pe sue jë hi la trongene isi Isaraela. Maine jë kola mekune hnene la itretre thup e koho hune la hna xupi etë ne la traone Ieriko ka hape, ma kolo ha sue ne isi. Ngo sesëkötre ju hi angatre la kola enienije la hna xupi etë fei angatr. Öhne hi angatre la kola jumejume la hna xupi etë, me kaqa, uti hë la trotro lapa! Ame ju hi la kola patr la so, mama ju pe hi laka, ca götrane la hna xupi etë ka cile kö. Kolo hi lo hnalapa i Rahaba, nge celë hi lai sipu hatrene la lapaune i angeic. Drei jë kö la madrine i Rahaba, la angeic a öhne ka hape, hnei Iehova hna thupë angeic! * Nge mele kö la hnepe lapa i angeic!—Iosua 6:10, 16, 20, 21.

Ka tru kowe la nöje i Iehova la aqane lapaune i Rahaba. Ame la angatr a öhne ka hape, cile pe kö la uma i Rahaba, wang atrehmekune ju hi angatr e cili, ka hape ce Iehova me angeic. Trianyi angeice ju kö me hnepe lapa i angeic hnene la iameköti Iehova. Thupene hë la isi, hnei angetre Isaraela hna nue Rahaba troa lapa ezi angatr. Nge e thupen, Rahaba fe a hane sine la nöje i angetre Iudra, ke hnei angeic hna föene la ketre thupëtresij; Salemona la ëjei nyidrë. Mala pi hi Boaza nekö i nyidro, a ketre atr ka catre lapaune fe. Nge hnei angeice hna faipoipo me Rutha, föe ne Moaba. * (Rutha 4:13, 22) Thupene hë la itre macatre, kolo fe a hane fetra qa hnine lai lapa cili hnei Davita Joxu, me Iesu Keriso fe, lo Mesia.—Iosua 6:22-25; Mataio 1:5, 6, 16.

Kola amamane hnene la hna melëne hnei Rahaba, ka hape, pëkö ala casi e easë hna thatre pe kö hnei Iehova. Öhnyi së asë hi hnei Nyidrë, nge atre Nyidrëti la hni së, nge maine hetrenyi the së la nekö i lapaune ka co, tune lo hnei Nyidrëti hna öhn thei Rahaba, tru la madrine i Nyidrë. Hnene la lapaune i angeice hna upi angeice troa ujë. Nge “hna qaja ameköti [angeic] hnene la ite huliwa,” tune la aqane qaja e hnine la Tusi Hmitrötr. (Iakobo 2:25) Ange catre pi së troa hane lapaune tui angeic!