“Hete thangane ngöne la nöjei huliwa asë” hna kuca hnene la itre atr ka huliwane la inamacane me lue iwanakoim. (Ite Edomë 14:23) Nemene la itre thangan? Kola aijijë së troa hetrenyi la itre mo ka nyipi ewekë kowe la mele së. Nyipici laka ase hë Akötresieti thingehnaeane ka hape, tro kö Nyidrëti a hamëne la ka ijije kowe la mele së. (Mataio 6:31, 32) Ngo tro fe sa kuca la hnëqa së, matre tro kö sa xen qa ngöne la wene zihnue së.—2 Thesalonika 3:10.

Ame la easa huliwa, ke loi e troa mekune la ewekë hne së hna ajane troa eatrën. Ame la atr ka huliwa, tre angeic a inine troa ketre sipu thue la ehnefe i angeic. Öni Joshua, ka 25 lae macatre ka hape: “Ame hë la easa ketre sipu huliwa koi së, ase hë së lai aeatrëne la ketre hne së hna ajane troa traqa kow. E hetrenyi hë së la ka ijije kowe la mele së, haawe, huliwa ka loi hi lai.”

Ketre ame la atre huliwa catr, tre hna atrune hnene la itre huliwa i angeic. Ke, ngacama ka catre ju hë, ngo ketre ase hë angeice isiine troa aeatrën. Ame la easa akötrehnine troa kuca la huliwa së, tre tro së lai a hetre madrine qa ngön, ke hne së hna isiine troa aeatrën, nge tha hne së kö hna kötre ne huliwa. (Ite Edomë 26:14) Aqane tro hi së lai a madrine qa ngöne la hne së hna huliwa. Öni Aaron, lo hna qaja ha ngöne la pane götrane ka hape: “Ewekë hi lai hnenge hna hane dreng thupene la drai ka pexeje ne huliwa ni. Ngacama kucakuca ha ni nge tha öhne kö hnei itre xan la huliwang, ngo ase hë ni aeatrëne la hnëqang.”

Tusi Hmitrötr a qaja aloine la “ate kuca nyimenyimëne la huliwa i angeic,” memine la föe ka “huliwa madine hnei lue iwanakoim.” (Ite Edomë 22:29; 31:13) Tha tro kö së lai a huliwa hnyawa e tha hne së kö hna pane inin. Nge maine tha maca kö së ngöne la ketre aqane huliwa, tre tha tro kö së lai a madrin. Nge ma celë jë hi lai kepine matre tha madrine kö la itre atr ngöne la hna huliwa. Tha hnei angatre kö hna thele jëne troa maca ngöne lai huliwa cili.

Ijije tro la atr a kuca madrine la nöjei pengöne huliwa, e tro angeic a inine la aqane troa maca ngöne la huliwa cili, ke celë hi aqane waiewekë ka loi lai. Öni William, ka 24 lae macatre ka hape: “Ame la easa nue asë la hne së hna atrein ngöne la ketre huliwa, tre tro kö së lai a öhne la thangan. Tha tro kö së lai a madrin, e hne së hna moiasene la huliwa.”

The wang atrune catrëne kö la mani hna troa kapa e pune treu. Ngo isa hnyinge jë ka hape: ‘Nemene la enyipiewekëne la huliwang? Nemene la thangan e tha aeatrëne kö, maine tha kuca hnyawane kö ni? Nemene la eloine la huliwang koi itre xan?’

Ka lolo catre lai hnyinge tixenuë, ke ame la easa atre ka hape, hetre loi hnei itre xa atr hna troa kapa qa ngöne la hne së hna catre huliwa, tre tro së lai a huliwa madrin. Öni Iesu: “Sisitia la manathithi e troa hame hune la troa kapa.” (Ite Huliwa 20:35) Tha itre clients me maseta hmekuje kö la ka kepe thangane ka loi, ngo itre xa atre fe. Ka tune la itre atrene la hnepe lapa së, me itre xane fe ka aja ixatua.

Itre atrene la hnepe lapa. Ame la kola isiine hnene la hene la hnepe lapa troa catre huliwa thatraqai föe hmunë me ha kuku, tre hetre thangane ka loi koi nyudren. Ame la hnapan, tre ene la itre loi ngöne la götrane ngönetrei, ka tune la xen me iheetr, me uma. Nge aqane tro hi angeice lai a “thupëne hnyawa la ite sine i angeic,” tune la hna amekötine hnei Akötresie koi angeic. (1 Timoteo 5:8) Ketre, ame la trahmany ka catre huliwa, tre angeic a amamai tulu ka loi. Öni Shane, lo hna qaja ha ekula: “Ame koi ni, ke kakati hi la ketre trahmanyi ka huliwa hnyawa. Ngacama ka tratrau sinöe nyidrë, ngo ka nyipici nyidrë ngöne la hna huliwa. Hnene la tulu i nyidrë hna ini ni troa huliwane la lue iwanakoimeng, matre troa cane la itre ewekë ka loi hna troa huliwane pena hnei itre xan.”

Itre ka aja ixatua. Hnei Paulo aposetolo hna thuecatrene la itre Keresiano troa “huliwa, kola kuca hnei lue ime la ewekë ka loi, mate hetenyi . . . la nyine hamëne kowe la ka pë ewekë.” (Efeso 4:28) Eje hi, ame la easa catre huliwa thatraqane la hnepe lapa së, tre ma tro fe lai a hetre nyine troa hamëne kowe la itre ka pë ewekë. (Ite Edomë 3:27) Nge e cili, tro fe sa melëne la madrine ka sisitria ka xulu qa ngöne la hna ham.

Öni Iesu ekö e cainöje hune la wetr ka hape: “Maine kete ate a iele eö troa trongëne la kete mail, ce trojë me angeice uti hë la hnaaluen.” (Mataio 5:41) Nemene la aqane tro epuni a trongëne la ithanata celë ngöne la hna huliwa? Kuca apexejene jë la huliwa. Isiine jë troa kuca hnyawan, maine tro pena a huliwa nyimenyim. Nge madrine jë qa ngöne la itre huliwa hnei epuni hna kuca, ngacama itre hnepe ka co petre kö.

E tru la hnei epuni hna huliwa, tro epuni lai a öhnyi madrin qa ngön. Pine nemen? Pine laka, pëkö ka upi epun; hnei epuni kö hna sipu mekun. Epuni a huliwa catr qa kuhu hni epun, tha hna musinë epuni kö. (Filemona 14) Nge troa mama e cili la enyipicine la hna qaja ngöne Ite Edomë 12:24: “Tro la ime ne la itete cate huliwa a mus ; ngo tro la ate witi a hot.” Nyipici laka, pë trootro hë atr enehila hna thahluën. Ngo ame la atr ka xele ma huliwa catr, tre ma kolo jë a mekune ka hape, wanga hape jë, hna thahluën. Ngo ame la atr ka catre huliwa, ke angeic a madrine la etrune la huliwa hnei angeice hna sipu mekune troa aeatrën. Sipu hnei angeice kö hna axeciëne la itre huliwa hna kuca.

Hna qaja aloine la atre catre huliwa; ngo tha easë kö a mele hnei huliwa hmekuj. Nge ithuecatre lai hna hamën hnei Tusi Hmitrötr, ene la troa catre huliwa, ngo ngöne la tulu. (Ite Edomë 13:4) Ke öni Ate Cainöj 4:6: “Loi e ca hnatrapaime ka tiqa ce me tingeting, hune la lue hnatrapaime ka tiqa ce me huliwa me kola xeni la eny.” Kola hapeue lai? Kola hape, e tro sa huliwa mec uti hë la kucakuca, nge pë hë traeme së kowe la itre xa ka nyipi ewekë ngöne la mel, haawe gufa ha la madrine koi së. Nge kösë easë hi lai a “xeni la eny.”

Tusi Hmitrötr a xatua së troa atreine waiewekë. Kola thuecatre së troa catre huliwa, nge kolo fe a upi së troa “tupathe . . . la nöjei ewekë ka isa pengöne kö.” (Filipi 1:10) Nemene itre ewekë lai? Kola qaja koi së troa ami ijin göi troa ce memine la itre hnepe lapa së me itre sinee së, me göne fe la itre huliwa së koi Akötresie, ene la troa e me lapa mekune la Wesi Ula i Nyidrë.

Ame la itre atr ka atreine amë la huliwa ngöne la sipu göhnen, tre tro angatre lai a öhnyi madrine qa ngön. Öni William: “Masetang ekö la ketre ka amamai tulu göi aqane troa waipengöne la huliwa. Ka huliwa catre nyidrë, nge madrine la itre clients koi nyidrë, ke lolo la aqane huliwa. Ngo ame hë la kola fenesi la huliwa, atreine nyidrë troa canga nue la huliwa, me qëmeke pena kowe la hnepe lapa i nyidrë me itre huliwa i nyidrë koi Akötresie. Nge atre hi epun, celë hi ketre atr hnenge hna öhn, a ka madrine pala hi!”