HNENE la ketre ka ini inamacane hna hnyingëne kowe la itre thöth maine Iesu la ka sa la itre thithi së. Ala 800 angatr, nge isa hmi angatre kö; ngo 60% hi la ka mekune tune lai. Ame la ketre thöth, tre sija trije pi angeic la ëje i Iesu ngöne la pepa i angeic, nge kolo pë hë a cinyanyine ju ka hape, “Akötresie” la ka sa la itre thithi së.

Nemene fe la mekuna i epun? Tro sa thithi koi Iesu, maine koi Akötresie? * Tro sa pane ithanatane lo thithi hnei Iesu hna inine kowe la itretre dreng, matre hmaloi troa sa lai hnying.

Hnei Iesu hna qaja la nyine tro sa thithi kow, nge hnei nyidrëti hna trongën.

INI: Ame ju hi la kola sipone hnene la ketre atre drei Iesu ka hape, “Joxu fe, da ini huni jë troa thith,” öni Iesu jë hi ka hape: “E tro nyipunieti a thith, qajajë, ka hape, Tetetro i anganyihunieti.” (Luka 11:1, 2) Ame hmaca kö la Iesu a cile fë lo cainöje i nyidrë hune la wetr, hnei nyidrëti hna thuecatrene la itre atr troa thith. Öni nyidrë: “Thithiju kowe la Tetetro i ’ö.” Ke öni nyidrë: “Atengëtine kö la Tetetro i nyipunie la ewekë ka ijiji nyipunie e tha ase pete kö sipo anganyidë.” (Mataio 6:6, 8) Nge öni Iesu kowe la itretre dreng ngöne lo jidri tixenuë i nyidrë e celë fen: “Ame la nöjei ewekë asë tro nyipunie a sipone thei Tetetro, tro nyidëti a nunuë nyipunie ngöne la ëjeng.” (Ioane 16:23) Kolo lai a amamane ka hape, hnei Iesu hna ini së troa thith kowe la Tretretro i nyidrë, laka Tretretro së mina fe, ene Iehova Akötresie.—Ioane 20:17.

TULU: Ame la Iesu a thith, tre hnei nyidrëti hna thith tune lo aqane inine nyidrëti la itre atr; öni nyidrë: “Ini a ole koi cilie, Angakakati, Joxu ne hnengödrai memine la fen.” (Luka 10:21) Ame hë e ketre ijin, “Iesu a galajë draië, me ulatin, ka hape, Kakati fe, ini a olene koi cilie, ke hnei cilieti hna shama nie.” (Ioane 11:41) Ame hë la Iesu a troa mec, öni nyidrëti ngöne la thith: “Kakati fe, ini a nue la unge kowe la lue ime i cilie.” (Luka 23:46) Hnei Iesu hna amamai tulu koi së, la nyidrëti a thithi kowe la Tretretro i nyidrë, ene la “Joxu ne hnengödrai memine la fen.” (Mataio 11:25; 26:41, 42; 1 Ioane 2:6) Ngo hapeu, hnene kö la itretre dreng hna trongëne la aqane ini angatr hnei nyidrë?

Itre wiik thupene la Iesu a bëeke hnengödrai eë, kola icilekeu hnene la itre atr memine la itretre dreng. (Ite Huliwa 4:18) Itretre dreng pë hë a thithi jë. Ngo drei la hnei angatre hna thithi kow? “Angat’ a hëjë koi Akötesie ngöne la hni ka cas,” me sipo ixatua koi Nyidrë jëne “la ëjene la Hlue hmitöte i cilie Iesu.” (Ite Huliwa 4:24, 30) Haawe, hnene la itretre dreng hna xötrethenge la tulu i Iesu. Akötresieti la hnei angatre hna thithi kow, tha Iesu kö.

Kolo fe a mama e hnine la Tusi Hmitrötr la aqane thith i Paulo aposetolo ekö memine la itre sine tronge i nyidrë. Öni nyidrëti ngöne la ketre tus: “Nyiho a ole koi Akötesie la Tetetroti ne la Joxu shë Iesu Keriso, kolo pala hi a thithi thatraqai nyipunie.” (Kolose 1:3) Nge Paulo a qaja ka hape hnei nyidrëti hna “olene pala hi la nöjei ewekë asë koi Akötesie Tetetro ngöne la atesieti ne la Joxu shë Iesu Keriso.” (Efeso 5:20)  Kola mama e celë ka hape Paulo a thuecatrene la itre Keresiano troa “olene pala hi la nöjei ewekë asë koi Akötesie Tetetro,” ngo tro pe a thith ngöne la ëje i Iesu.—Kolose 3:17.

Haawe, tro ha mama la ihnimi së koi Iesu, e hne së hna thith thenge la aqane ini së hnei nyidrë, tune lo itre pane Keresiano ekö. (Ioane 14:15) Maine tro sa thithi koi Tretretro hmekuje hi, tro hë së lai a trotrohnine la aliene la hna qaja hnene la atre cinyihane la Salamo 116:1, 2, ka qaja ka hape: “Ini a hni Iehova qa ngöne la hnei nyidëti hna shamatine la aqane ewekënge . . . tro ni a hë nyidë ngöne la nöjei draing.” *