Ame ngöne la nöjei macatre, eahuni a fejan me hamën la itre Tusi Hmitrötr me itre itus ka nyimutre, itre milio la etrun. Eahuni fe a xup me fe la itre biero me itre hnë feja itus e cailo fen. Nyimutre catre fe la itre ekalesia ka icasikeu ngöne la itre uma ne hmi ka lolo, hna hëne itre ej ka hape Uma Ne Baselaia. Drei la ka nyithupene lai?

Hna sajuëne la huliwa hun e cailo fen hnene la itre ahnahna hna isa hamëne hnene la itre atr qa kuhu hni angatr. (2 Korinito 9:7) Ame lo 1879, hna qaja hnene la hnaaluene tane mekun ne la zonale celë, ka hape: “Eahuni a mejiune laka, IEHOVA a sajuëne la zonal, ‘La Tour de Garde de Sion’ [Hna hën enehila ka hape, Ita Ne Thup], nge maine aqane trongene hë lai, thaa tro jë kö a sipo me thele ixatua thei mus.” Hna tune pala hi enehila, laka, tha hne huni fe kö hna sipo koi mus.

Hna iupi fë mekötine la itre ahnahna kowe la itre biero ne la filial maine hna kuiëne pena hnine la itre kees e hnine la itre Uma Ne Baselaia. Tha ka hle mani kö hun, me athipi mani, nge tha hna nyithupei huni kö memine la eahuni a tro fë la itre itus. Tha hna nyithupei huni kö troa cainöj, me ini e hnine la ekalesia, maine troa ixatua xupe la itre hnë hmi hun. Ase hë Iesu lo qaja ka hape: “Hna kapa gufane hnei nyipunie, hamëne gufane pi.” (Mataio 10:8) Tha ka huliwa manie kö la itre ka catre cainöj, memine la itre ka huliwa hnine la itre filial me ngöne la hnalapa ne xomi meköt, tune mina fe la Lapa Ne Xomi Meköt ne la Itre Temoë i Iehova, tha hna nyithupei angatre kö.

Hetrenyi fe la itre keesi hna hnëkën amë hë thatraqane la itre trejin ka eatr hnene la itre hulö. Ka madrine catre la itre pane Keresiano ekö troa ixatua ngöne la kola traqa la itre jole ka tru kowe la itre trejin. (Roma 15:26) Eahuni mina fe enehila a xatuane la itre hna lep hnene la itre hulö. Kola xupe hmaca la itre uma i angatr, me itre hnë hmi, me hamë xen, me iheetr, me drösinöe.