“HNAUËN la kola traqa koi ni la ewekë celë? Nga eka Akötresie?” Celë hi lue aqane hnyinge i Sidnei, truedri foa lao macatre i angeic, nge ka mele e Brésil. Hna eatr angazony ngöne la angeic a sië piscine me ucic qa hune lai toboggan. Angeice pë hë enehila hune ikatr, tha drenge hë la lue ca.

Ame la easa eatr me akötr hnene la itre sine mec, maine kola meci pena la ketre sinee së, me kola lepi së hnene la itre hulö tune la itre wene ka tru, maine itre isi pena, canga tro hi sa iananyi me Akötresie. Tha sesëkötre kö së. Hna lepi Iobu ekö hnene la itre hulö, kola traqa itrai. Ame la engazon, hnei angeic pena ha hna upezö Akötresie, me qaja ka hape: ‘Ini a xëwe koi cilie, nge tha drei ni kö hnei cilie ; ini a cile nge hnehengazo ni kö hnei cilie. Cilieti pena a ujë me axösisi ni; cilieti a weji ni fë la ime i cilie ka catr.’—Iobu 30:20, 21.

Thatre kö Iobu la qaane la itre hulö memine la kepin matre kola traqa koi angeic la itre ewekë cili. Eloine pe, tre, hnei Tusi Hmitrötr hna amamane hnyawa koi së la kepine matre traqa pi la itre ewekë cili, memine fe la aqane tro sa ujë ngöne la itre ijine cili.

Tusi Hmitrötr a qaja koi së la pengöi Akötresie, me hape: “Pexeje la huliwa; ke meköti asë la ite jë i nyidë; Akötesie ka nyipici, nge pë engazon, nge meköti me uthautha nyidë.” (Deuteronomi 32:4) Matre tune kaa, meköti kö troa qaja ka hape ame Akötresieti ke, ka “meköti me uthautha nyidë”, nge Nyidrëti pe a nue la itre atr troa akötr, maine axulune pena la itre hulö matre troa nyithupene la itre ngazo hna kuca, maine tupathe pena la lapaune i angatr?

Ngo kolo pe a qaja hnei Tusi Hmitrötr, ka hape: “The tro kö kete ate a qaja e kola tupathi angeic, ka hape, Hna tupathi ni qa thei Akötesie; ke tha’ teine kö troa tupathi Akötesie hnei ngazo, kete tha hnei nyidëti kö hna tupathi kete ate.” (Iakobo 1:13) Easa atre la hna qaja hnei Tusi Hmitrötr, laka, ame ngöne la qaan, ka pexeje la aqane xupe Akötresieti la atr. Lolo la aqane nyi göhnene Nyidrë la lue pane atr, ene Adamu me Eva. Hnei Nyidrëti hna hamën asë la nöjei ka nyipiewekë thatraqane la mele i nyidro, nge nyidroti a kuca la ketre huliwa ka lolo catr. Hnei Akötresieti hna qaja koi nyidroti ka hape: “Manapi me hate, me atiqane la fene hnengödrai, me xom’ acon’ ej.” Thatreine kö tro nyidroti a hace, ke, ase hë Akötresieti hamën asë la itre loi koi nyidro.—Genese 1:28.

Ngo iananyi catr memine la mel enehila. Kola mama ngöne la aqane trongene la mel, laka, hna akötre pala hi me awe la itre atr. Kola aejëne lo hna qaja ka hape: “Kola awe me thë la ite ewekë hna xup’ asë uti hë enehila.” (Roma 8:22) Hnauën matre traqa pi kowe la mele cili?

Maine easa ajane troa trotrohnine la kepine matre easa akötr, loi e tro sa pane bëeke hmaca kowe la qaan. Hna amenu Adamu me Eva hnene la ketre angela ka icilekeu, Satana Diabolo la ëjen. Hnei nyidroti hna thipetrije la itre hna amekötine hnei Akötresie göi loi me ngazo. Hna nyihatren la itre hna amekötine cili hnene la wathebo hnei Akötresieti hna hamëne koi nyidro, hna hape, tha tro kö nyidroti a xeni wene “la sinöe ne ate hmekune la loi me ngazo.” Hnei Diabolo hna qaja koi Eva ka hape, maine tha tro kö nyidroti a drei Akötresie, tha tro jë kö nyidroti lai a mec, kösë angeice hi lai a jelethoi Akötresie. Satana fe a upezö Akötresie ka hape, hnei Nyidrëti hna juetrëne kowe la itre atr la mekun, laka, atreine fe hi angatr troa hane atrehmekune la loi qa ngöne la ngazo. (Genese 2:17; 3:1–6) Kösë Satana fe a qaja ka hape, tro kö a lolo catr la mele ne la atr, e tha hna lapa kö fene la musi Akötresie. Mama pi hi la ketre hnyinge ka nyipiewekë catr, hna hape: “Meköti kö tro Akötresieti a mus?”

Hnei Diabolo fe hna amexej la ketre mekun. Hnei angeic hna jelengazone la itre atr ka hape, angatr a nyihlue i Akötresie göi troa kapa pala hi la itre sipu aja i angatr. Öni Diabolo e qeje Iobu koi Akötresieti ka hape: “Hape u, tha hnei cilieti hna ekö hage xöteithi angeic, me xöteithe la hnalapa i angeic, me xöteithe la nöjei ewekë i angeic’ asë ? . . . Ngo loi pe xejëjë enehila la ime i cilie, me lepe la nöjei ewekë asë i angeic, nge tro angeic’ a jele ngazo cilie xajawa i cilie.” (Iobu 1:10, 11) Ngacama kola qeje Iobu hnei Satana, ngo angeice hi lai a qaja la itre atr asë, laka, angatr a nyihlue i Akötresie, ngo göne hmekuje kö la itre sipu aja i angatr.

Nemene la aqane tro Akötresieti a kuca matre apatrene trije la akötr? Ka thatrehmekune la inamacane i Akötresie, nge Nyidrëti hi la ka troa nyinyin la itre jol. Hane  hi lai nyin hne së hna treqen! (Roma 11:33) Hnei Nyidrëti hna nue tro la atr a ketre sipu mus, nge tro kö a ketre mama e cili la ka ijij troa mus.

Mama hnyawa ha enehila jëne la itre ewekë ka traqa kowe la atr ka hape, thatreine kö tro angeic a sipu mus. Pëkö tingeting, me lapa xetietë, me madrin fene la musi ne la atr. Angatre hi la atrekë zön la kola tro ngazo catre la ihnadro. Kolo hi lai a acatren la hna qaja hnei tusi Hmitrötr, ka hape: “Tha qâ i ate troa amekötine la ite hna feke ca hnei angeic.” (Ieremia 10:23) Tro hmekuje hi la aqane musi Akötresie a acile hutine la tingeting me madrin, me mele ka loi kowe la atr, pine laka, sipu aja i Nyidrëti hi lai.—Isaia 45:18.

Nemene la aqane tro Akötresie a xometrongën la atr matre troa aejën elany la aja i Nyidrë? Mekune hi së lo aqane inine Iesu la itretre drei nyidrë troa thith, öni nyidrë: “Epi traqa pi la Baselaia i Cilie. Epi tro fe a eje la aja i Cilie e celë fen tune e koho hnengödrai.” MN (Mataio 6:10) Ejehi laka, tro kö a traqa la ijine tro Akötresieti a apatren, jëne la Baselaia i Nyidrë la nöjei akötr ne la fen. (Daniela 2:44) Pë hmaca kö jiin, sine mec, me mec. Ame kowe la itre atr ka puafala, Tusi Hmitrötr a qaja ka hape, tro Akötresieti a “amelene la ate pë ewekë, ate teije koi nyidë.” (Salamo 72:12–14) Ketre tune fe kowe la itre ka wezipo, hna thingehnaeane hë hnei Tusi Hmitrötr, ka hape: “Tha tro kö a qaja hnene la ate lapan’ eje, ka hape, Ini a mec.” (Isaia 33:24) Nge ame göi itre ka meci hë, ke, tha hna thëthëhmi angatre kö hnei Akötresie. Öni Iesu lo ka hape: “Calemi hë la ijine tro la nöjei ate ngöne la ite hua a denge la aqane ewekë i angeic, me tropi.” (Ioane 5:28, 29) Drei la itre hna thingehnaeane ka nyipi lolo!

Semidrine hë lao macatre thupene la hna eatr hnei Sidnei, angeic a qaja ka hape: “Tha ase kö ni hane upezö Iehova la eatreng, ngo nyipici laka, ame lo xötrei hnenge hna pane nango hace ke zöi Nyidrë. Hetrenyi la itre drai ne eni a nango hleuhleu me treij, ngöne la eni a mekune la meleng laka sinatr pë hë ni. Ngo jëne la Tusi Hmitrötr, eni ha trotrohnine laka, ame la eni a eatr, tre, tha Akötresieti kö la atrekë zön, nge tha Nyidrëti kö a nyithupene koi ni. Tune la hna qaja hnei Tusi Hmitrötr, ‘ame la ijine memine la ewekë ka xulu, te, kola traqa koi së asë.’ Ame la ka xatua ni troa cile catr, ke, hnenge hna thithi koi Iehova me e lapane la Tusi Hmitrötr.”—Ate Cainöj 9:11; Salamo 145:18; 2 Korinito 4:8, 9, 16.

Maine tro sa lapa mekune la itre kepine matre Akötresie a nue la akötr, memine la aqane tro Nyidrëti elanyi a apatren la itre ethan, tro ha xatua së matre tha tro kö sa hace me upezö Akötresie. Xecie hnyawa koi së laka “Nyidëti la ate nyi june koi angete thele catë nyidë.” Pëkö atr ka troa hace hni me hleuhleu, e hna catre lapaune koi Nyidrë memine la Hupuna i Nyidrë.—Heberu 11:6; Roma 10:11.