Hna hnaho ni ngöne la ketre götran ne Pologne, nge tha nanyi kö la götrane cili qa Alema. Eni a mele e nyipine la itre hna xulu me itre hnë axö öni, matre tingeting la meleng e cili. Hnene la kemeng me thineng hna ithuecatr koi ni troa ketre atr ka lolo, troa ini hnyawa, matre hetre huliwa ka loi elany.

Hna nyiqane traqa la itre jol koi ni, lo eni a hane ini ngöne université ne Wrocław. Hnenge hna lapa iananyi me kaka me nenë matre, hnenge hna ce tro memine la itre xa thöth ka thiina ka ngazo. Ame ni, ka pi fenibalo catre ni, ngo hnene laka hna ajojezi ni hnene la itre sine ce elong, haawe hazenge hë enehila la fenibalo. Ame la ekip hnenge hna lapa pi goeën e elo, ke, ekip qa Warsaw, matre ame la jëi angatr, ke jënge fe hi. Ketre, ame ngöne la itre xa jëne tronge hun, ka hmo pala hi eahuni hnei ka haitr, me xomi dorog, me itö isi memine la itre atr ne la ketre ekip. Eni a hane ujë tune lai matre troa thëthëmine la itre jol ngöne la meleng o drai, ngacama atre hi ni laka, troa hetre ethan koi ni ngöne la hna ini.

Ame eni memine la itre sine celong, ke ajane catre hun troa tro kowe la itre hnë fia jidr. Nge e isi hi, eahuni fe e kuhu hnin. Hna anyimua othi ni hnei polis, ngo atreine kö ni kuca matre, tha tro kö a hetre ketre ewekë ka troa ajolë ni memine la mus. Ame itre xa ijin, eni a lii mani koi angatr matre troa nue ni. Ame koi ni ke kösë mele hi lai. Ngo atre hi ni laka ka ngazo la hnenge hna kuca. Matre eni a lapa tro e nöjei Sabath troa hmi, göne hi matre troa lapa hnyawa la mekuthetheung.

Ame ngöne lo macatre 2004, hnene la lue ka Anyipici Iehova hna fenafena la qëhnelöng, nge hnenge hna ce ithanatane la Tusi Hmitrötr me nyidro. Pine laka atre hnyawa ha ni la pengöne la nyipi Keresiano, haawe, kolo ha huliwa la mekuthetheung. Atre hnyawa hi ni laka, loi e tro ni a nue la ka haitr me triji dorog me nue la itre sine celonge ka aiananyi ni qa ngöne la itre trepene meköt i Iehova. Ketre, atre hi ni laka loi e tro ni a saze la itre thinang, tune la troa canga elëhni. Ngacama öhne hi ni la enyipiewekën la troa saze, ngo ame pe eni palahi a kuca la itre huliwa ka ngazo cili.

Hna saze la meleng ngöne lo jidri ne eni a isi memine lo eitr lao nekö trahmany. Mekune pala hi ni lo eni a meköle kuhu gojeny, nge kola jei ni me feni ni me waja la heng. Ase hë ni mekune ka hape eni ha troa mec, eni a thithi jë me hape: “Menu hë ni Iehova ke, tha hnenge kö hna wangatrune hnyawa la Wesi Ula i Cilie. Ngo maine tro ni a mel, eni a qaja hnyawa koi Cilie ka hape, tro ni a inine la Tusi Hmitrötr memine la Itretre Anyipici Iehova nge tro hë ni a saze la aqane meleng.” Sesëkötre  pi kö ni laka mele ju kö ni. Matre ame hë lo itre hnenge hna qaja, eni ha troa eatrën. Haawe, eni hë a hane inine la Tusi Hmitrötr.

Ame ngöne lo macatre 2006, hnenge hna tro Angleterre. Nge ame la hnenge hna ajane troa traqa kow, ke ene la troa thele mani göne la troa bëeke a tro Pologne matre nyipune la ining me kapa fe lai pepa, diplôme de droit. Hnene laka eni palahi a inine la Tusi Hmitrötr, haawe hna ketri ni hnene la ketre xötr. Hna cinyihane hnei Paulo aposetolo ka hape: “Ini a tha nyipi ewekëne la nöjei ewekë asëjëihë qa ngöne la esisitia ne la wangate hmekunyi Keriso Iesu Joxung ; göi nyidëti hnenge hna tha nyipi ewekëne la nöjei ewekë asëjëihë, nge mekune ni laka ite ka sisi it’ej, mate hetenyi hë ni Keriso.” (Filipi 3:8) Casi la pengöng me Paulo, laka hna ini angeic la itre wathebo nge ketre atr ka elëhni fe angeic. (Ite Huliwa 8:3) Ngo, hnei angeic hna öhne la nyipi aqane mel, ene la troa nyihlue Akötresie me kuca asë la hnei angeic hna atreine matre troa nyitipu Iesu. Ame la eni a lapa mekune la tulu i Paulo, eni hi lai a wangatrehmekune laka, ame la troa hetre huliwa hna nyithupene hnyawa me troa elëhni, tre, tha ka hamë madrine kö. Pine laka xecie hnyawa koi ni laka hnei Paulo hna saze, haawe ijije fe hi, tro ni a hane saze. Celë hi matre eni pë hë mekune ju troa lapa e Angleterre me nue pe lo mekune troa tro Pologne göi troa ini.

Ame la eni a atre Iehova trootro, haawe kolo fe ha tru trootro la ajang troa easenyi koi Nyidrë. Hna ketri ni hnene lo hna thingehnaean hnei Iehova, laka tro Nyidrëti a nue la ngazo hna kuca hnene la itre ka ajane troa saze hnyawa la mele i angatr. (Ite Huliwa 2:38) Nge ame la eni a lapa mekun la hna qaja ngöne 1 Ioane 4:16, ka hape “Akötesieti la ihnim,” eni hi lai a nyiqane atrehmekune la kepine matre Akötresie a methinëne la itre ka isi.

Eni a haine la aqane lolone la thiina ne la Itretre Anyipici Iehova. Mama hi laka, angatr a kuca la hnei angatr hna atreine matre troa trongëne la itre trepene meköt qa hnine la Tusi Hmitrötr. Eni a hane pi ce memine la itre trejine celë. Thupene la itre akötr me itre ewekë hnenge hna saze ngöne la meleng, eni a hane xome la bapataiso lo macatre 2008 nge ketre atre Anyipici Iehova ha ni.

Hnei Tusi Hmitrötr hna saze la meleng qa ngöne la itre thiinang ene la troa pi hun, me pi isi, me xomi dorog, me hmo hnei ka haitr, me ajane catrën la fenibalo, matre tro pena ha ketre atr ka nyihlue i Akötresie, ke aja i Nyidrë troa inine la Tusi Hmitrötr memine la itre atr. Eni palahi a goeë fenibalo ngo atre hi ni laka hetre ka nyipi ewekë kö hune lai.

Ame hë enehila, eni a madrine pine laka faipoipo hë ni me Esther, ketre hlue i Iehova. Tru catre la madrine i nyiho troa inine la Tusi Hmitrötr kowe la itre atr ka qene Polonais e celë e Angleterre. Eni petre hi la a melëne la nyipi madrin, ke lapa hnyawa ha la mekuthetheung nge hetre aliene hë la meleng.