Hapeu, ka aluzi traeme kö la troa e la Tusi Hmitrötr? Maine pena ka hetre eloine ej? Nemene la thangan e tro epuni a e la Tusi Hmitrötr? Hnene hi la aqane nyiqane e i epun la Tusi Hmitrötr. Tro sa pane ce wange la nyine tro epuni a kuca, matre troa akökötrene la aja memine la madrine i epun troa e la Tusi Hmitrötr.

Troa iëne la ketre qene hlapa hna ithanatan hnei nöjei atr enehila. Maine epuni a e la ketre itusi ka jol troa trotrohnin, nge ka hetre itre hnaewekë hnei epuni hna thatre, ke, tha tro jë kö epuni lai a madrine troa e. Celë hi matre, loi e tro epuni a iëne la Tusi Hmitrötr ka hmaloi troa trotrohnin, matre troa ketr la hni epun. Nyipiewekë fe tro epuni a thele la ketre Tusi Hmitrötr hna ujëne hnyawa. *

Troa huliwane la itre jia ne huliwa ka hnyipixe. Tha ngöne itus hmekuje kö la Tusi Hmitrötr, ngo hetrenyi mina fe enehila ngöne itre tablette. Ijije hi troa e la Tusi Hmitrötr ngöne Ëternet, maine troa télécharger ngöne ordinatör me tablette, maine mobilisi pena. Ame ngöne la itre xa Tusi Hmitrötr, tre, hetre itre xa ixatua ka aijijë epun troa xome la itre xa xötr ka ihmeku memine la xötr hna e, me wange la eisapengönene ngöne la itre xa qene hlapa. Maine aja i epun troa dreng la kola e la Tusi Hmitrötr, ijiji epuni troa télécharger la Tusi Hmitrötr hna enregistrer. Nyimutre la itre atr ka drenge trongëne la Tusi Hmitrötr, ngöne la angatr a xomi kar, maine wasi mano, maine kuca la ketre ewekë pena. Pi tro kö epuni a hane kuca tune lai?

Troa huliwane la itre jia nyine ini tus. Ame la itre jia nyine ini tus, tre, itre ej a troa xatua epuni troa kepe thangane la epuni a e la Tusi Hmitrötr. Hetrenyi la itre map ne la itre nöj hna qaja e hnine la Tusi Hmitrötr, ka troa xatua epuni troa atre la itre götran hna qaja ngöne la epuni a e, me atre la itre ewekë ka traqa ngöne la itre götrane  cili. Ijije hi tro la itre tane mekun, tune la itre xan e hnine la zonal celë, memine fe la götrane la sit jw.org hna hape, “LA BIBLE ET VOUS”, a xatua epuni troa sine thel la aliene la itre xötr ne la Tusi Hmitrötr.

Troa anyimua aqane nyiqane e. Maine ka jole troa aca e la Tusi Hmitrötr qa ngöne la qane uti hë la pun, ma ka hmaloi hi tro epuni a nyiqan hnene la ketre tus hnei epuni hna ajane troa e, matre troa aciane la aja troa e la Tusi Hmitrötr. Maine aja i epuni troa atrepengöne hnyawa la itre atr hna qaja e hnine la Tusi Hmitrötr, loi e tro epuni a tupathi troa e asë la itre xötr ka qaja la hna melën hnene lai atr. Hane hi la aqane troa nyiqane e la Tusi Hmitrötr ngöne la hna eköhagen hna hape, “ Sine Thele Jë La Tusi Hmitrötr Matre Troa Atre La Itre Atrene Ej.” Maine jë epuni a ajane troa e la Tusi Hmitrötr nge troa iuji epuni hnene la itre tane mekun, maine pena thenge la aqane trongene la itre ewekë ka traqa. Hapeu, ijiji epuni kö troa hane tupath la ketre aqane troa nyiqane e la Tusi Hmitrötr?