ENOKA la ketre atr ka mel ekö. Maine jë ka jole koi së troa mekun, ngo ame la eqeane la mele i angeic, tre, traqa jë kö koi 365 lao macatre; nge qea catre kö la etrune la itre drai ne mele i angeic hune la mele ne la atr enehila! Ngo tha qatre catre petre kö angeic ngöne lo ijine cili. Ame ngöne lo ijine cili laka, a 5 000 hë lao macatre, tre, ka qea catr la mele ne la itre atr ekö hun enehila. Ame Adamu, lo pane atr, ke, sikisi hadredre hë lao macatre i angeic lo kola hnaho Enoka, nge thupene la 300 lao macatre, kolo hi a mec hnei Adamu! Ala nyimu la itre matra i Adamu ka mel aqeanyi hui angeic. Celë hi matre, ame la Enoka a 365 lao macatre, ka egöcatre pala hi angeic, ceitune me ketre atr ka troa mel aqeanyi pala kö koi nyimu macatre. Ngo, tha hna traqa tune ju kö koi Enoka.

Hnei Enoka hna cil kowe la ketre itupath ka tru. Pane mekune jë, angeic a nyenyape me zae, nge thatreine kö tro angeic a thëthëmine la aqane ujë ne la itre atr kowe la maca i Akötresie. Kola mama ngöne la aqane elëhni angatr. Angatr a methinë angeic. Hnei angatr hna thipetrij la maca i Enoka me xelene la Akötresieti ka upi angeic. Thatreine kö angatr troa icilekeu memine la Akötresi Enoka, ene Iehova, ene pe angatr a icilekeu me angeic! Maine jë hnei Enoka hna mekune ka hape, ma tro jë kö angeic a iöhnyi hmaca memine la hnepe lapa i angeic. Hapeu, hnei Enoka kö hna mekune la föe i angeic memine la itre neköi angeic jajiny, maine Methusela, lo neköi angeic trahmany, maine pena lo api angeic Lameka? (Genese 5:21-23, 25) Matre nemene la ka troa traqa koi angeic?

Enoka la ketre atr ka ketrepengön e hnine la Tusi Hmitrötr. Kolo hi a mama la pengöi angeic ngöne la köni hnepe götran ne la Tusi Hmitrötr. (Genese 5:21-24; Heberu 11:5; Iuda 14, 15) Ngo ame pe, tru hnei ithuemacanyi hna hamën ngöne la itre xötre celë, matre ijije troa qaja ka hape, ketre tulu angeic ngöne la aqane catre lapaun. Hapeu, epuni kö a thupëne la hnepe lapa i epun? Hnei epuni kö hna hane catre isi, pine la itre ewekë ka meköt? Maine eje hi, ijije hi tro epuni a hane xomi ini qa ngöne la aqane lapaune i Enoka.

Ka ngazo catre la fen ngöne lo lai ijine i Enoka. Kolo hnaasevenene xötratr thupe i Adamu. Nyipici laka, tha nanyi kö qa cili lo kola aluzin hnei Adamu me Eva la mele ka pexej. Celë hi kepine matre qea catre pala kö la hna mel hnene la itre atr. Ngo ame pe, ngazo catre hë la itre thiina i angatr memine la aqane imelekeu i angatr me Akötresie. Ase së hë haöthe la fen hnene la iakötrë. Kola mama la thiina cili ngöne lo hnaaluene xötratr, lo Kaina a humuthi Abela trejine me angeic. Hnene la ketre matra i Kaina hna pi mama fë laka, ka iakötrë catre kö angeic hui Kaina! Ame ngöne lo hnaakönine xötratr, tre, hna kuca pena la ketre ewekë ka ngazo. Hnene la itre atr hna nyiqane hëne la ëje i Iehova, ngo tha göi troa hmi kö koi Nyidrë. Hnei angatre hna huliwan angazone la ëje ka hmitrötre i Akötresie, nge tha hna metrötrëne kö hnei angatr la ëje i Nyidrë.—Genese 4:8, 23-26.

Ketre aqane hmi lai ka ngazo hna majemine kuca ngöne lo hneijine i Enoka. Pine laka tru hë Enoka, ka nyipiewekë catr tro angeic a axecië mekun. Tro kö angeic a xötrethenge la ka ala nyimu ngöne la hneijine i angeic? Maine thele pena la nyipi Akötresie, ene Iehova lo atre xupe la hnengödrai memine la fene hnengödrai? Hna ketr la hni Enoka ngöne lo angeic a atre ka hape, hna humuthi Abela ke, hnei angeic hna hmi koi Iehova thenge la aja i Nyidrë. Hnei Enoka hna thele troa mele tui Abela. Kola qaja ngöne Genese 5:22 ka hape: “Hnei  Enoka hna ce trotro me Akötesie.” Lolo la aqane qejepengöi Enoka laka, ketre atr ka nyi hlue i Akötresie ngöne la fen ka ngazo. Angeice hi la pane atr hna hane qejepengöne tune lai hnene la Tusi Hmitrötr.

Kolo fe hi a qaja hnene la xötr ka hape, hnei Enoka hna ce trotro pala hi me Iehova thupene la hna hnaho Methusela, neköi angeic trahmany. Haawe, easa öhne laka, hetre hnepe lapa i Enoka lo angeic a 65 lao macatre. Hetre föi angeic, ngo tha hna qaja pe la ëje i nyidro ngöne la Tusi Hmitrötr, nge tha hna qaja fe kö la etrune la ‘ite neköi angeic trahmanyi me jajiny.’ Maine hnëqa ne la ketre kem ka nyihlue i Akötresie troa hian me xatuane la hnepe lapa i nyidrë, haawe, loi e tro nyidrëti a thele jën troa inine la hnepe lapa i nyidrë ngöne la jë i Akötresie. Trotrohnine hi Enoka la aja i Akötresie, ene la troa mele nyipici kowe la ifëneköi angeic. (Genese 2:24) Nge hnei angeic hna catre inine la itre neköi angeic matre troa atrepengöi Iehova Akötresieti hnyawa. Nemene hë la thangane lai?

Pëkö ithuemacanyi göne lai e hnine la Tusi Hmitrötr. Pëkö hna qaja hnei Tusi Hmitrötr göne la lapaune i Methusela, neköi Enoka, lo atr ka mel aqeanyi catre kö hna qaja hnei Tusi Hmitrötr. Hnei angeic hna mec ngöne lo ijine Iwë Atraqatr. Ame pe, ke, hnei Methusela hna hnaho Lameka, lo neköi angeic trahmany. Hnei Lameka hna ce mel memine la qaqa i angeic Enoka. Nge ame la angeic a tru tre, hnei angeic hna mel cememine la lapaune ka catr. Hnei Iehova hna upi angeic troa perofetane la ketre ewekë göi Noa, lo neköi Lameka trahmany, nge hna eatr lai lo ijine Iwë Atraqatr. Tui Enoka lo qaqa i angeic, Noa hi la ketre atr ka ce trotro me Akötresie. Tha iöhnyi ju kö Enoka me Noa. Ngo hnei Enoka pe hna nue la ketre edrö ka tru alameken. Maine jë, hnei Noa hna kapa la edrö cili qaathei Lameka, keme i angeic, maine qathene la qaqa i angeic Methusela, maine pena qathene la keme i Enoka, Jared, ka mec nge 366 lao macatre i Noa.—Genese 5:25-29; 6:9; 9:1.

Pane mekune jë la eisapengöi Enoka me Adamu. Hnei Adamu, atr ka pexej, hna kuca la ngazo xajawai Iehova, matre hamëne pi kowe la itre matra i angeic la tha idrei me akötr. Ngo ame pena ha Enoka, ketre atr ka tha pexeje kö, tre, hnei angeic hna ce trotro me Akötresie, matre amamane pe kowe la itre matra i angeic la ketre tulu ne lapaun. Ame la kola mec hnei Adamu ke, kola 308 lao macatre i Noa. Hapeu, hnene kö la hnepe lapa i Adamu hna treije pine la xötrapane i angatr? Thatre kö së. Ngo ame pe, “hnei Enoka hna ce trotro me Akötesie.”—Genese 5:24.

Maine aja i epun troa hane hetre hnepe lapa, hane hi la itre ini hnei epun hna troa xom qa ngöne la lapaune i Enoka. Nyipiewekë tro epuni a nyihnyawane la hnepe lapa i epun, ngo ame pe, sisitria catre kö la aqane imelekeu i epun me Iehova. (1 Timoteo 5:8) Tha tro kö itre ej a mama hmekuje hi ngöne la hna qaja, ngo loi fe e troa kuca. Maine tro epuni a ce trotro me Akötresie tui Enoka, me trongëne la itre trepene meköti Nyidrë ngöne la mele i epun, haawe, epune hi lai a nue kowe la hnepe lapa i epun la ketre edrö ka tru alameken, ene la troa ketre tulu ka loi nyine troa xötrethenge.

Maine jë hnei Enoka hna mekune ka hape, angeice casi hi la ka lapaun ngöne la fene ka ngazo, matre hleuhleu pi hë angeic. Ngo hapeu, hnei Iehova kö, Akötresi angeic, hna hane meku angeic? Eje hi. Ame ngöne la ketre drai, hnei Iehova hna ithanata memine la hlue i Nyidrë. Hnei Akötresieti hna ahnithe la ketre maca koi Enoka matre troa amelene la itre atr ne la hneijine i angeic. Hnei Nyidrëti hna acili Enoka matre troa hane perofeta, nge celë hi pane maca lai ka mama e hnine la  Tusi Hmitrötr. Easë hi lai a atre ke, hnei Iuda, ketre trejine me Iesu, hna cinyihane la itre hna perofetane cili hnei Enoka, ngöne la itre hadredre lao macatre thupen. *

Nemene la hna perofetane hnei Enoka? Öni angeic ka hape: “Hana wang, tro ha hlepëti la joxu ce memine la nöjei ate hmitöte i nyidë ka tha nune e, troa nyi thupene kowe la nöjei ate asëjëihë, me troa amamane kowe la nöjei ate asëjëihë angete thina ka tha ijiji Akötesie la nöjei huliwa asëjëihë ka tha ijiji Akötesie hnei angate hna kuca tha ijiji Akötesie, memine la nöjei tenge ewekë ka calogit, lo hna qaja göi nyidë hnene la nöjei ate ka ngazo me thina ka tha ijiji Akötesie.” (Iuda 14, 15) Tro epuni a canga öhne laka, ame la aqane ithanata i Enoka tre, kösë pi lo ase hë Akötresieti eatrëne la hna perofetan. Celë hi ketre tulu thatraqane la itre xa nyine perofetan e thupen. Ame la mekune ka sisitria, tre, tro la perofeta a qaja la ketre ewekë ke, ka xecie hnyawa koi angeic laka, troa eatr. Celë hi matre angeic a qejepengöne lai ceitune me ketre ewekë ka traqa ha!—Isaia 46:10.

Nemene jë la aqane tro Enoka a tro fë lai maca, maine jë hnei angeic hna cainöj kowe la nöjei atr ka pi drei angeic? Kola mama koi së la ecatrene la ithuemacanyi cili laka, a foa jë kö lao qaja angeic la hnaewekë hna hape, “itete thina ka tha ijiji Akötresie”, matre troa qaja amamane kowe la itre atr la aqane ujë me huliwa i angatr ka ngazo. Ame la hna perofetan, tre, kola ahmekëne la nöjei atr ka hape, ngazo catre hë la fen qane lo kola iupi qa Edena. Tro la fene cili a qëmeke kowe la ketre hulö atraqatr ngöne lo ijine tro Iehova a traqa memine la “nöjei ate hmitöte” i Nyidrë, ene lo itre angela ka catr, matre troa apatrene la fen. Hnei Enoka hna catr tro fë la maca cili, ngacama angeice casi hi! Maine jë hnei Lameka hna öhne la aqane catre ne la qaqaa i angeic, ngacama tru la xou i nyidrë. Maine eje hi lai, trotrohnine hi së la kepin.

Ijije hi tro la lapaune i Enoka a xatua së troa isa thele ka hape, easë kö a goeëne la fen tune la aqane goeëne Akötresie. Ame la maca ne iameköti hna tro fë ekö hnei Enoka, tre ka ceitune hi memine la maca hna tro fë enehila. Tune la hna qaja ha hnei Enoka, hnei Iehova hna axulune la Iwë Atraqatr matre troa apatrene la fene ka ngazo ngöne lo ijine i Noa. Nge ame hi la aqane apatrene la fen ekö tre, kolo hi lai a amamane la aqane troa apatrene la fen elany. (Mataio 24:38, 39; 2 Peteru 2:4-6) Ketre tune ekö, ka hnëkë Akötresieti enehila memine la itre meriade lae angela ka hmitrötr, matre troa amekötine hmaca la fene ka ngazo. Loi e tro së isa ala cas a hnin la maca i Enoka me ce thawa ej me itre xan. Maine jë tro la itre hnepe lapa së me itre sinee së a ananyi së. Nge ame itre xa ijin, nango hleuhleu pi hë së ke, easë cas. Ngo pine laka, tha ase pi kö Iehova nuaxöji Enoka ekö; ketre tha tro jë fe kö Nyidrëti a nuaxöj la itre hlue i Nyidrëti enehila!

Nemene la pun koi Enoka? Kösë ka ketrepengöne pi kö la meci angeic hune la mele i angeic. Kola qaja hnene la tusi Genese ka hape: “Hnei Enoka hna ce trotro me Akötesie ; nge pateju hi angeic, ke hna xomi angeice hnei Akötesie.” (Genese 5:24) Nemene la aqane xomi Enoka hnei Akötresie? Hnei Paulo aposetolo hna qaja e thupen ka hape: “Hnene la lapaune hna xomi Enoka mate tha tro kö angeic’ a öhne la mec ; ame hna tha öhnyi angeic, ke hnei Akötesieti hna xomi angeic ; ke hna anyipici angeice lo tha hna xomi angeice pete kö, laka ate amadi Akötesie.” (Heberu 11:5) Nemene la aliene la Paulo a qaja ka hape, “hna xomi Enoka mate tha tro kö angeic’ a öhne la mec”? Hnene la itre xa ka ujëne la Tusi Hmitrötr hna qaja ka hape, hnei Akötresieti hna xomi Enoka a tro hnengödraieë. Ngo tha eje kö lai. Kola amamane hnei Tusi Hmitrötr ka hape, Iesu Keriso hmekuje hi la pane atr hna amelene hmaca a tro koho hnengödrai.—Ioane 3:13.

 Nemene la aliene la kola qaja ka hape, hna “xomi” Enoka matre tha tro kö angeic a “öhne la mec”? Maine jë hnei Iehova hna amekölë Enoka qa ngöne la mel kowe la mec, matre tha tro kö angeic a drenge la itre akötre ne ej. Ngo, hnei Enoka hna pane “anyipici angeice lo tha hna xomi angeice pete kö, laka ate amadi Akötesie.” Tune kaa? Qëmekene tro angeic a mec, maine jë hnei Akötresieti hna aijijë Enoka troa meköle goeëne la fen hna aparadraison. Ame pë hë la Enoka a meköl ngöne la mec, atre hë angeic ka hape, hna kepe angeic hnei Iehova. Ame ngöne la kola qeje Enoka me itre xa trahmanyi me föe ka lapaun, öni Paulo aposetolo e qeje angatr ka hape: “Meci asë hë angate lai ngöne la lapaun.” (Heberu 11:13) Thupene lai, maine jë hna thel la ngönetrei Enoka hnene la itre ithupëjia me angeic, ngo ‘tha öhne ju kö’ angatr. Maine jë hnei Iehova hna juetrën, matre tha tro kö angatr a huliwan menun ej, maine nyi idolane pena hnene la hmi ka thoi. *

Pine laka, atre hë së la hna qaja hnei Tusi Hmitrötr, haawe, pane mekune jë së la aqane tro Enoka a mec, maine tha xomi angeice ju hnei Iehova. Hane hi la itre ewekë ka traqa, ngo the thëthëhmine kö ka hape, ketre aqane kuca hi lai. Enoka a kötre mel, nge kucakuca catre angeic. Kola qanangazo angeic hnene la itre ka icilekeu me angeic, ke, xele angatr ma drenge la maca ne iameköti angeic. Öhne jë hi Enoka la ketre hnë zae, matre lapa ju hi angeic e cili ngöne la hnepe ijin, ngo atre hi angeic ka hape, tha tro pi kö angeice lai a zae palua. Easenyi catre hë la iangazo hna mecin. Celë hi matre, hnei angeic hna pane nango mano me thithi kowe la Akötresie angeic. Tingetinge pi hi la hni angeic. Hnene la hna meköle goeën hnei Enoka, matre kösë pi lo angeic a melëne lai, nge tha xou i angeice hë.

Pane mekune jë, angeic a goeëne qëmeke i angeic la fene ka isapengöne catre memine la nöj hnei angeic hna atre. Ka mingöminge catre kö hune lo gaatran e Edena, ngo paatre kö lo itre kerubi ka thup. Ala nyimu e cili la itre trahmanyi me föe ka thöth me ka egöcatr, nge gaa tingeting mina fe e cili. Pë hmaca kö iakötrë me icilekeu göi hmi, lo lue ewekë hna melën hnei Enoka. Ame e cili, hnei Enoka hna öhne la ixatua, me ihnim me keukawa qaathei Iehova. Xecie hnyawa koi angeice laka, celë hi götrane lai hnë tro angeic a jilapa epine palua. Pine laka tingetinge hë la hni angeic, ene pe, meke ju hi Enoka uti hë la angeic a meköle thatre.

Nge ame enehila, patre hë angeic, ngo tha ase kö Iehova Akötresie thëthëhmi angeic! Tune la aqane thingehnaeane Iesu e thupen, tha hmitre kö matre traqa pi la ijine tro la nöjei atr ngöne la mekuna i Akötresie, a drenge la kola hë hnei Keriso, me lö pi qa ngöne la hua, me fe la lue meke i angatr me öhne la nöje ka hnyipixe, ka mingöming me ka tingeting.—Ioane 5:28, 29.

Ajane kö epuni troa hane traqa kowe lai? Pane mekune jë së la madrin la easa iöhnyi me Enoka elany. The qaja pala ha la itre ewekë hnei angeic hna melën, nge hna troa ce thawa me easë! Maine jë tro hë angeice lai a anyipicine la itre mekuna së, göne la aqane meci angeic. Ngo hetre ketre ewekë kö nyine tro sa canga atre göi angeic enehila. Thupene la hna qeje Enoka, öni Paulo ka hape: “Tha’teine kö troa amadi nyidë e pëkö lapaun.” (Heberu 11:6) Drei la ketre tulu ne lapaune nyine tro së isa ala cas a nyitipun, ene la tulu i Enoka!