Maine ase hë epuni hane mekun troa e la Tusi Hmitrötr, ngo ma hna ajolë epuni fe tune la itre atr hna qaja e caha hun? Ala nyimu la ka qaja ka hape, tha ka hmaloi kö troa e la Tusi Hmitrötr. Ngo maine tro epuni a atre ka hape, ijije hi tro la Tusi Hmitrötr a xatua epuni troa hetre madrin e hnine la hnepe lapa i epun me hetre mel ka loi, nemene la hnei epuni hna troa kuca? Nge maine epuni a öhne la itre aqane troa e la Tusi Hmitrötr ka thue aja koi epun, ke, tro kö epuni lai a e? Aja i epuni kö troa catre thele la itre ini qa hnine la Tusi Hmitrötr?

Hane hi la itre hna melën hnene la itre atr ka hane kepe thangane ngöne lo angatr a nyiqane e la Tusi Hmitrötr.

Öni Ezekiela, ketre thöth ka 20 lao macatre, ka hape: “Ame eni ekö, tre, kösë dröne ielu hna hule hnei uke thelec. Ngo hnene la hnenge hna e la Tusi Hmitrötr matre hetre aliene hë la meleng. Hetrenyi e hnine la Tusi Hmitrötr la itre eamo ka lolo, hnenge hna xötrethenge odrai.”

Frieda fe la ketre thöth ka 20 lao macatre, öni angeic: “Ka lapa elëhni ni ekö. Ngo hnene la hnenge hna e la Tusi Hmitrötr, matre atreine hë ni xomihni. Haawe, hmaloi hë koi ni troa ce mele me itre xan, matre tru hë enehila la itre sineeng.”

Öni Eunice, ketre föe ka 50 lao macatre, göne la Tusi Hmitrötr, ka hape, “Hna xatua ni hnene la Tusi Hmitrötr matre troa aloine la thiinang, me saze la itre hnenge hna majemine ka ngazo.”

Tune la itre atr celë memine fe la itre xa milio lao atr, xecie hnyawa koi së laka jëne la hne së hna e la Tusi Hmitrötr, tro hë sa mele madrin. (Isaia 48:17, 18) Ketre, tro eje mina fe a xatua epuni troa (1) axecië mekune ka loi, (2) hetre nyipi enehmu, (3) tha tro kö a hnehengazo menu, nge (4) ame la ka sisitria catr, tre, ene la troa atre la nyipici göi Akötresie. Ame la eamo qa hnine la Tusi Hmitrötr, tre, qaathei Akötresie, celë hi matre tha tro jë pi kö së lai a tria e hne së hna xötrethenge.

Ame la ka nyipiewekë, tre, ene la troa nyiqan. Nemene la ka troa xatua epun matre tha jole kö troa nyiqane e nge troa hetre aja e thupen?