Hna öhne hnene la ketre nekönatr jajiny, ka foa lao macatre, la kola so qa ngöne la itre usines nge kösë itre iawe ka tru. Matre angeic a mekune ka hape, ame la itre usines cili, tre, itre hnë xupi itre iaw. Nyine qaja hnyimane la aqane waiewekë ka qali ne la nekönatr. Ngo maine tha trotrohnine kö së la ketre ewekë ka nyipiewekë catr, tro lai a hetre ethane kowe la mele së. Hanawange la ketre ceitun, maine tha trotrohnine kö së la hna qaja göne la itre drösinöe, tro ha hetre thangane ka ngazo catre koi së.

Eje hi laka, ka ngazo catre kö e tha trotrohnine hnyawa kö së la itre ini qaathei Akötresie. Ceitune hi memine la kola tha trotrohnine hnene la itre xa atr la itre ini hna hamëne hnei Iesu. (Ioane 6:48-68) Hnei angatr hna thipetrije la nöjei ini qaathei Iesu, ngo tha hnei angatr pe hna thele troa atrepengöne hnyawa itre ej. Ka luzi hnyawa angatr!

Hapeu epuni kö a e la Tusi Hmitrötr matre troa eatrongë epun? Aqane kuca hi lai ka loi. Tune kaa, hetre engazon kö, e traqa ju epuni tha trotrohnine la hna e? Celë hi lai ka traqa kowe la itre xa atr. Hane hi la köni aqane trotrohnine ka tria ne la itre atr.

• Nyimutre la itre atr ka tha trotrohnine la hna amekötine e hnine la Tusi Hmitrötr, ngöne lo kola hape, “Qouju e Akötesie.” Celë hi matre angatr a xoue Akötresie ke, wanga ahnëjinë angatre pi. (Ate Cainöj 12:13) Ngo tha ajane kö Akötresieti tro la itre hlue i Nyidrë a atrunyi Nyidrë cememine la xoue cili. Öni Nyidrëti ka hape: “The qou kö, ke ce ini me eö ; the hlohlo kö, ke ini la Akötesi ’ö ; tro ni a aegöcatenyi ’ö ; he, tro ni a xatua eö.” (Isaia 41:10) Ame la troa xoue Akötresie, tre, kolo hi lai a hape, troa atrunyi Nyidrë cememine la hni ka ipië me metrötr.

• Nyimutre la itre atr ka tha trotrohnine hnyawa kö la aliene la itre trengewekë celë, hna hape: “Hete pui ne la nöjei ewekë asë, . . . hete ijine hnaho shë, me ijine mec.” Angatr a qaja ka hape, ase hë Akötresieti amekötine la drai ne mec ne la nöjei atr. (Ate Cainöj 3:1, 2) Ngo, kolo pe a qaja e celë la aqane trongene la mel, me qaja ka hape, meci hi la pun koi easë asë. Kola ini së mina fe hnene la Wesi Ula i Akötresie laka, ame la itre mekune hne së hna axeciën, tre, ka troa hetre thangane ngöne la nöjei drai ne la mele së. Tune la kola hape: “Ame la qoue Iehova, te, kola amanane la ite drai.” (Ite Edomë 10:27; Salamo 90:10; Isaia 55:3) Tune kaa? Maine tro sa metrötrëne la Wesi Ula i Akötresie, tre, tro hë së lai a neëne la itre ewekë ka ngazo tune la troa iji ka haitr me kuci ngazo.—1 Korinito 6:9, 10.

• Ame itre xan, tha trotrohnine kö angatr la nyipi aliene la hna qaja hnei Tusi Hmitrötr. Angatr a mekune laka, ame la kola qaja ka hape, “thatraqane la eë” la hnengödrai memine la ihnadro, tre, ka nyipici. Celë hi matre xecie koi angatr laka, tro Akötresieti a apatrene la ihnadro. (2 Peteru 3:7) Ngo ase hë thingehnaeane hnei Akötresieti ka hape, tha tro jë pi kö Nyidrëti a apatrene la ihnadro. Hnei Akötresie “hna ami tepene la fene hnengödrai, tha tro kö ej’ a enij’ epine palua.” (Salamo 104:5; Isaia 45:18) Kolo pe a qaja la itre atr ka ngazo e celë fen, ngo tha ihnadro kö la hna troa apatrene epine palua, tune la ewekë hna dreuthetrije hnei eë. Ame la hnengödrai, tre, kola qaja la itre wëtresij e caha, maine hnamunë i Akötresie. Nge tha tro kö a apatrene itre ej.

Tune la hne së hna ce wange ngöne la itre ceitun e caha hun, alanyimu la itre atr ka tha trotrohnine la angatr a e la Tusi Hmitrötr. Ngo pine nemene matre Akötresie a nue lai? Öni itre xan: ‘Pine laka ka inamacane Akötresie, ijiji Nyidrëti hi troa hamëne koi së la ketre itus ka lualai me hmaloi troa trotrohnine hnene la nöjei atr asë. Ngo pine nemene matre tha kuca ju kö Nyidrëti tune lai?’ Hanawange la köni kepin matre tha trotrohnine kö së la Tusi Hmitrötr.

1. Hna eköth la Tusi Hmitrötr kowe la itre ka hetre hni ne ipië me itre ka ajan troa inin ej. Hnei Iesu  hna qaja kowe la Keme i nyidrë, ka hape: “Ini a ole koi cilie, Angakakati, Joxu ne hnengödrai memine la fen, qa ngöne la hnei cilieti hna juetëne la nöjei ewekë celë ene la ite ka inamacan, me ite macamek, ngo hna amamane kowe la nöjei medeng.” (Luka 10:21) Hna cinyihane la Tusi Hmitrötr matre tro hi la itre ka loi thiina a trotrohnine la maca ne ej. Ame la itre atr ka thiina ka pi tru, ene lo “ite ka inamacan, me ite macamek”, tre, tha tro jë kö angatre lai a hane canga trotrohnine la Tusi Hmitrötr. Ngo ame la itre atr ka e la Tusi Hmitrötr me ka ujë tune la ketre “medreng”, ene la itre ka hni ka ipië me ka ajane troa inine ej, tre, angatre hi la itre ka troa trotrohnine la maca i Akötresie. Nyine haine la aqane kuca Akötresieti la Tusi Hmitrötr!

2. Hna cinyihane la Tusi Hmitrötr kowe la itre atr ka ajane la ixatua qaathei Akötresie matre troa trotrohnine ej. Hnei Iesu hna amamane ka hape, nyipiewekë tro la itre atr a sipo ixatua, matre troa trotrohnine la itre ini hna hamëne hnei nyidrë. Nemene la aqane tro angatr a kapa la ixatua cili? Öni Iesu: “Ame la Ixatua, ene la Uati Hmitöt, la hnei Tetetroti hna troa upe ngöne la ëjeng, tro nyidëti a ini nyipunie la nöjei ewekë asë.” (Ioane 14:26) Celë hi matre, Akötresieti a hamëne la uati hmitrötre i Nyidrë, ene la mene i Nyidrë, matre xatuane la itre atr troa trotrohnine la angatr a e la Tusi Hmitrötr. Ngo, tha Akötresieti kö a hamëne la uati hmitrötre i Nyidrëti kowe la itre atr ka xele ma thele ixatua thei Nyidrë, celë hi matre tha trotrohnine kö angatr la Tusi Hmitrötr. Kolo fe a ainamacanëne la itre Keresiano hnene la uati hmitrötr, matre troa xatuane la itre atr ka thele troa trotrohnine la Tusi Hmitrötr.—Ite Huliwa 8:26-35.

3. Ijije hi tro la itre atr a trotrohnine la itre xa xötre ne la Tusi Hmitrötr ngöne la ketre ijin. Hanawange la ketre ceitun. Hnei Daniela perofeta hna qaja ka hape, troa cinyihane la ketre maca kowe la itre drai elany. Hnene la ketre angela hna qaja koi angeic ka hape: “Daniela, juetëneju la ite aqane ewekë, me pele hatene ju la tus, uti hë la ijine la pun.” Ame ngöne la itre hadredre lao macatre, nyimutre la itre atr ka e la tusi Daniela e hnine la Tusi Hmitrötr ngo tha trotrohnine hnyawa kö angatr. Ketre tui Daniela mina fe, tha trotrohnine kö angeic la itre hnei angeic hna cinyihan. Öni angeic jë hi e qaja cememine la hni ka ipië, ka hape: “Denge hi ni, ngo tha trotrohnine kö ni.” Haawe, kolo hi a trotrohnine hnene la itre atr lo itre hna perofetane hnei Akötresie jëne Daniela, ngöne lo ijine hna amekötine hnei Akötresie. Önine la ketre angela, ka hape: “Daniela, trojë, ke ase hë juetëne me pele hatene la ite ewekë cili uti hë la ijine la pun.” Drei la ka troa trotrohnine la itre maca qaathei Akötresie? “Pëkö ate ka ngazo troa trotrohnin ; loi pe troa trotrohnine hnei ite ka inamacan.” (Daniela 12:4, 8-10) Tha hnei Akötresieti kö hna canga amamane la aliene la itre xötr ne la Tusi Hmitrötr ke, tha ijine petre kö.

Hapeu, trotrohnine pala kö la Itretre Anyipici Iehova la Tusi Hmitrötr, ngacama tha hneijine i angatre hmaca kö? Eje hi. Ame ngöne la ijine Akötresieti a ahmaloeëne la itre hna qaja e hnine la Tusi Hmitrötr, tre, canga kapa hi hnene la Itretre Anyipici Iehova. Angatr a mekune ka hape, ketre aqane tro hi angatre lai a nyitipune la itre aposetolo i Keriso. Hnei angatre hna canga amekötine la itre mekuna i angatr, ngöne lo kola haji angatre hnei Iesu.—Ite Huliwa 1:6, 7.

Maine jë, ame la aqane waiewekë ka qali ne lo nekönatre jajinyi göne la qane la itre iaw, ke, ka pë pengön. Ngo, ame la hna ini së hnene la Tusi Hmitrötr, tre, ka sisitria catr kowe la mele së. Ka nyipiewekë catre la maca ne la Tusi Hmitrötr kowe la itre atr ka thele troa ketre trotrohnine ej, jëne la hnei angatr hna e. Qa ngöne lai, sipo ixatua jë matre tro epuni a trotrohnine la hnei epuni hna e. Haawe, thele jë la itre atr ka inine la Tusi Hmitrötr cememine la hni ka ipië, ene la itre atr ka nue la uati hmitrötre i Akötresie troa xatua angatr troa trotrohnine la Tusi Hmitrötr. Kola qaja mina fe la itre atr ka atre hnyawa laka, tru la aja i Akötresieti tro sa trotrohnine hnyawa la Tusi Hmitrötr enehila hun ekö. The cile kö troa ithanata memine la Itretre Anyipici Iehova maine e pena la itre hnei angatr hna thel ajuine ngöne la sit jw.org. Ase hë thingehnaeane hnei Tusi Hmitrötr ka hape: “Maine eö a hëne la inamacan. . . , ame hnei ʼö hna troa ate Akötesie.”—Ite Edomë 2:3-5.