Itre hna qaja: Tha kolo kö a feetë Paak hnene la Itretre Anyipici Iehova ke tha itre Keresiano kö angatr.

Nyipici: Eahuni a lapaune laka Iesu Keriso la atre Iamele, nge eahuni a kuca asë la hne huni hna atreine matre troa “xöte thenge la ite thupa ca i nyidë.”—1 Peteru 2:21; Luka 2:11.

Itre hna qaja: Tha epuni kö a lapaune laka, hna amele Iesu hmaca qa hna mec.

Nyipici: Eahuni a lapaune laka, hna amele Iesu hmaca. Eahuni a goeëne lai ceitu me ketre ini ka tru ne la hmi Keresiano; celë hi kepine matre eahuni a tro fë la ini cili ngöne la eahuni a cainöje trootro.—1 Korinito 15:3, 4, 12-15.

Itre hna qaja: Tha hnime kö epuni la itre nekö i epun, ke tha hane pë hë nyudreni kepe ahnahna ngöne la ijine Paak.

Nyipici: Ka hnime huni la itre nekö hun, ke tha mano kö huni xatua nyudren me ini nyudreni la nyine troa kuca matre tro nyudreni a mele madrin.—Tito 2:4.

• Tha Tusi Hmitrötr kö a upi së troa feetë Paak.

• Tha hnei Iesu kö hna upi së troa feetëne la ijine kola amele nyidrëti hmaca, ngo ene pe la ijine nyidrëti a mec. Celë hi kepine matre eahuni a sine la Drai Ne Amekunën e nöjei macatre, göi troa atrune la ijine nyidrëti a mec ngöne la drai hna sa hnei Tusi Hmitrötr.—Luka 22:19, 20.

• Eahuni a atrehmekune laka, pine laka hna nyi trepene la Paak hnene la itre hna majemine ekö hnene la itre hmi wanaithihlë göi troa atrune la troa hnaho thithë, haawe, tha Akötresieti kö a kapa la feete cili. Akötresieti “ka isaxolo” la nyipi Akötresie, nge Nyidrëti a ajane tro sa nyihlue i Nyidrëti hmekuj, nge ka akötre koi Nyidrë e tro sa xom la itre hna majemine ka sisi koi Nyidrë, matre troa nyihlue i Nyidrë.—Esodo 20:5; 1 Ite Joxu 18:21.

Ame koi hun, tha eahuni kö a feetë Paak ke hna nyitrepene la mekune hne huni hna axeciëne jëne la Tusi Hmitrötr, ke tha eje kö a ithuecatre koi së troa trongëne menune jë hi la itre hna majemine hnei atr, ngo eje pe a upi së troa huliwane la “inamacane memine la mekune” së. (Ite Edomë 3:21; Mataio 15:3) Eahuni a hane qaja koi itre atr ka pi atre la itre hne huni hna atre göi Paak, ngo eahuni fe a metrötrëne la aqane isa ië ewekë i angatr.—1 Peteru 3:15.