Ame la itre xa ka bapataiso ekö matre troa hane Anyipici Iehova, tre tha cainöje hmaca kö angatr, nge ma tha angatre hmaca kö a sine la lapa ne la itre Keresiano. Ngo tha eahuni kö a nuetriji angatr. Eahuni pe a thele troa xatua angatr, me akeukawanyi angatre hmaca ngöne la götrane ua.

Maine hetre ewekë ka ngazo hna kuca hnei ketre, tha eahuni kö a canga upetrön eë. Ngo maine tro angeic a ena lapaane la itre wathebo hna qatrenge hnene la Tusi Hmitrötr, nge tha ietra kö, tro ha upetröne eë angeic. Ke öni Tusi Hmitrötr: “Helënepi qa thei nyipunie la ate ka ngazo.”—1 Korinito 5:13.

Nge tune kaa e upetröne eë ju la ketre atr, nge lapa pe kö föe hmunë me ha kuku ngöne la hmi? Tha casi hmaca kö angatre ngöne la hmi, ngo ame pe ngöne la götrane la madra, tre tha saze kö. Tha saze kö la aqane mele i nyidro lue trefën, nge ketre tha saze kö la aqane imelekeu i angatre ha trenekön, ke ka ihnimikeu pala hi angatr.

Tha hna wathebone kö kowe la hna upetrön eë troa hane sine la itre icasikeu hun. Maine ajane angatr, ijije tro la itre qatre thupe ne la ekalesia a akeukawanyi angatr ngöne la götrane ua. Aqane ujë ne la itre qatre thupe hi lai, matre xatuane lai hna upetrön eë troa bëeke hmaca kowe la hmi. Maine tro lai hna upetrön eë a ietra, me amamane ka hape, angeice hmaca a ajane troa mele thenge la itre trepene meköti ne la Tusi Hmitrötr, tre troa kepe angeice hmaca e hnine la ekalesia.