ÖNI Alan Duthie ngöne la tusi angeic ka hape: “Maine öni eö ka hape, trengewekë i Akötresie la Tusi Hmitrötr, kolo lai a hape, Akötresie a ithanata koi së. . . . Nge maine ka hmi catre eö, nga loi e troa ihmeku la itre trengewekë [ne la Tusi Hmitrötr] memine la aqane ithanata së.” (Bible Translations and How to Choose Between Them)

Itre ka hnime la Trengewekë i Akötresie a mejiune laka, “qaathene la ua i Akötresie la nöjei hna cinyihan asë, nge ka nyipiewekë göi troa hamë ini, me hmekën, me xom amekötine la nöjei ewekë, me hajin ngöne la thiina ka meköt.” (2 Timoteo 3:​16) Eje hi, ka hekö hë la Tusi Hmitrötr. Ngo “ka mele me mene” la Tusi Hmitrötr, ke ixatua lai kowe la nöjei jole së enehila. (Heberu 4:​12) Ngo e ajane la itre ka e troa trotrohnine me trongën, loi e troa pane ujën ngöne la aqane ithanata së enehila, matre hmaloi e troa e me trotrohnin.

Itre ka hnime la Tusi Hmitrötr a kapa madrine la Tusi Hmitrötr ka hnyipixe qene Drehu, hna hëne ka hape, Tusi Hmitrötr Fene Ka Hnyipixe Hna Ujën, Itre Hna Cinyihan Qene Geres. Itretre Anyipici Iehova a thuemacanyi nyipunie laka, mama ha la Tusi Hmitrötre celë lo 11 Nofeba 2018. Ka hmaloi hi la aqane ujëne la Tusi Hmitrötre celë, nge ka meköt. Kolo petre hi a hane ujëne tune la Tusi Hmitrötr qene Drehu, matre canga trotrohnine la itre ka e la maca i Akötresie. Ma nyipunieti jë a thele ka hape, drei la ka kuca la Tusi Hmitrötre celë?

Ma tha majemine kö la atre Drehu kowe la Tusi Hmitrötr Fene Ka Hnyipixe Hna Ujën, Itre Hna Cinyihan Qene Geres. Ngo ekö hë fejane la Tusi Hmitrötre celë, hna nyiqaan lo 1950. Ngöne la ijine cili, hna fejane hi qene Papale (anglais). Hna fejan hnene la Watch Tower Bible and Tract Society​—ketre Société internationale ka majemine kuci Tusi Hmitrötr. Önine la zonal, Ita Ne Thup ne 15 Semitrepa 1950, ka hape: “Xele kö itre atrene la komite ne ujë qene hlapa. . . troa qaja atrunyi angatr, maine fejane la ëje i angatr, e mele pala kö angatr maine meci hë. Ke ame la kola ujë qene hlapa, tre göi troa atrune la ëjene la nyipi Akötresie.”

Ame lo 1961 hna fejan la Tusi Hmitrötr ka pexej hna hëne ka hape, Tusi Hmitrötr Fene Ka Hnyipixe Hna Ujën. Nge uti pala hi enehila, thatre kö së la ëjene la itre ka ujëne la Tusi Hmitrötr. Ngo casi hi, hnei angatr hna kuca qa kuhu hni, me nue mel kowe la huliwa cili. Nge ngöne la Tusi Hmitrötr hna fejan lo 2013, hna cinyihan ngöne la itre pane ithanata ka hape: “Ka tru koi huni la maca ne la Tusi Hmitrötr, matre hne huni hna metrötrëne la aliene la Tusi Hmitrötr, me fejan ngöne la aqane ithanata ne la itre atr enehila. Atre hi huni laka, hnëqa ka tru ejolene la troa meköt la aqane fejane la maca cili. . . . Ngo aja huni troa fejane la itre Tusi Hmitrötr ka ihmeku me itre hna cinyihan ekö, nge ka hmaloi e troa e.”

Enehila, ase hë sasaithe la 220 milio lao Tusi Hmitrötr hna fejan apexejen, maine sinën. Hna fejan ngöne la 160 qene hlapa e cailo fen. Nemene la hna öhne hnei itre ka e?

Hnei Iesu hna ini itretre drei nyidrë troa thithi ka hape: “Kakati fe e koho hnengödrai, epi hmitrötr la ëje i nyipë.” (Mataio 6:9) Hnine la Tusi Hmitrötr, a 7000 lao mama la ëje Akötresie, ene Iehova. (Esodo 3:​15; Salamo 83:18) Ngo thupene la meci ne la itre aposetolo i Iesu, hnei itre keresiano hna nyitipu angetre Iudra, me xou troa qaja la ëje i Iehova. (Itre Huliwa 20:29, 30; 1 Timoteo 4:1) Matre hnene pë hë lo itre ka fejane la itre Hna Cinyihane Qene Geres, hna nyiqaane xometrije la ëje i Iehova, me cinyihane ka hape, “Joxu” maine “Akötresie.”

Hnene la Komite Ne Ujë Tusi Hmitrötr Fen Ka Hnyipixe, hna mekune troa amë hmaca la ëje i Iehova ngöne la itre hna cinyihan Qene Geres, * ke traqa koi 237 lao mama la ëje i nyidrë. Tha hna amë menune kö, ngo hna amë ngöne la sipu göhnen, thupene la hna pane thele ewekë. Hna kuca tun koi Luka 4:​18. Kola qaja hmaca la itre trengewekë ne Isaia 61:1. Nge ngöne la itre hna cinyihan qene Heberu, kola mama la ëje i Iehova hnine la xötre celë. Haawe, hnine la Tusi Hmitrötr Fene Ka Hnyipixe Hna Ujën, kola hape ngöne Luka 4:​18: “Eje hung la uati hmitrötr i Iehova, ke hna ië ni troa cainöjëne la maca ka loi koi itre ka pë ewekë.”

Ixatua ka tru, ke kola aijijë itre ka e troa atre ka hape, Iehova la ka ithanata, maine Iesu Keriso Nekö Hnimina i nyidrë. Ame ngöne la itre xa Tusi Hmitrötr, hna ujëne la Mataio 22:44 ka hape: “Joxu a qaja kowe la Joxung.” (American Standard Version) Ngo thatre pe së ka hape, drei la ka ithanata, nge koi drei? Ngo hna xome la xötre celë qa ngöne Salamo 110:1. Nge ngöne Salamo kola mama la ëje i Iehova. Matre hnene la Tusi Hmitrötr Fene Ka Hnyipixe Hna Ujën, hna qaja ngöne Mataio 22:44 ka hape: “Iehova a qaja kowe la Joxung.” Haawe, canga mama hi laka, lue atr Iehova me Iesu. (Mareko 13:32; Ioane 8:​17, 18; 14:28) Nge ka nyipiewekë lai kowe la nöjei atr ka pi mel. Ke öni Itre Huliwa 2:​21: “Tro ha amelene la nöjei atr ka hëne la ëje i Iehova.”

Hnine la Tusi Hmitrötr Fene Ka Hnyipixe Hna Ujën, hna isine troa meköti la aqane ujëne la itre trengewekë qene Geres, nge tro fe a canga trotrohnin. Hane hi la aqane ujëne huni la hnëewekë “thel” ngöne Mataio 6:​33. Ngöne la qene Geres, ame la troa “thel,” tre, ketre ewekë hna kuca lapan. Matre hna ujëne ka hape: “Catre jë” maine “Thele panëne jë la Baselaia memine la thiina ka meköt i nyidrë, nge troa hamë nyipunie la nöjei ewekë asë cili.” Nge hna tune fe koi Mataio 7:7, kola hape: “Sipo jë the mano kö, nge tro ha hamëne koi nyipunie; thele jë the mano kö, nge tro hë nyipunieti a öhn; fenafena jë the mano kö, nge tro ha thawa koi nyipunie.”​—Roma 1:​32; 6:2; Galatia 5:​15.

Kolo petre hi a fejan ngöne la qene Drehu, la Itre Hna Cinyihan Qene Geres. Nge ase hë sa ijine troa fejan elany la Tusi Hmitrötre ka pexej. Ngo hapeu, tro kö la Tusi Hmitrötre qene Drehu a meköt me hmaloi tune la qene Papale?

Eje hi, ke hna waipengöne hnyawa la huliwa cili hnene la Lapa Ne Xomi Meköt ne la Itretre Anyipici Iehova. Hna mekune laka, loi e tro la itre ka ujë qene hlapa a ce huliwa. (Ite edomë 11:14) Matre e cailo fen, hna acile la itre ekip troa ujë Tusi Hmitrötr. Nge ngöne la biero ka tru ne la Itretre Anyipici Iehova, hna acile la ketre biero hna hëne ka hape, Biero Ne Ujë Qene Hlapa. Jole i angatre hi troa xatuane la itre ekip ka ujë Tusi Hmitrötr e cailo fen, me sa la itre hnyinge i angatr, me thupën matre tro la nöjei Tusi Hmitrötr Fene ka Hnyipixe Hna Ujën a ihmeku. Nge hna eköthe fe la ketre système informatique (Watchtower Translation System) troa xatua itre ka ujë Tusi Hmitrötr. Ngo eje hi laka, itre atr la ka ujë qene hlapa. Ame la système informatique cili, ej a amamane koi itre ka ujë qene hlapa, la aqane qaja Qene Papale, la itre trengewekë qene Heberu me Geres, nge qanyi angatre pë hë iëne la trengewekë ka ihmeku. Ixatua ka tru koi angatr la itre ordinatör, ke kola xatua angatr troa meköt me hmaloi la Tusi Hmitrötr, tune la qene Papale.

Eahuni a iele nyipunie troa waipengöne hnyawa la Tusi Hmitrötr Fene Ka hnyipixe Hna Ujën, Itre Hna Cinyihan Qene Geres. Ijiji nyipunie troa e ngöne ëternet, me ngöne JW Library (application), maine sipon koi itretre Anyipici Iehova. Tro hë nyipunieti a öhne laka: hna cinyihan atrun; nge hetre götrane hna hëne ka hape, alien. Ej a xatua nyipunie troa canga öhne la itre mekune ne la itre tus, me canga öhne la itre xötr. Nge hetre itre xa ithuemacanyi fe ka ixatua. Ngo ame la ka nyipiewekë, tre ka meköti la aqane ujëne la Trengewekë i Akötresie, nge hna ujën matre tro nyipunieti a canga trotrohnin.

Hnë qejepengön: Kola qejepengöne la itre hadredre lao trengewekë hnine la Tusi Hmitrötr