PIÖÖC 11

Të Bïï Yïn Baibol Ŋiɛc Dɛɛtic Thïn Apiɛth

PLAY

Nadɛ̈ ca kaŋ kɔɔr ba londït apɛi jɔɔk cöök ku ye yök ë yï puɔ̈u ke rilic arëët? Ku bï yic pial tënë yïn, aca them ba baŋ thiin koor ya kueen ë dhaman tökic. Ke yen tëde aya të bïï yen ë bïak kuën ë Baibol. Yïn lëu ba thiëc, ye tëno bïï ɣɛn ye jɔɔk thïn? Ye piööc kënë yic, ɣook aabï kä thii piɔ̈liic tïŋ lëu bïk yïn kuɔny ba kuëndu ku piööcdun ë Baibol nhiaar.

1. Ye wɛ̈tŋö lëu bïï ɣok Baibol ya kueen ë köölthok ëbën?

Raan ë Baibol kuen ë köölthok ëbën awu “löŋ de Bɛ̈nydit (Yekoba),” abï puɔ̈u ya miɛt ku këden ye looi ëbën abï rot ya lëu. (Kuen Diɛt 1:1-3.) Ku ba jɔɔk, them ba ya kuen ë thaa thiin ciekic ë köölthok ëbën. Ŋïny bɛ yïn kä juëc ŋic ë wɛ̈t ë Nhialic yic ee yen bïï yïn ye ya nhiaar ba Baibol ya kuen.

2. Yeŋö bï yïn kuɔny ba käpiɛth yök ë kuëndun ë Baibolic?

Ku buk kuɔny piɛth yök ë kuën dan ë Baibolic, awïcku buk kɔn ya kɔ̈ɔ̈c ku takku ɣonïïm ë biäk ke kuenku. Ɣok akɔɔrku buk kɔn ya kueen ku “takku yic apɛi.” (Jocua 1:8, NWT kë cï gɔ̈t ye cöök) Të kuën yïn ë Baibol, ye rot thiëëc ye thiëc kä: ‘Yeŋö ye kënë lɛ̈k ɣɛn ë biäk ë Nhialic Yekoba? Ye këdï lëu bïï ɣɛn ë kënë tääu ë pïïrdiɛ̈ yic? Ye këdï lëu bïï ɣɛn ë cök kä luöi bïï ɣɛn kɔc kɔ̈k kuɔny?

3. Ye nɛn lëu bï yïn dhaman yök ba Baibol ya kueen?

Nadɛ̈ ye yök ke rilic ba dhaman yök bïï yïn Baibol ya kueen? Aye kɔc juëc ë ɣo yiic yök ke rilic. Them “ba dhamandu ŋiɛc ya luöi apiɛth.” (Epethiei 5:16, NWT) Yïn bï ë kënë looi ë kuer bïï yïn dhaman ya bɛ̈ibei bïï yïn Baibol ya kueen ë köölthok ëbën. Kɔc kɔ̈k aa dhaman bɛ̈ibei bïk keek Baibol ya kueen nhiäk duur. Kɔc kɔ̈k aa dhaman yök akɔ̈l ciɛlic, ë dhaman den ë cäm aköl. Kɔc kɔ̈k aya aa Baibol kueen ë thëëinɔm të kën keek guɔ lɔ niin. Ye dhaman no lëu bï piath ke yïn?

YÄP DÏT

Piɔ̈ɔ̈cë tɛ̈ bïï yïn kuëndun ë Baibol ya nhiaar apɛi. Tïŋ tɛ̈ bïï yïn rot ya guiɛɛr thïn apiɛth ago käpiɛth apɛi yök ë piööcdun ë Baibolic.

Cït man lëu bïï raan piöc ë cäm ë kuïn kën kaŋ cam, ɣook lëu buk piöc buk kuën ë Baibol ya nhiaar

4. Piɔ̈ɔ̈cë ye këdï bïï yïn puɔ̈u ya lɔ yum ë kuëndun ë Baibolic

Acïï yic piɔl ba kuëndun ë Baibol jɔɔk cöök. Ka yen, alëu ku buk piööc ë Baibol ya nhiaar, cït man lëu bïï raan piöc ë cäm ë kuïn kën kɔŋ caam. Kuen 1 Petero 2:2, ku jalkë thiëc kënë jäämic:

Nadɛ̈ ye takic kuën ye yïn Baiböl kueen ë köölthok ëbën, alëu ba nhiaar ku ba ya kueen ë thaathok ëbën?

Puɔl ë BIDEO Tïŋ ye këdï cïï kɔc kɔ̈k ye jɔɔk bïk Baibol ya nhiaar ku kuenkë. Ku jalkë thiëc bɔ̈ jäämiic.

BIDEO: Riënythii aa cï Piöc Bik Wɛ̈tde Nhialic ya Nhiaar (5:33)

Ë bideo yic, ye käriliic kou ke cïï riënythii ke tiaam?
Yeŋö ë cï keek kuɔny bïk lɔ tueŋ ke kuënden ë Baibol ë köölthok ëbën?
Ye këdï cïï keek kuënden ë Baibol looi bï yakë dik apɛi?

Kä bï yïn kuɔny ba jɔɔk cöök:

Kuany Baibol wën cï ŋiɛc gɔ̈t ë thoŋ piɔlic. New World Translation të cïï ye waaric ë thoŋdu awu thoŋ däŋ wën ŋic apiɛth
Jɔɔk kuën ë baŋ nhiaar arëët. Ku ba kɔ̈k juëc kɔ̈k yök, tïŋ thanduŋ “Jɔɔk Kuën ë Baibol Cöök.”
Muk kä ca keek piɔ̈ɔ̈c yïnɔm awu gɛ̈t ke piny. Luöi të ca guiir bïï yïn Baiboldu ya kuɛɛn thïn ë thanduŋ athör kënë yic.
Luöi ë JW Library^®app. Thïn ëtɛ̈ɛ̈n, yïn lëu ba kuen ku piëŋë Baibol ë kuat të rëër yïn thïn ëbën, ë telepun ye gɔɔt nyin yic awu komputar.
Luöi wël kɔ̈k cï ke juak thïn ë thökde athör tɔ̈u ë New World Translation. Anɔŋic map, thanduk ku wël thiekiic cï ke laariic lëu bïk ke kuëndun ë Baibol cɔl adik apɛi.

5.Ye rot guiir ë piööcdun ë Baibol

Kuen Diɛt 119:34, ku jalkë thiëc kënë jäämic:

Yeŋö piɛɛth en ba kaŋ ya lɔ̈ŋ ke yï kën piööcdun ë Baibol guɔ jɔɔk?

Ye këdï bïï yïn këpiɛth apɛi ya yök ë piööc töŋ ye yïn piɔ̈ɔ̈cic? Ke yï guiir rot ye piööc kënë yic, them kuɛɛr kä:

Kuen abɛ̈r tueŋ ë piööc kä.
Tïŋ ku kuen cök ke Baibol, ku them ba keek deetiic ye këdï ye keek lɔ ke thöŋ ke wël ca keek kueen athör kënë yic.
Giit wël bï thiëc dhuknïïm cök; kënë abï yïn kony ba thiëc jäämiic wek raan ë yïn piɔ̈ɔ̈c.

Nadɛ̈ ŋic?

Ciëëtke Yekoba aacï Baibool juëc tɛ̈kiic luöi. Ka yen, ɣok cï New World Translation of the Holy Scriptures jä bën nhiaar apɛi wɛ̈tŋö, aci ŋiɛc gɔ̈t, ku apiɔlic, ku rin ë Nhialic atɔ̈u thin.—Tiŋ Awereŋ tɔ̈u Netic “Nadɛ̈ Nɔŋ Ciëëtke Yekoba Nïïm Baibol Den Kapäc?”

AYE KƆC KƆ̈K LUEEL: “Piööc ë Baibol arilic arëët. Yɛn nɔŋ nɔm käjuëc luɔi keek awu yɛn guɔ dak.”