PIÖÖC 12

Yeŋö Lëu bï Yïn Kuɔny ba lɔ Tueŋ ke yï Piööc Baibol?

PLAY

Piööc ë Baibol anɔŋic ariɔ̈mdït apɛi. Ku yen aya, acie kë piɔlic. Ë thɛɛ kɔ̈k, yïn lëu ba gäi nɔn bïï yïn lɔ tueŋ ke yï piööc Baibol. Ye wɛ̈tŋö piɛɛth en ba them apɛi ba lɔ tueŋ ke yï piööc Baibol? Yeŋö lëu bïï yïn kuɔny ba gum acɔk nɔn ril yen yic?

1. Ye Wɛ̈tŋö ye Piööc ë Baibol Yic Thiek?

“Jam ë Nhialic apïïr ku acath ke riɛldït.” (Ɣeberuu 4:12) Baibol athiekic apɛi wɛ̈tŋö ee tɛ̈ktɛ̈k de Nhialic ku të ye yen käŋ yök thïn ye puɔ̈u nyuöth yïn. Ee yï kuɔny ba käŋ ŋïc, pɛlënɔm ku ŋäth. Ku kë töŋ thiekic apɛi, Baibol ee yï kuɔny ba ya mäth ë Yekoba. Të piööc yïn Baibol, ke yïn ë riɛlde puɔ̈l bï pïïrdu waaric.

2. Ye wɛ̈tŋö thiek en yic ba yiny de Baibol ŋic?

Yiith tɔ̈u ë Baibolic acït käpiɛɛth ye ke wɛ̈cbei piiny cït man ë dääp. Ku ee yen ë wɛ̈t ye Baibol ɣok dɛɛt piɔ̈ɔ̈th buk “yic ɣɔɔc ku cukku ben ɣaac wei.” (Kɛ̈ŋ 23:23, NWT) Të tɛ̈ɛ̈u ɣook thiek ë yic ë Baibol ë ɣonïïm, ka buk ya them buk lɔ tueŋ ke ɣo piööc Baibol—cɔk anɔn nɔŋ en käril ë ɣook yök.—Kuen Kɛ̈ŋ 2:4, 5.

3. Ye këdï lëu bïï Yakoba yïn kuɔny ba lɔ tueŋ ke yï piööc Baibol?

Ke ye aciëŋ wärjäŋ ku ye mäthdu, Yekoba akɔɔr bï yïn kony ba piöc ë biäkde. Alëu bï yï gäm “riɛl ku tɛ̈ɛ̈u ë yïpuɔ̈u ba luui.” (Kuen Pilipoi 2:13. NWT) Kë tɛ̈ɛ̈n, të wïc yïn yen bï yï juak ë kuɔɔny ba Baibol piɔ̈ɔ̈c awu ba kë ca piɔ̈ɔ̈c tääu ë pïïrdu yic, ka lëu bïï yïn kony. Ku na kɔɔr bï yïn juak ë riɛl ba käril jɔ̈ɔ̈r yïn tiaam awu jai ye kɔc jai, ka lëu bï yiëk yïn. Ye Yekoba cɔɔl ë lɔ̈ŋic ë köölthok ëbën bï yïn kony ba lɔ tueŋ ke yï piööc Baibol.—1 Thethalonikei 5:17.

YÄP DÏT

Piɔ̈ɔ̈cë tɛ̈ bïï yïn lɔ tueŋ ke yï piööc Baibol cɔk anɔn cïï yïn nɔm thiäŋ ë käjuëc loi keek awu jai ye kɔc jai ë biäkde. Ku tïŋ tɛ̈ lëu bïï Yekoba yïn kuɔny ba lɔ tueŋ ke yï gum.

4. Tääu piööcdun ë Baibol tueŋ ë këriëëc ëbën nɔm

Ë thɛɛ kɔ̈k, pïïr ee yic thiäŋ ke käjuëc loiku keek abï cïn dhaman dɔ̈ŋ bï ɣook Baibol ya piɔ̈ɔ̈c. Yeŋö lëu bï yïn kuɔny? Kuen Pilipoi 1:10, ku jalkë thiëc kä jäämiic:

Ye käŋö ye ke takiic ke thiekiic apɛi ë pïïrdu yic?
Ye këdï lëu bïï yïn piööcdun ë Baibol tääu tueŋ ë kä ye ke looi yiic ëbën?

Na thiääŋ ɣoth ë liɛɛt ku them ba ajieer bɛ tääu, ka cïï bï lɔ thïn ëbën.
Ku na kɔn ajieer tääu ë ɣothic, ke yïn bï nɔŋ të lääu bïï yïn liɛɛt jä kiɛɛr ë kɛ̈m ken. Ke yen tede aya, na tääu kä thiekiic tueŋ ë pïïrdu yic, ka ba keek lëu ë luɔi ku yïn bi naŋ dhaman däŋ bïï yïn kɔ̈k looi

Piööc Baibol ee ɣook cɔk kueth ë käke wëi yeku ke kɔɔr—ŋïny bïï ɣok Nhialic ŋic ku yeku door. Kuen Mathayo 5:3, ku jalkë thiëc kënë jäämic:

Ye këpiɛɛth ŋö yeku yök të ye ɣok piööc ë Baibol tääu tueŋ ë këriëëc ëbën nɔm?

5. Lɔ tueŋ ke yï gum cɔk anɔn jiɛi ë kɔc ë Baibol

Ë thɛɛ kɔ̈k, kɔc kɔ̈k alëu bïk yï rac puɔ̈u ë piööcdun ë Baibolic. Tïŋ kë cï rot luöi Francesco. Puɔl ë BIDEO, ku jalkë thiëc bɔ̈ jäämiic.

BIDEO: Acï Riɔp ë Wɛ̈t ë Guɔ̈mde (5:22)

Ë bideo yic, ye këdï cïï mäthke Francesco ku kɔc ke paanden ye tïëŋ thïn wään cïï yen keek lɛ̈k kë piööc ë Baibolic?
Ye këdï cïï yen bën riɔp ë wɛ̈t cïï yen gum?

Kuen 2 Timotheo 2:24, 25, ku jalkë thiëc kä jäämiic:

Ye mäthku ku kɔc ke paanduön këdun ye piɔ̈ɔ̈ce tïŋ këdï?
Cït man cïï yen gɔ̈t ye cök kä yiic, ye këdï lëu bïï yïn ye dhuknɔm të cïï raan däŋ puɔ̈u mit ë wɛ̈t piööc yïn Baibol? Ku ye wɛ̈tŋö?

6. Ye rot kän Yakoba bï yïn kuɔny

Të thiɛ̈ɛ̈k ɣook röt Yekoba, ke nhiëërdan bïï ɣok yen ya miɛt puɔ̈u ee lɔ ke juak ë yic arëët. Ku yen, ayeku ŋoot ke yökku ke rilic arëët buk lööŋ ke Yekoba tääu ë pïïrda yic. Ku na ca kɔn yök këya, ke yïn duk puɔ̈u go dak. Yekoba abï yïn kuɔny. Puɔl ë BIDEO, ku jalkë thiëc bɔ̈ jäämiic.

BIDEO: Yekoba ee Ɣok Kony Buk Röt Waar (3:56)

Ë bideo yic, ye käŋö cïï Jim ke waar ë pïïrde yic bï Yekoba miɛt puɔ̈u?
Yeŋö yï gɔ̈i apɛi ë biäk kë cï looi?

Kuen Ɣeberuu 11:6, ku jalkë thiëc kä jäämiic:

Yeŋö bïï Yekoba luöi kɔc ye them apɛi bïk miɛt puɔ̈u?
Yeŋö ye kënë lɛ̈k yïn ë biäk të ye Yekoba yïn tïɛ̈ŋ thïn të them yïn en arëët ba Baibol ya kueen?

ALËU BÏÏ RAAN THIËC: “Ye wɛ̈tŋö ye yïn Baibol piɔ̈ɔ̈c?”