PIÖÖC 22

Ye Këdï Lëu Bïï Yïn Wël Piɛth Rɔm?

PLAY

Tɛ̈ piööc yïn ë yiith tɔ̈u ë Baibolic, ke tɛk däŋ ye takic, ‘Raan ëbën awïc bï ë kënë ŋic!’ Ee yic, raan ëbën awïc be kënë ŋic! Ku ë dhaman däŋ, yïn lëu ba riɔ̈ɔ̈c ë wɛ̈t bïï yïn kɔc kɔ̈k lɛ̈k ë biäk kë ca piɔ̈ɔ̈c. Jiëëmku yic ë mannë tɛ̈ lëu bïï yïn ë riɔ̈ɔ̈c kënë tiaam thïn ku ba jɔɔk ke yï mïtpuɔ̈u tɛ̈ bïï yïn wël piɛɛth ë Baibol ya rɔm.

1. Ye këdï lëu bïï yïn kë ca piɔ̈ɔ̈c ya rɔm ke kɔc ŋic keek?

Ee cïï dutuucke Yecu lueel: “Wo cïï aguiɛɛr [piööc] duëër pɔ̈l në kä cuk tïŋ ku piŋku ke.” (Luɔi de Tuuc 4:20) Aa ke nhiaar yic arëët ka yekë wïc bïk ya rɔm ke kɔc juëc apɛi. Nadɛ̈ ye rot yök ke yï cït kɔc kä? Na yen tɛ̈de, ke yï ye dhaman piɛth dac tïŋ bïï yïn kɔcke paanduön ku mäthku lɛ̈k kë ca piɔ̈ɔ̈c.—Kuen Kolothai 4:6.

Kuɛɛr lëu bïï yïn ke ye jɔɔk cöök

Tɛ̈ jiɛɛm yïn wek kɔcke paanduön, jɔk jam ë Baibol cöök ku lueel: “Anɔŋ këpiɛɛth miit ɣapuɔ̈u ca piɔ̈ɔ̈c ee yithbuɔ kënë yic.”
Rɔm cöök ë Baibol ë kɔc dɛɛt piɔ̈ɔ̈th we mäthdun cï tuany awu nëk diɛɛr.
Lɛ̈k kɔckuön ë luɔi cï yïn thiëëc kë cï rɔt luöi yïn yithbuɔ yic ca piɔ̈ɔ̈c ë Baibolic awu amat akutnɔmic.
Nyuöthë mäthkukuer dan ë jw.org.
Cɔl kɔc kɔ̈k bïk nyuc ë piööcdun ë Baibolic, awu nyuöth keek tɛ̈ lëu bï keek piööc ë Baibol cɔɔl ë kuer dan ë jw.org.

2. Ye wɛtŋö ye lon ë piööc kek akutnɔm kë dhuëëŋ apɛi?

Dutuucke Yecu aacï käjuëc looi ku rɔmkë wël piɛth ke kɔc ŋickë keek. Aa ke cïï Yecu ke lɛ̈k “ku tooc keek renë kapäc ku renë kapäc, bïk lɔ pänydït ëbɛ̈n ku baai ëbɛ̈n” bïk lɔ lëk. (Luk 10:1). Ku lon piɛɛth ë piööc cï guiir kënë acï kɔc juëc bën yiëk dhaman bïk piŋ ee wël piɛɛth kä. Piööc ye keek lɔ piööc ëtök ee yum de puɔ̈u bɛ̈i tënë dutuuc. (Luk 10:17) Cï lëu ba tääu yïnɔm aya ba ya lɔ piööc wek akutnɔm?

YÄP DÏT

Tïŋ tɛ̈ lëu bïï yïn riɔ̈ɔ̈c tiaam ku yök yum de puɔ̈u ë bɛ̈n tɛ̈ rɔm yïn wël piɛth wek kɔc kɔ̈k.

3. Yekoba abï tɔ̈u ke yïn

Kɔc kɔ̈k ye kɔɔr ku bïk piööc aa dhiɛl riɔ̈ɔ̈c ë biäk tɛ̈ bï kɔc kɔ̈k ke tiɛ̈ŋ thïn awu tɛ̈ bïï kɔc kɔ̈k këden yekë lɔ piɔ̈ɔ̈c dhuɔ̈k nɔm thïn.

Nadɛ̈ ye riɔ̈ɔ̈c ë biäk bïï yïn kë ca piɔ̈ɔ̈c rɔm? Ye wɛ̈tŋö, awu ye wɛ̈tŋö cien yen?

Puɔl ë BIDEO, ku jälkë thiëc bɔ̈ jäämic.

BIDEO: Ɣɛn Aacï Lɔ̈ŋ Tënë Yekoba bï Ɣɛn Yiëk Riɛl ë Puɔ̈u (4:05)

Ye këdï cïï riënythii ë Ciëëtke Yekoba riɔ̈ɔ̈cden tiaam?

Kuen Yithaya 41:10, ku jälkë thiëc kënë jäämic:

Tɛ̈ riɔ̈ɔ̈c yïn ba lɔ piööc, ke ye këdï lëu bï lɔ̈ŋ yï kuɔny?

Nadɛ̈ ŋic?

Kɔc juëc ë Ciëëtke Yekoba ee cïk kë kaŋ tak nɔn bïï keek wël piɛth kɔn rɔm ke kɔc kɔ̈k. Cït man, Thergey, ee cie rot yök ke ye raan piɛth ku ye yök ke rilic bï jam ke kɔc kɔ̈k. Ku ë tɛ̈ɛ̈n acï jäl bɛ̈n piöc ë Baibol. Acï bɛ̈n lueel: “Cɔk anɔn ye ɣɛn riɔ̈ɔ̈c, aca bɛ̈n jɔɔk ba ya jam ke kɔc kɔ̈k ë biäk kë ca piɔ̈ɔ̈c. Ku kë cï ɣɛn bɛ̈n gɔ̈i, jam ye ɣɛn jam ɣo kɔc kɔ̈k ë biäk ë kë ca piɔ̈ɔ̈c ë Baibolic acï riɔ̈ɔ̈cdiɛ̈ bën nyaai. Ku yen aya acï kë ca gam kënë bën cɔl aril apɛi ë ɣapuɔ̈u.”

4. Ye kɔc theek

Tɛ̈ rɔm yïn wël piɛth wek kɔc kɔ̈k, tääu ë yïnɔm ë kë ba lueel ku tɛ̈ ye yïn ye luɛɛl thïn. Kuen 2 Timotheo 2:24 ku 1 Petero 3:15, ku jälkë thiëc kä jäämiic:

Ye këdï lëu bïï yïn ë cök kä tääu ë luɔi yic tɛ̈ jiɛɛm yïn wek kɔc kɔ̈k ë biäkde Baibol?
Kɔc kɔ̈k ke paanduön awu mäthku aacïï lëu bïk mat ke yïn. Ke yeŋö ba looi? Ku yeŋö cïï lëu ba looi?
Yeŋö piɛɛth en ba thiëc cie raan ë rac puɔ̈u thiëëc ku cie thiëc rɛc?

5. Rɔ̈m ë wël piɛth ee yum de puɔ̈u bɛ̈i

Yekoba acï Yecu yiëk lon ë rɔ̈m de wël piɛth. Ye këdï cïï Yecu ë lon kënë tiɛ̈ŋ thïn? Kuen Jɔn 4:34, ku jälkë thiëc kä jäämiic:

Cäm ë miëth piɛth ë pïïr cɔl lɔ tueŋ ku ee ɣo miɛɛt piɔ̈ɔ̈th. Ye wɛ̈tŋö ë ye Yecu lon ë rɔ̈m ë wël piɛth thɔ̈ɔ̈ŋ—ke cäm ë kuïn?
Ye yum de puɔ̈u yïndï ye takic ke lëu bï bɛ̈n ë rɔ̈m ë wël piɛthiic?

Kä bï yïn kuɔny

Dhaman amat ë yithbuɔ ciɛlic, tïŋ kuɛɛr bïï yïn ke jam jɔɔk cöök.
Tïŋ ku ba rot mat thïn bï yï ya piɔ̈ɔ̈c amat yithbuɔ ciɛlic. Loi looi ye ke yiëk kɔc ye ke piɔ̈ɔ̈c aalëu bïk yïn kuɔny ba rot guiir ba kɔc kɔ̈k lɔ lɛ̈k kë ca piɔ̈ɔ̈c.
Luöi ë baŋ “Aye Kɔc Kɔ̈k Lueel” awu “Raan Däŋ Alëu bï Thiëc” ku ba rot piɔ̈ɔ̈c tɛ̈ bïï yïn thiëc ya dhuɔ̈knïïm thïn ku jai ye kɔc jai.

RAAN DÄŊ ALËU BÏ THIËC: “Yeŋö cï rot piac looi tënë yïn?”