PIÖÖC 38
Gaamë Alɛɛc ë Wɛ̈t Pïïr cï Gäm Yïn
Pïïr alëu bï yic thiäŋ ke käpiɛɛth ye keek yök thïn. Cɔk anɔn ye käriliic ɣok yök, ke ɣok lëu buk ŋot ke ɣo mit piɔ̈ɔ̈th ë pïïric. Ye këdï lëu bïï ɣok ye nyuɔɔth nɔn ye ɣok alɛɛc gaam ë wɛ̈t ë pïïr cï gäm ɣook? Ku ye këpiɛɛth thiekic no ye ɣook ë kënë looi?
1. Ye wɛ̈tŋö dhil ɣook pïïr ya nhiaar?
Ɣok dhil pïïr ya nhiaar wɛ̈tŋö ee miɔ̈c tënë Wäädan nhiaar ɣook, Yekoba. Ee yen “tënë ë bïï pïïr thïn ëbën”—ee yen ë cak pïïr ëbën. (Diɛt 36:9) “Ee yen ee kɔc miɔɔc kedhie në pïïr, ku wëi, ku käŋ kedhie.” (Luɔi de Tuuc 17:25, 28) Yekoba ee ɣok yiëk kë wïcku agoku ya pïïr. Ku kë wär ë kënë, ee nyin tïït ë pïïrda ë kueer ye ɣook piɔ̈ɔ̈th miɛt apɛi.—Kuen Luɔi de Tuuc 14:17.
2. Ye këdï lëu bïï ɣook ye nyuöth Yekoba nɔn ye ɣok alɛɛc gaam ë wɛ̈t pïïr cï gäm ɣook?
Mïn wään jɔɔk ë pïïrdu ye cöök ë yäny ë mooric, Yekoba aacï nyin tïït ë yïn. Ke cï thiäŋ ë riɛl ë wëidït ɣer, raan töŋ ë ye Nhialic door, Debit, aacï lueel: “Yïn cï ya tïŋ ke ya kënë kɔn dhiëëth.” (Diɛt 139:16) Yekoba ee pïïrdu tïŋ ke thiekic apɛi. (Kuen Mathayo 10:29-31.) Ee ye rac puɔ̈u arëët të looi ë raan en ke ŋic bï raan däŋ nɔ̈k, awu nɛ̈k rot yetök. a (Bɛ̈nbei 20:13) Ee Yekoba rac puɔ̈u aya të tɛ̈ɛ̈u ɣook pïïrda ë këracic ke ŋicku awu kënku dhɔ̈l piɛth biɔ̈ɔ̈thiic bïï ɣok ke pïïr ë kɔc kɔ̈k gël. Të ye ɣok nyïïn tïït ë pïïrda ku yeku pïïr ë kɔc kɔ̈k theek, ka yeku nyuɔɔth nɔn ye ɣook alɛɛc gaam ë wɛ̈t pïïr piɛɛth cï gäm ɣook.
YÄP DÏT
Tïŋ kuɛɛr kɔ̈k lëu bïï yïn ke alɛɛc ya gaam ë wɛ̈t ë pïïr piɛɛth cï gäm yïn.
3. Ye nyin tïït ë pial ë guöpdu
Kërithanoi cï pïïrden gaam aa Yekoba luöi ë pïïrden yic ëbën. Aa röt looi cït ke cï gupken gam bïk ke juɛ̈ɛ̈r Nhialic. Kuen Romai 12:1, 2, ku jälkë thiëc kä jäämiic:
-
Yeŋö lëu bï yïn puɔ̈l ba nyin ya tïït ë pial ë guöpdu?
-
Ye dhɔ̈l kɔ̈k kou lëu bïï yïn ke kënë looi?
4. Tääu yï nyin piny apiɛth ba rot gël ë tëtök awu thuɔɔu
Baibol ee ɣok dɛɛt piɔ̈ɔ̈th buk ya jai ë kä lëu bïk pïïrda rac. Puɔl ë BIDEO ku piɔ̈ɔ̈cë ë kɔ̈k ba keek looi ago pïïrdu gël.
Kuen Kɛ̈ŋ 22:3, ku jälkë jäämic të bïï yïn rot gɛ̈l thïn ku kɔc kɔ̈k . . .
-
paanduön.
-
tëdun ë luɔi.
-
të pol yïn ë käk thuɔ̈ɔ̈c.
-
të kuɛɛth yïn riäi awu të ger yïn mɔtor.
5. Ye pïïr ë mɛnh kën dhiëëth theek
Ë jam piɔlic, Debit aacï jam nɔn nhiɛɛr ë Yekoba pïïr ë mɛnh kën dhiëëth. Kuen Diɛt 139:13-17, ku jälkë thiëc kënë jäämic:
-
Ë Yekoba nyin, nadɛ̈ ye pïïr ë raan rot jɔɔk yiëëc awu të cïï ye dhiëëth?
Lööŋke Yekoba thɛɛr ë paan ë Yithrɛɛl aacï mïth kën ke dhiëëth ku märken gël. Kuen Bɛ̈nbei 21:22, 23, ku jälkë thiëc kä jäämiic:
-
Ye Yekoba raan cï pïïr ë mɛnh kën dhiëëth nɔ̈k ke kuc tïŋ këdï?
-
Lëu bï yök këdï ye puɔ̈u të cïï raan ë kënë looi ke ŋic? b
-
Yïï të ye Nhialic ë kënë tiɛ̈ŋ thïn yök këdï yï puɔ̈u?
Agut cï tiiŋ cie deetic nɔn thiek ë pïïric alëu bï ŋot ke yök bïï bei ë meth ee yen kueer töŋ lëu bï kuany. Kuen Yithaya 41:10, ku jälkë thiëc kä jäämiic:
-
Na thöc tik bï meth bɛ̈ibei, ke yeŋa bïï yen kuɔɔny ya yök tënë yen? Ku ye wɛ̈tŋö?
AYE KƆC KƆ̈K LUEEL: “Tik anɔŋ yic bï kuany nɔn bïï yen meth bɛ̈ibei—ee guöpde.”
-
Yeŋö yï kuɔny ba gam nɔn ye Yekoba pïïr ë mɛnh kën dhiëëth ke man tïŋ ke ye kë thiekic apɛi?
JAM CIEKIC
Baibol ee ɣo piɔ̈ɔ̈c buk pïïr ya nhiaar, ku thekku, ku yeku pïïr cïï Yekoba gäm ɣook gël. Ku kënë anɔŋic pïïrda ku pïïr ë kɔc kɔ̈k.
Bëër Yic
-
Ye wɛ̈tŋö ye pïïr ë mɛnh raan yic thiek tënë Yekoba?
-
Ye Yekoba yök këdï ye puɔ̈u të cïï raan däŋ ye looi ke ŋic bï raan däŋ nɔ̈k?
-
Yeŋö ye yök këpiɛth apɛi ë biäk ë pïïr cï gäm yïn yic?
YƆ̈P WËL JUËC KƆ̈K
Ye këdï lëu bïï ɣok alɛɛc dhuɔ̈k Yekoba ë wɛ̈t pïïr cï gäm ɣook?
Yök dhuknɔm ë thiëc, lëu bï Nhialic tiiŋ cï meth bɛ̈ibei päl awäc?
“Yeŋö ye Baibol Lueel ë Biäk ë Bïï ë Meth Bei?” (Awereŋ tɔ̈u ë Netic)
Të ŋic ɣok të ye Nhialic pïïr tiɛ̈ŋ thïn ke lëu bï ɣok kony buk ŋiɛc ya kuany ë käkuɔn ye ɣok ke pol.
“‘Pol Rac Apɛi’—Lëu ba Pïïrdu Tääu Thïn?” (Awake!, Pɛɛi ë Thiëër 8, 2000)
Na nɔŋ raan tɛ̈ktɛ̈k kɔɔr yen en bï rot nɔ̈k? Tïŋ të lëu bïï Baibol ye kony.
“Akaar ba Thou—Lëu bï Baibol ɣa Kony të ye Ɣɛn ye Tak ke ɣa Wïc ba Rot Nɔ̈k?” (Awereŋ tɔ̈u ë Netic)
a Yekoba ee diɛɛr arëët ë kɔc cï ke piɔ̈ɔ̈th pälwei. (Diɛt 34:18) Aa ye ke deetiic käk kɔc reem ë raan puɔ̈l bï tak nɔn bïï yen rot nɔ̈k, ku aye kɔɔr bï keek kony. Ku ba tïŋ të ye kuɔnyde käŋ waariic thïn, kuen awereŋ “Ɣɛn Wïc ba Thou—Lëu bï Baibol ɣa Kony të ye Ɣɛn ye Tak ba Rot Nɔ̈k?” cï keek gɔ̈t ë baŋ ë Yɔ̈p Wël Juëc Kɔ̈k në ye piööc kënë yic.
b Kɔc cï mïth bɛ̈ibei aacïï wïc bï ke reem piɔ̈ɔ̈th apɛi ë wɛ̈t kë cïk looi—Yekoba alëu bï keek päl awɛ̈ɛ̈cken. Ku ba käjuëc yök, tïŋ awereŋ “Yeŋö ye Baibol Lueel ë Wɛ̈t ë Bïï Bei ë Mïth?” cï gɔ̈t ë baŋ ë Yɔ̈p Wël Juëc Kɔ̈k në ye piööc kënë yic.
