PIÖÖC 46

Ye Wɛ̈tŋö Lëu Bïï Raan Pïïrde Gäm Nhialic ku Lui ë Baptith?

PLAY

Yïn ë pïïrdu gäm Yekoba ë kueer ee yïn ye thɔn ë lɔ̈ŋdu yic ke ye yen ba ya door yetök ku ye londe tääu tueŋ ë pïïrdu yic ëbën. (Diɛt 40:8) Ku tɛ̈ɛ̈n, ke yïn bï jä luöi baptith. Na ca kënë jä looi, ka ca jä nyuöth kɔc kɔ̈k nɔn cïï yïn pïïrdu gäm Yekoba. Kuëny ee ɣok pïïrda gäm Yekoba ee töŋ ë kë thiekic apɛi ë pïïrda yic lëu buk looi. Yeŋö lëu bï yï kuɔny ba tɛ̈ktɛ̈kdït thiekic kënë ee pïïr waaric kuany ba looi?

1. Yeŋö lëu bï raan kuɔny bï pïïrde gäm Yekoba?

Ɣok ë pïïrda gäm Yekoba ë wɛ̈t nhiɛɛr ɣok yen. (1 Jɔn 4:10, 19) Baibol ee ɣo yɔ̈ɔ̈k: “yïn bï Bɛ̈nydït [Yekoba] Nhialicdu aa nhiaar në piɔ̈ndu ëbɛ̈n, ku në wëiku ëbɛ̈n, ku nɔmdu ëbɛ̈n, ku riɛldu ëbɛ̈n.” (Mak 12:30) Ayeku nyuɔɔth nɔn nhiɛɛr ɣok Nhialic ë käkuɔn yeku ke lueeliic ku käkuɔn yeku looi yiic. Cït man ye kɔc nhiaar röt apɛi röt thiaak, ke nhiëërda tënë Yekoba ee ɣo cɔl agɛ̈m pïïrda yen ku luui ɣok baptith.

2. Ye athiɛɛi kou ye Yekoba ke gäm kɔcken cï ke luöi baptith?

Të cïï yï luöi baptith, ke yïn bï jä ya raan töŋ ë kɔcke paan ë Yekoba mit piɔ̈ɔ̈th. Yïn bï nhiëërde jä yök ë pïïrdu yic ë kuɛɛr juëc apɛi ku yïn bï rot jä cuöt yen apɛi awär ë köölë. (Kuen Malakai 3:16-18.) Ku ba nɔŋ Yekoba ke ye Wuur, yïn bï nɔŋ paan piɛɛth thiäŋic ke wɛ̈tamäthku ku nyïïrakäcku ë pinynɔm ëbën nhiaar Yekoba ku nhiaarkë yïn. (Kuen Mak 10:29, 30.) Ee yic, anɔŋ kä ba ke dhiɛl kɔn looi ku bï yï jä luöi baptith. Yïn wïc ba piöc ë biäkde Yekoba, ku nhiaar, ku nɔŋ gääm tënë Wënde. Kë ciëën, ke yïn bï pïïrdu dhiɛl gäm Yekoba. Na kuany ë kuɛɛr kä yiic ku luui yï baptith, ke yïn bï jä tɔ̈u ë dhöl lɔ ë pïïr athɛɛric. Aye wɛ̈t ë Nhialic lueel: “baptith . . . ee wo kony wëi aya.”—1 Petero 3:21.

YÄP DÏT

Tïŋ kë thiek en yic ba pïïrdu gäm Yekoba ku lui yïn baptith.

3. Ɣok ëbën ɣok bï dhiɛl lɔc ë raan buk ya luöi

Ë dhaman thɛɛr kɔcke Yithrɛɛl, kɔc kɔ̈k ayekï tak nɔn bïï keek Yekoba ya door ku dorkï nhialic lueth cɔl baal. Go Yekoba raan ë käk ke Nhialic tïŋ cɔl Elija bën tooc bï ke lɔ cɔ̈k nïïm piny. Kuen 1 Meliik 18:21, ku jälkë thiëc kënë jäämic:

Yeŋö ë bïï kɔc ke Yithrɛɛl lɔc bïk looi?

Cït man ë kɔcke Yithrɛɛl, ɣok aya, ɣok dhil lɔc ë raan wïcku buk luöi. Kuen Luk 16:13, Ku jälkë thiëc kä jäämiic:

Ye wɛ̈tŋö cïï ɣok Yekoba bï ya door ke raan däŋ awu kä kɔ̈k?
Ye këdï lëu bïï ɣok ye nyuöth Yekoba nɔn cïï ɣok ye lɔc buk ya door?

4. Tak yïnɔm apɛi ë nhiëër ë Yekoba tënë yïn

Yekoba acï ɣo gäm miɔ̈c dhuëŋ apɛi. Yeŋö lëuku buk gäm yen? Puɔl ë BIDEO.

BIDEO: Të Lëu Bïï Yïn Miɔ̈cdu ya Gäm Nhialic Thïn (3:04)

Ye kuɛɛr kɔ̈k kou cïï Yekoba nhiëër nyuöth yïn? Kuen Diɛt 104:14, 15 ku 1 Jɔn 4:9, 10, Ku jälkë thiëc kä jäämiic:

Ye miɔ̈c kou tënë Yekoba keek ë yï miɛɛt puɔ̈u apɛi?
Ye miɔ̈c kä yï cɔ tïŋ Yekoba këdï?

Të cïï ɣo yiëk miɔ̈c nhiaarku apɛi, ka wïcku buk alɛɛc dhuɔ̈k nɔm raan ë yïëk ɣok ë miɔ̈c kënë. Kuen Nyöŋ de Löŋic 16:17, Ku jälkë thiëc kënë jäämic:

Të tɛk yïn käjuëc cïï Yekoba ke luöi yïn ëbën, yeŋö tɔ̈u ë yïpiɔ̈u ke ba luöi yen?

5. Gɛm ë rot tënë Yekoba athiɛɛi juëc apɛi bɛ̈i

Aye kɔc juëc gam nɔn nadɛ̈ kë ŋïny bïï yï ŋic apɛi, luɔi piɛɛth ye looi awu wëu abï ke cɔl amit piɔ̈ɔ̈th. Nadɛ̈ ye kënë yic? Puɔl ë BIDEO, ku jälkë thiëc bɔ̈ jäämiic.

BIDEO: Wëny ë Kura ee Yen ë ya Looi ë Pïïrdiɛ̈ Yic Ëbën (5:45)

Cɔk anɔn ë nhiɛɛr raan pol ë kura bideo yic, ye wɛ̈tŋö ë pël en pol ë kura?
Acï bën lɔc bï pïïrde gäm Yekoba ku acie pol ë kura. Nadɛ̈ ye tak ke cï këpiɛth looi ë pïïrde yic? Ku ye wɛ̈tŋö?

Wään ŋoot ë dutuc Paulo ke kën guɔ ya Kërithano, ee nɔŋ luɔi dïït thiekic ë nhiɛɛr ë kuɛny cöök bï looi. Aacï löŋ ë Judai piɔ̈ɔ̈c ke dupiönydït ŋic apɛi. Ku acï ë käkë bën nyäŋ piny ë wɛ̈t bïï yen ya Kërithano. Nadɛ̈ cï Paulo piɔ̈u bën dhiɛɛu wei ë kä cï keek nyäŋ piny? Kuen Pilipoi 3:8, ku jälkë thiëc kä jäämiic:

Ye wɛ̈tŋö ë ye Paulo ye lueel kä cï keek looi wään kën yen guɔ ya Kërithano aa ke yeke tïŋ ë ke cït kä cï “riääk” awu kä cïn nïïm luɔi?
Yeŋö cï bën yök wën cïï yen ë käkë puɔ̈l?
Ye këdï lëu bïï yïn londun ye yïn Yekoba luöi thɔ̈ɔ̈ŋ ke kä kɔ̈k yeke looi ë pïïrdu yic?