Yecu ee yen Wat akut ë Kërithanoi nɔm. (Epethiei 5:23) Ë yeköölë, ke rëër ë thönyde nɔm paannhial, Yecu ee kɔcken ye biɔɔth cöök ë pinynɔm ëbën nyuööth ë kueer “aluaŋ nɔŋ gäm ku ŋic käŋ.” (Kuen Mathayo 24:45.) Ke ye Yecu yen lɔc keek ë guöpde, ka “aluaŋ kënë” abï nɔŋ riɛl ku abï rëër ke ye aluaŋ ë Këritho ku luui wɛ̈tamäthkëën ë Këritho. Aluaŋ kënë yeŋa? Ye këdï ye aluaŋ kënë nyin tïït ë ɣook?

1. Yeŋa yen “aluaŋ nɔŋ gäm ku ŋic käŋ”?

Yekoba acï mɛnh ë raan dac luöi awu akut thiin ë kɔc bïk kɔcke ya nyuööth. (Malakai 2:7; Ɣeberuu 1:1) Wään cïï Yecu thou, go Yekoba dutuuc ku röördït tɔ̈u ë Jeruthalɛm kuany bïk kɔcke watnïïm. (Luɔi de Tuuc 15:2) Ke biɔɔth ë kënë yic, yeköölë akut thiin ë röördït​—ye cɔɔl Akut ë Röördït Wat Akutdït ë Ciëëtke Yekoba nɔm​—ee miëth ë wëi bɛ̈i ku nyuuth kɔc ë lon ë piööcic. Aa kut kënë “yen aluaŋ nɔŋ gäm ku ŋic käŋ cïï [Yecu] kuany.” (Mathayo 24:45a) NWT. Kɔc tɔ̈u Akut ë Röördït Wat Akutdït Nɔm yic ëbën aa cï keek lɔc ë wëidït ɣer, ku anɔŋ ŋäth bïk lɔ mat ke Këritho paanhial të le pïïrden ë pinynɔm thök.

2. Ye miëth ë wëi yïndï ye aluaŋ nɔŋ gäm ku ŋic käŋ bɛ̈i?

Aacïï Yecu lueel nɔn bïï aluaŋ nɔŋ gäm “cäm ë wëi gäm [Kërithanoi] ë dhamande yic.” (Mathayo 24:45b) NWT. Cït man ye kuïn yeku caam ɣok kony buk rëër ke ɣo ril ku piɔlku gup, kuïn ë wëi​—ke ye wëët bɔ̈ ë wɛ̈tde Nhialic yic​—ee ɣook gäm riɛl wïcku buk rëër ë gäämda yic tënë Yekoba ku lokku tueŋ ke lon cïï Yecu yiën ɣook. (1 Timotheo 4:6) Miëth ë wëi kënë ayeku yök ë kueer amɛtmɛɛt, amat akutnïïm juëc, ku amatdït, ku ayeku yök aya ë kueer athöör ye keek gɛ̈t bei ë Baibolic ku bideoth ë ɣo kuɔny buk kë wïc Nhialic deetic ku yekë mänhda looi bï riɛl ke yen.

 YÄP DÏT

3. Kɔcke Yekoba aa dhil nɔŋ akutnɔm

Ë riɛl ë Yecu yic, Akut ë Röördït Wat Akutdït Nɔm ee lon ë Ciëëtke Yekoba guiir. Aguiɛɛr kënë aa tɔ̈u tënë Kërithanoi tueŋ wään. Puɔl ë BIDEO.

Kuen 1 Korinthoi 14:33, 40, ku jälkë thiëc kënë jäämic:

• Ye këdï ye cök kä ye nyuɔɔth nɔn kɔɔr Yekoba Ciëët ke bïk naŋ akutnɔm?

4. Aluaŋ nɔŋ gäm ee londan ë pïööc guiir

Lon ë piööc ee kë thiekic apɛi ye Kërithanoi tueŋ wään looi. Kuen Luɔi de Tuuc 8:14, 25, ku jälkë thiëc kä jäämiic:

• Ë Kërithanoi tueŋ wään yiic, yeŋa ë ye kɔc nyuööth ë lon ë piööcic?

• Yeŋö cïï Petero ku Jɔn looi wään cïï ke nyuööth ë dutuuc kɔ̈k kä?

Lon ë piööc ee këdïït thiekic ye Akut ë Röördït Wat Akutdït Nɔm guiir. Puɔl ë BIDEO.

 Aacïï Yecu nyuɔɔth të thiek ë lon ë piööc yic thïn apɛi. Kuen Mak 13:10, ku jälkë thiëc kä jäämiic:

• Ye wɛ̈tŋö ye lon ë piööc yic thiɛk apɛi tënë Akut ë Röördït Wat Akutdït Nɔm?

• Ye wɛ̈tŋö wïc ɣook “aluaŋ nɔŋ gäm ku ŋic käŋ” bï lon ë piööc kënë ya guiir ë pinynɔm ëbën?

5. Aluaŋ nɔŋ gäm ee kɔc nyuööth

Akut ë Röördït Wat Akutdït Nɔm ee Kërithanoi nyuööth ë pinynɔm ëbën. Ye këdï ye yen kueer yen kɔc nyuööth lɔc? Tïŋ të ye Akut ë Röördït Wat Akutdït Nɔm ë dhaman Kërithanoi thɛɛr wään luöi yen. Kuen Luɔi de Tuuc 15:1, 2, ku jälkë thiëc kä jäämiic:

• Yeŋö ë cï teer bɛ̈i tënë Kërithanoi kɔ̈k tueŋ wään?

• Yeŋa cïï Paulo, ku Barnaba, ku jɔl ya kɔc kɔ̈k lɔ tënë yen bïk kënë lɔcɔ̈k piny?

Kuen Luɔi de Tuuc 15:12-18, 23-29, ku jälkë thiëc kënë jäämic:

• Keke kën guɔ lɔc kë bïk looi, yeŋö ë cïï Akut ë Röördït Wat Akutdït Nɔm thɛɛr wään kɔn takic ku bïï Yekoba ke jäl nyuööth?​—Tïŋ cök 12, 15, ku 28.

Kuen Luɔi de Tuuc 15:30, 31 ku 16:4, 5, ku jälkë thiëc kä jäämiic:

• Yeŋö ë cïï Kërithanoi tueŋ wään looi ɣɔn cïï Akut ë Röördït Wat Akutdït Nɔm ke nyuööth?

• Ye këdï cïï Yekoba keek bën thieei ë wɛ̈t athɛɛkden?

Kuen 2 Timotheo 3:16 ku Jakop 1:5, ku jälkë thiëc kënë jäämic:

• Ye tëno ye Akut ë Röördït Wat Akutdït Nɔm kuɔɔny yök thïn të kɔɔr keek bïk lɔc ë kë bïk looi yeköölë?

 JAM CIEKIC

Akut ë Röördït Wat Akutdït Nɔm ee yen “aluaŋ nɔŋ gäm ku ŋic käŋ” cïï Këritho kuany. Ee kuïn wëi gaam ku nyuuth Kërithanoi ë pinynɔm ëbën.

Bëër Yic

• Yeŋa ë kuany “aluaŋ nɔŋ gäm ku ŋic käŋ”?

• Ye këdï ye Akut ë Röördït Wat Akutdït Nɔm nyin tïït ë ɣook?

• Nadɛ̈ ye gam nɔn ye Akut ë Röördït Wat Akutdït Nɔm yen “aluaŋ nɔŋ gäm ku ŋic käŋ”?