Kërithanoi yic acïk gam ë piɔ̈nden ëbën nɔn cïn yen kë bï keek pëën awu raan bï ke gëlnïïm ë duɔ̈ɔ̈rden yic tënë Yekoba. Ke cïn dak ë puɔ̈u aye dhiɛl yök ë yïpuɔ̈u këya aya. Yekoba ee rëërdu ë gäämic thieekic apɛi. (Kuen 1 Lëk de Akööl 28:9.) Ye käŋö lëu bïk rëërdu ë gäämic tënë yen them, ku ye këdï bïï yïn ke tiaam?

1. Ye këdï lëu bïï kɔc kɔ̈k rëërda ë gäämic tënë Yekoba them?

Abïï kɔc kɔ̈k them bïk ɣo gël buk Yekoba cïï luui. Yeŋa be kënë looi? Kɔc kɔ̈k cï jäl ë yicic aa lueeth lueel alɔŋ akut ë Nhialic ë wɛ̈t bïï keek gäämda racic. Ayeke cɔɔl kɔc cï gät ë yicic. Ku yen aya, bäny ë kanithat kɔ̈k aa lueeth lueel ë biäkda lueth wën lëu bïk kɔc puɔc bën ë yicic cɔl apäl yic. Alëu bï rɛ̈ɛ̈c apɛi tënë ɣok tɛ̈ ye ɣok teer ke keek, ku kuenku athöörken, awu yeku lɔ ë kueerden ë netic awu ɣoiku bideothken. Tɛ̈ le yen bën alɔŋ kɔc ye them bïk kɔc kɔ̈k looi bïk piɔ̈ɔ̈th dak ë gäämden yic tënë Yekoba, ee cïï Yecu lueel: “Pälkï keek, ayek cöör thel cöör. Ku të thelë cɔɔr, cɔɔr ka bïk lööny ë adhumic keek kaarou.”​—Mathayo 15:14.

Ku na cïï raan töŋ ŋicku tak ke cïï wïc bï bɛ ya raan töŋ ë Ciëëtke Yekoba? Alëu bï ɣo reem piɔ̈ɔ̈th apɛi tɛ̈ ye yen raan thiääk ke ɣok. Raan kënë alëu bï ɣo bɛ̈i tɛ̈ wën dhil ɣok lɔc ë kaamde ke Yekoba. Abuk dhiɛl gam ë ɣopiɔ̈ɔ̈th ëbën buk rëër ë gäämda yic tënë Nhialic ë këriëëc ëbën yic. (Mathayo 10:37) Ka yen, ɣok aa löŋ ë Yekoba theek buk cïï ye cath ke kɔc rɛɛc kä.​—Kuen 1 Korinthoi 5:11.

2. Ye kä cïï raan ke lɔc kou lëu bïk rëër ë gäämda yic tënë Yekoba them?

Nhiëërda tënë Yekoba abï ɣo kony buk röt cïï mɛt ë käk ë duɔ̈ɔ̈r ë lueth yic. Acukku wïc bï londan yeku looi awu akutnɔm tɔ̈u ɣok thïn awu loi looikuan yeku ke looi ya mat ke duɔ̈ɔ̈r lueth. Yekoba ee ɣo thɔn nïïm: “Bäkï bei thïn, wek kɔckï.”​—Nyuuth 18:2, 4.

 YÄP DÏT

3. Tääu yï nyin piny apiɛth ë wɛ̈t dupiööc ë lueth

Yeŋö lëuku buk ya looi tɛ̈ cïï ɣok kärɛɛc yeke luɛɛl akutnɔm ë Yekoba guɔ̈p piŋ? Kuen Kɛ̈ŋ 14:15, ku jälkë thiëc kënë jäämic:

• Ye wɛ̈tŋö bïï ɣok ɣo nyïïn ya tääu piny apiɛth buk cïï ye gam ë kuat kë cuk piiŋ?

Kuen 2 Jɔn 10, ku jälkë thiëc kä jäämiic:

• Ye këdï bïï ɣok kɔc cï gät ë yicic ya ciëëŋ?

• Na cɔk anɔn cïï ɣok lëu buk rɔ̈m ku jiɛɛmku ke keek, keye këdï bïï ɣok piööcden ya yök?

• Ye takic ke lëu bïï Yekoba yök këdï ye puɔ̈u tɛ̈ ye ɣok piŋ kärɛɛc yeke luɛɛl ë ye guɔ̈p awu akutnɔmde?

4. Rɛ̈ɛ̈rë gäämdu yic tënë Nhialic tɛ̈ cïï wänmääthda awäc looi

Tɛ̈ cïï ɣok ye ŋic nɔn nadɛ̈ ke raan töŋ akutnɔm acä awänydït looi, ke yeŋö lëuku buk looi? Tïŋku löŋ ë kɔc kuɔny ë pïïric ë cïï Nhialic yiën kɔc thɛɛr ke Yithrɛɛl. Kuen Lebai 5:1.

Cïtmën cïï ɣok ye kueen ë cöök kënë yic, tɛ̈ cïï ɣok ye piiŋ nɔn cïï raan töŋ akutnɔm awänydït looi, ke ɣok aa lëk röördït kë ŋicku. Ke ɣo këc kënë guɔ looi, alëu bï piath tɛ̈ lɛ̈k ɣok raan ca awäc looi bï lɔ tënë röördït ba awänyde lɔ lek yetök. Ku na jiɛi bï ë kënë looi, ke rëërda ë gäämic tënë Yekoba alëu bï ɣo puɔ̈l buk kë ŋicku la lɛ̈k röördït. Ye këdï ye kueer kënë nhiëër lagɔ̈k nyuɔɔth tënë . . .

• Yekoba Nhialic?

• raan cä awäc looi?

• kɔc kɔ̈k akutnɔm?

 5. Mɛɛc ë rot wei ë Babilondït yic

 JAM CIEKIC

Ku buk rëër ë gäämic tënë Yekoba, akɔɔr ɣok buk cïï cath ke kɔc cie rëër ë gäämden yic tënë Yekoba. Awïc ɣok aya buk röt mɛɛc wei ë duɔ̈ɔ̈r ë luethic ëbën.

Bëër Yic

• Ye wɛ̈tŋö cïï ɣok bï ya daai ë bideoth, awu kuënku athöör, awu pïïŋku tënë kɔc cï gät ë yicic?

• Ye këdï lëu bïï ɣok kɔc cïï ye wïc bïk bɛɛ ya Ciëëtke Yekoba ya ciëëŋ?

• Ye këdï lëu bïï ɣok thɔ̈n nɔm ë jääl ë duɔ̈ɔ̈r luethic lac gam?