Wɛ̈tamäthkuɔ ku Nyïïrakäckuɔn Nhiarku Keek:

Nhiëër nhiɛɛr ɣok Nhialic ku kɔc ee ɣo puɔ̈l buk ‘juöör aa [lɔ] wɛ̈ɛ̈t kedhie, abïk a kɔcpiööcë, ku luiku keek baptith.’ (Math. 28:19, 20; Mak 12:28-31) Nhiëër cïnic tiɛɛl anɔŋ riɛl. Ee kɔc ‘cï lɔc an, bïk dɛ pïïr athɛɛr’ gɔɔt piɔ̈ɔ̈th.—Luɔi de Tuuc 13:48.

Ë dhaman thɛɛr wään cï lɔ, kën ë ye ɣok ɣonïïm tääu thïn apɛi ee nɔn buk jam cï nyuɔɔth cuɔth ë ɣonïïm ku gɛmku awereek. Ku ëmën akɔrku buk röt piɔ̈ɔ̈c ku yeku të ye ɣok jiɛɛm thïn ke kɔc cɔ̈k piny. Awïcku buk nhiëër anyuɔ̈th kɔc kɔ̈k ë kueer wën bïï ɣok ya jam ë kä nhiarkë keek. Ku kënë aye nyuɔɔth nɔn kɔɔr yen ɣok buk jamda ya waaric ku buk kë wën nhiɛɛr kuat raan ëbën ë jam ke ɣok muk ë ɣonïïm. Ye këdï bïï awereŋ thiin ë piööc kënë ɣo kuɔny buk ë kënë looi?

Awereŋthiin ë piööc kënë anɔŋic piööc kathiëër ku rou (12) nyooth kït wën lëu bïk ɣok kuɔny ë lon ë piöoc yic të ye ɣok kɔc lɔ piɔ̈ɔ̈c. Piööc tök awereŋ kënë yic ajam alɔŋ ë Yecu awu kɔc thɛɛr wään ë ke ye piööc cï kïn tök luɔ̈ɔ̈i ë londen ë piööc yic. Kë wïcku buk looi, ee nɔn bïï ɣok kuɛɛr ye ɣok ke nhiëërda nyuɔ̈th kɔc kɔ̈k ya yɔ̈ɔ̈p, ku acie nɔn bïï ɣok jam cï nyuɔɔth ya cuɔth ë ɣonïïm. Cɔk anɔn lëu bïï ɣok ë kïtkä ëbën luɔ̈ɔ̈i ë londan ë piööcic, ka buk tïŋ të lëu bïï ɣok kïn tök ya luɔ̈ɔ̈i thïn të jɔɔk ɣok jam cöök, të ye ɣok kɔc lɔ neem, ku jɔl ya të ye ɣok kɔc lɔ piɔ̈ɔ̈c ë Baibol.

Ke yï kuen piööc tök awereŋ kënë yic, tak yïnɔm apiɛth të bïï yïn kïn tök ya luɔ̈ɔ̈i thïn të jiɛɛm yïn ke kɔc paandun rëër yïn thïn. Them ba nhiëër nhiɛɛr yïn Yekoba ku kɔc looi bï riɛl. Nhiëër kënë, abï yïn kuɔny ba tiɛm të ye yïn kɔc lɔ piɔ̈ɔ̈c, ku acie kueerdun ye yïn kɔc piɔ̈ɔ̈c yetök.

Ɣok aa mit puɔ̈th apɛi ë wɛ̈t athiɛɛidïït luui ɣok ke week ëtök. (Dhep. 3:9) Ɣok aa lim Yekoba bï we thieei bäk lɔ tueŋ ke we nhiar kɔc ku piɔ̈ɔ̈ckë keek!