Yïn Lëu ba Pɛ̈l ë Puɔ̈u Wei Tiaam

Ye käriliic yï yök pïïric tïŋ këdï? Aye kɔc juëc cï piöc lueel nɔn nadɛ̈ të bïï yïïn thiëc kënë dhuɔ̈knɔm thïn, aye nyuɔɔth nɔn le yïn nɔm ŋɔ̈th awu ciën nɔm ŋɔ̈th. Ɣok ëbën, ɣook ye käriliic ke yök pïïric, ku käk kɔc kɔ̈k aa ja bɛ rɛ̈ɛ̈c apɛidït. Ye wɛ̈tŋö ye kɔc kɔ̈k ye them bïk lɔtueŋ, cɔk aa nɔn ye käriliic ke yök pïïric, ku ye wɛ̈tŋö ye kɔc kɔ̈k ke puɔ̈th guɔ päl wei, të le yen kë thiin cï rot looi?

Cït man, jɔl thɔ̈ɔ̈ŋ yicda, yïïn wïc luɔi. Go yï them tënë luɔɔi ku yïïn cï bɛ̈n löny. Ye yök këdï yïpuɔ̈u të cïï ke cït kënë rot luɔ̈ɔ̈i yïn? Yïn lëu ba yïpuɔ̈u guɔ pälwei, ku ye rot yök cït ke yï cï luɔɔi bï bɛn yök pïïrdu yic. Awu yïn lëu ba kënë puɔ̈l bï yï cɔl ë täk nɔn cïn en kë ba bɛ lëu ë pïïrdu yic ëbën. Ku alëu ba lueel, ‘ɣɛn raan cïn kë lɛ̈u ba luɔ̈i kɔc kɔ̈k.’ Ku tɛ̈ktɛ̈k cït ë kënë, ee yen pɛ̈l ë puɔ̈u wei bɛ̈ɛ̈i.

Gök Pɛ̈l ë Puɔ̈u Wei

Ye këdï bïï yïïn pɛ̈l ë puɔ̈u wei tiaam? Kueer töŋ tueŋ bïï yïïn pɛ̈lë puɔ̈u tiaam, ee wɛ̈t bïï yïn kärɛc ye ke takiic kaŋ ŋic. Ku kueer ë rou, ee wɛ̈t ba ke ja göök. Apiɛth ba yïnɔm kaŋ tak, yeŋö päl yïïn ba yï puɔ̈u päl ë wei. Cït man, nadɛ̈ cï bɛ̈ny ë luɔi jaai bï yï cïï luui wɛ̈t kuc yïïn luɔi? Awu nadɛ̈ bɛ̈ny ë luɔi kënë wïc raan wën ŋic luɔɔi apiɛth?

Të tääu yïn yïnɔm piny ba ŋic, yeŋö ë pɛ̈l yïïn ba yïpuɔ̈u päl wei, ka lëu bï yï kuɔny ba pɛ̈lë puɔ̈u wei göök. Nadɛ̈ ye jaai cïï kɔc jaai yïïn aa yic tök nyuɔɔth nɔn cïn en kë lëu ba bɛ lëu ë luɔi ë pïïric, awu lëu ba yïnɔm tak ë ɣɔ̈n kɔ̈k cïï yïïn tiam thïn ë pïïrdu yic, cït man, käkun ë wëi yiic, määth ke kɔc baai paandun, awu mäthku? Piɔ̈ɔ̈cë rot ba ya jaai, ba yïnɔm cïï tɛ̈ɛ̈u “kärɛc” bï röt looi pïïrdu yic. Ku yïïn nɔm, lëu ba takic: yïïn cï luɔi bï kaŋ bɛn yök pïïrdu yic? Anɔŋ kä lëu ba ke looi ku ba pɛ̈lë puɔ̈u wei tiaam.

Ye Ŋiɛc Tak Nɔn Bïï Käpiɛth Röt Looi ë Pïïrdu Yic

Ë run thiɔ̈k wään cï lɔ, kɔc yäp looi athöriic, aa cï ŋɔ̈th laaric keye kë thiin piɔlic cïn kë lëu bï kuɔ̈ny raan. Ayekë lueel, ŋɔ̈th ee raan kuɔny bï këden cï tääu yenɔm thöl ë luɔi. Cït man bïï awereŋ bï bɛ̈n tueŋ ye jäämic, ŋɔ̈th acie raan ë kuɔny bï këden cï tääu yenɔm thöl ë luɔi yetök, anɔŋ kä kɔ̈k ye ke kuɔ̈ny raan aya, ku këden cïk lueel kënë, alëu bï kɔc kuɔny dhɛ̈l kɔ̈k yiic aya. Na yeku naŋ ŋɔ̈th pïïrda yic, ka lëu bï ɣo kuɔny buk ɣonïïm ya tääu këpiɛɛth bï rot looi pïïrda yic, buk käkuɔn cuk ke kuany ya thöl ë luɔi.

Na yeku gam nɔn bïï ɣok käpiɛth looi pïïrda yic, awïc ɣook buk käkuɔn cuk ke kuany ya gät piny ku thöl ku keek ë luɔi. Na ciën nɔm käkun ca ke gät piny ba ke looi, ke yïïn lëu ba yïnɔm tak käpiɛth wën lëu ba ke looi pïïrdu yic. Kë tueŋ, nadɛ̈ nɔŋ kë ca tääu nɔm ba looi? Acïï yic piɔl buk dac ya kuany käpiɛth thiekiic buk ke looi, wɛ̈tŋö ɣook aa nïïm thiäŋ käjuëc yeku ke looi dhaman thok ëbën. Të le yen bɛ̈n biäk kä thiekiic bïï raan ke kuany bï ke tääu tueŋ pïïrde yic, kënë ee cïï Baibol guɔ lueel dhaman thɛɛr: “Yakë käpiɛth thiek yiic tääu tueŋ.”—Pilipoi 1:10. NWT

Na nɔŋ käthiekiic cuk ke kuany buk ke looi pïïrda yic, ka lëu bï yic pial buk käthiekiic tääu tueŋ pïïric, cït man, käk ë wëi, ciɛɛŋ ë baai, ku jɔl ya luɔi. Acï piɛth buk käkuɔn buk ke looi ya kuany ke juëc ë dhaman tökic, wɛ̈tŋö acïï lëu bï yic pial buk ke thöl ë luɔi ëbën. Ka yeen, awïcku buk kädït thiekiic cuk ke kuany buk ke looi ya tɛ̈ɛ̈kiic käthii kor wën cekiic lëuku buk ke thöl ë luɔɔi.

Anɔŋ kääŋ ye lueel, “na cïï raan kuany bï naŋ ke looi, ka lëu bï dhiɛl thöl ë luɔɔi.” Ka yeen, kääŋ kënë lëu bï ya yic. Të nɔŋ en kädït thiekiic cuk ke kuany ë pïïrda yic buk ke looi, awïcku buk riɛlda tääu thïn ëbën ku thölku keek ë luɔi. Ɣok aa lëu buk riɛl ë piända juakic të ye ɣok ɣonïïm tak käpiɛth lëu bïk bɛ̈n bei thïn, të cïï ɣok käkuɔn cuk kë kuany thöl ë luɔi. Yic adiil, anɔŋ käriliic lëu bïk ɣo yök käkuɔn cuk ke kuany buk ke looi yiic, ku keek käriliic kä, aa cuk lëu buk ke ya tïŋ keke ye kä wën lëu bïk ɣo pëën buk käkuɔn cuk ke kuany cïï thöl ë luɔi. Aa lëu buk ke tïŋ keke ye käthii piɔliic lëu buk ke tiaam.

Ku yeen aya, ɣok aa lëu buk ɣonïïm ya tak dhɛ̈l kɔ̈k bïï ɣook käkuɔn cuk ke kuany ya thöl ë luɔi. Raan gɛ̈t athöör cɔl Riik Thinder, ë cï thiɛk yic ŋɔ̈th piɔ̈ɔ̈c, ee cï bɛ̈n lueel, yïn lëu ba yïnɔm ya tak kuɛɛr juëc wääciic bï yïïn këdun ca kuany thöl ë luɔɔi. Na ca them ba kueer tueŋ luɔ̈ɔ̈i ku akëc luui, ke yï them kueer ë rou, kueer ë diäk ku jɔl aa kuɛɛr juëc kɔ̈k.

Acïï Thinder lueel aya, na këc kë tueŋ ca kuany rot lëu ë luɔi, ka lëu ba waaric ku kuany dɛ̈t wën piɔlic lëu ba looi. Na nɔŋ ke cï ɣo pëën buk këdan cuk kuany cïï thöl ë luɔɔi, ka kënë alëu bï ɣo cɔl apɛ̈l ɣo puɔ̈th wei buk dɛ̈t cïï ben looi. Ku dɛ̈t lëu buk looi, ee wɛ̈t buk käriliic wën cukku ke lëu ë luɔi waar ë kä piɔliic lëuku buk lëu ë luɔi, ku kënë alëu bï ɣo gäm ŋɔ̈th.

Baibol anɔŋic anyïkööl wën lëu bïk ɣo kuɔny ë biäk ee kënë. Ee tɔ̈ Melik Debid puɔ̈u bï luaŋ Yekoba Nhialicde buth. Ku acïï Nhialic bɛ̈n lɛ̈k Debid, acie yïïn bï luak buth, ee wëndu Tholomon, ee yen bï naŋ athiɛɛi bïï yen luak buth. Ku wɛ̈t ee kënë, Debid akëc ye puɔ̈u bɛ̈n tääu ë riäŋ piände yic, acie nɔm bɛ̈n waar ku kuɛny dɛ̈t bï looi. Debid acï rot bɛ̈n juaar ku kony wënde bï kä wën bïï luak looi guiir.—1 Meliik 8:17-19; 1 Lëk de Akööl 29:3-7.

Cɔk aa nɔn lëu bïï ɣok pɛ̈l ë puɔ̈u wei tiaam, ku yeku pïïr ŋiɛc tïŋ ke piɛth, ke ɣok aa lëu buk ɣopuɔ̈th pälwei ë dhaman dɛ̈t. Ye wɛ̈tŋö ye kënë rot looi? Ee wɛ̈t käriliic ɣo yök ee piny kënë nɔm, aa käriliic wën cukku ke lëu buk ke tiaam. Të tïŋ ɣok käriliic mɛnh ë raan yök pinynɔm yeköölë, cït man, ŋɔ̈ɔ̈ŋ, tɔŋtɔɔŋ, yaaŋ ë rot, tuɛnytuɛny ku jɔl aa thuɔɔu, ye këdï lëu bïï ɣok rëër ke ɣo nɔŋ ŋɔ̈th cɔk aa nɔn guum ɣook käriliic cït käkë?

[Thura]

Na ca lɔ yɔ̈ɔ̈p ë luɔi, ku yïïn këc luɔɔi yök, lëu ba takic yïn cï luɔɔi bï kaŋ bɛn yök pïïrdu yic?

[Thura]

Wään këc yen rot lëu bï Melik Debid luak buth, acie nɔm bɛ̈n waar ku kuɛny dɛ̈t bï looi