2. Cɔŋdït

“Cɔŋdït abï aa nu [tɔ̈u].”—Mak 13:8.

● Moc acï lɔ paan thiin ë Kuaratadji, tɔ̈u paan ë Niger, ku aye ŋɔ̈ɔ̈th nɔn bïï yen këcam lɔ yök thïn ë tɛ̈ɛ̈n ë wɛ̈t nɛ̈k ë cɔk en. Kɔc ruääi ke moc kënë aya, wɛ̈tamäthke, ku nyïïrakäcke, aacï jääl paanden rëër keek thïn bïk lɔ paan däŋ bïk lɔ göör ë këcam aya. Ku yen mony kënë, acï tɛ̈c ë thëjaja yic awu ë bïrïcic piiny. Ye wɛ̈tŋö ye yen rëër yetök? Acïï raan cɔl Thidi, Thultän mac ë paan thiin kënë bɛ̈n lueel, “Ee wɛ̈t cïn yen kë tɔ̈u ke yen bïï yen kɔcke kuɔny, ku acïï nhiar bï ke ya tïŋ keke nɛ̈k cɔk keek, ku acïn të lëu bïï yen keek kuɔny.”

YEŊÖ YE KÄ CÏ RÖT LOOI KÄ NYUƆƆTH? Të cït raan buɔɔt kadhetem malliön ë pinynɔm ëbën aa nɛ̈k cɔk keek. Ku jɔ rɛ̈ɛ̈c apɛi ë bɛ̈ɛ̈i tɔ̈u ë sub Saharan tɔ̈u paan Apirika, ë wɛ̈tŋö, të cït raan buɔɔt karou ku thiërdiäk ku dhïc malliön aa nɛ̈k cɔk keek thïn ë tɛ̈ɛ̈n. Jɔl thɔ̈ɔ̈ŋë yicda, të le baai yic moc, tik ku meth, ku cäm tɔ̈u ke keek ee cäm ë kɔc karou, yeŋa lëu bï rëër ke cïï ciëm? Nadɛ̈ ye mony ë baai, ye tiiŋ baai, awu ye meth? Kënë, ee këtöŋ rilic ye kɔc baai kuany bïk looi ë dhaman thok ëbën.

YEŊÖ YE KƆC JUËC LUEEL? Aye kɔc juëc lueel, pinynɔm athiäŋic ë käcam juëc wën lëu bïk raan ëbën lëu. Ka yen, käcam juëc tɔ̈u pinynɔm ëbën aa piɛth bï ke ŋiɛc ya luɔ̈ɔ̈i agokë raan ëbën lëu.

NADƐ̈ KË YE KƆC LUEEL YE YIC? Ee yic, kɔc ë pur aa käcam juëc puur ku tekkë ke piny yeköölë kä wär dhaman thɛɛr. Yic pacɔ̈k, akumat ke pinynɔm alëukë bïk käcam cï ke puur ya tɛ̈k raan ëbën bïï cɔk ke cïï nɛ̈k. Ku cɔk aa nɔn cïï keek ye them ë dhaman bääric bïk looi këye, ke yen, akëckë bɛ̈n lëu.

YEŊÖ YE TAKIC? Nadɛ̈ këc kë cïï buŋ Mak 13:8 lueel rot tiɛŋ tëde? Cɔk aa nɔn cïï piöc ë mɛnh ë raan ye nyin juak ë pinynɔm, nadɛ̈ ŋot ë käcam ke dak kɔc ë pinynɔm ëbën?

Ayiëkyiëëk ë piny ku cɔŋdït, aa jɔ lɔ ke juak ke nyïïn arëët ë wɛ̈t tɔ̈u ɣok ë kööl ë thök nïn ke pinynɔm.

 [Blurb on page 5]

Acïï BƐ̈NY Ë UN Ë NYIN TÏÏT Ë MÏTH ye cɔɔl ANN M. VENEMAN lueel, “ë ruɔ̈ɔ̈n thok ëbën, mïththii juëc aa thou ë wɛ̈t ë nɛ̈k ë cɔk keek. Ku jɔl aa tuɛnytuɛny cït man, yitiääbat, yäc ku jɔl ya tuɛnytuɛny kɔ̈k.”

[Picture Credit Line on page 5]

© Paul Lowe/Panos Pictures