BAIBOL EE PÏÏR Ë KƆC WAARIC

Ye wɛ̈tŋö ë pɛ̈l tiiŋ nɔŋ ruɔ̈ɔ̈n thiërdhetem [60] duɔ̈ɔ̈r ë yiëth? Ye wɛ̈tŋö ë mɛ̈l ë raan ye duɔ̈ɔ̈r ë jɔŋ ye cɔɔl Cinto ku wɛɛr rot bï ya Kërthian? Yeŋö ë kony tiiŋ cïï kɔc ke dhiëth en nyääŋ piny ɣɔn koor en bïï kɔc kɔ̈k lɔ̈k kuany ku mukkë bï dït ku le tueŋ ke gum tɛ̈ktɛ̈k rɛɛc ë bɛ̈n yenɔm? Tïŋku kë cïï kɔc kä lueel.

“Acïï lueel ABA DANSOU, ɣɛn cïï bɛn ya luaŋ ë yiëth.”

RUN Ë DHIËTH YEN: RUƆ̈Ɔ̈N TIƐM TÖK KU BUƆƆT KADHOŊUAN KU THIËRDIÄK KU BƐ̈T [1938]

PAAN Ë DHIËËTH YEN THÏN: BENIN

ANYÏKÖL: RAAN Ë DUUR Ë YIËTH

KÄ CÏ RÖT LOOI Ë PÏÏRDIƐ̈ YIC: Ɣɛn aa dhiëth paan thiin ye cɔɔl Tho-Tchahoué, ku paan thiin kënë athiääk ke wär ku ee boor. Kɔc rëër ë paan thiin kënë, aa mac ë ɣɔ̈k, amɛ̈l, kuthuruuk, thök awu apïyeem, ku ajïïth, ku keek aya, aa mai ë rec. Paan thiin kënë, ee cïnic kuɛɛr dït wën lëu bïï riäth tëëk thïn, ka keek, aa ke ye riäth wïïr luɔ̈ɔ̈i bïï keek ke cath. Kɔc juëc ke yiic ëtɛ̈ɛ̈n, aa ke ye ɣöötken looi ë tiim ku yïk kë keek ë noon, ku kɔc kɔ̈k aa ke ye ɣöötken buth ë tuup. Kɔc juëc ke yiic, aa ŋɔ̈ŋ awu aa cïn nïïm käjuëc. Cɔk aa nɔn ë riil ë käŋiic ë paan thiin kënë, ee cïnic cuëër awu kärɛc juëc ë röt looi thïn cït man ye keek röt looi ë madïna yic.

Ë dhaman wään kuɔɔr en, wää acï ɣɛn ku nyankäi bɛ̈n tuɔɔc ë yïknɔm të wën ye kɔc lɔ duur thïn yiëth, bï ɣook lɔ mat thïn buk ya duur ë yiëth aya. Wään cïï ɣɛn jä dït, ɣɛn cï jɔŋ ye cɔɔl Dudua (Oduduwa) ye kɔc ë paan Yoruba door bɛ̈n looi bï ya yen ë jɔŋdiɛ̈n ya door. ɣɛn cï jɔŋdiɛ̈n kënë bɛ̈n luɔ̈ɔ̈i ɣöt ku jäl ya juɛ̈r miɔ̈c cït man, badha [yäm], miök ë rak, acɔ̈ɔ̈m, ajïïth, guuk awu kuur, ku jɔl ya lääi kɔ̈k. Käkë, aa ke yeke ɣɔɔc ë wëu juëc arëët, ku aacï wëu bɛ̈n thɔ̈l ɣa ciin.

TË CÏÏ BAIBOL PÏÏRDIƐ̈ BƐ̈N WAARIC THÏN: Wään cïï ɣɛn ye jɔɔk cöök ba Baibol ya piɔ̈ɔ̈c, acï bɛn ŋic nɔn nadɛ̈ Yekoba ee yen Nhialic töŋ yic. Aca jäl bɛ̈n ŋic aya nɔn cïï Yekoba ye nhiar bï kɔcken ye door ya duur ë yiëth awu kä cï ke kiëët. (Bɛ̈nbei 20:4, 5; 1 Korinthoi 10:14) Ɣɛn cï kë wïc Nhialic tënë ɣɛn ba looi jä bɛ̈n ŋic ye dhaman kënë. Ɣɛn käkiën ke ye ɣɛn ke duur ë yiëth bɛ̈n bɛ̈ibei ɣöndiɛ̈ ëbën ku cuatke wei. Ɣɛn cï bɛ̈n muɔ̈l ba cïï bɛ lɔ tënë kɔc ë cɔ̈ɔ̈r awu kɔc ë luui ë käk ë jak, ku cä ben ya lɔ aya të ye kɔc tool thïn të cïï raan thou.

Acie kën piɔlic tënë ɣɛn ke ɣa ye tiiŋdïït nɔŋ run kathiërdhetem [60] ba rot waar. Mäthkiɛ̈, kɔc ruääi ke ɣɛn, ku jɔl ya kɔc thiääk ke ɣɛn, aacï ɣɛn bɛ̈n ya dɔl guöp ë wɛ̈t cïï ɣɛn muɔ̈l ë duɔ̈ɔ̈r ë yiëth. Ɣɛn cï bɛ̈n ya lɔ̈ŋ tënë Yekoba bï ɣɛn miɔɔc ë riɛl aguɔ këpiɛth looi. Ɣɛn cïï wël cï ke gɔ̈t ë buŋ Kɛ̈ŋ 18:10, bɛ̈n dɛɛt puɔ̈u. Aye lueel: “Rin ke Bɛ̈nydït [Yekoba] acïtkï alooc [amaara] bäär, ye raan piɛthpiɔ̈u kɔt [riŋ] thïn ku yök kuɔɔny.”

Ku dɛ̈t cï ɣɛn bɛ̈n bɛ kony aya, ee wɛ̈t ye ɣɛn lɔ amɛtmɛɛt ë Ciëëtke Yekoba yiic. Wën cïï ɣɛn bɛ̈n lɔ ëtɛ̈ɛ̈n, keek aacï ɣɛn bɛ̈n nyuɔ̈th nhiëër, ku kë cï ɣɛn bɛ̈n gɔɔt puɔ̈u apɛi, ee wɛ̈t ye keek lööŋke Baibol tääu ë pïïrden yic. Kë ca tïŋ tënë keek, acï ɣɛn bɛ̈n gɔɔt puɔ̈u arëët ku gam ë piändiɛ̈ ëbën nɔn nadɛ̈ Ciëëtke Yekoba aa nɔŋ nïïm duɔ̈ɔ̈r ë yic.

KÄPIƐTH CA KE BƐ̈N YÖK: Tɛ̈ɛ̈u ye ɣɛn lööŋke Baibol tääu ë pïïrdiɛ̈ yic, acï ɣɛn bɛ̈n kuɔny ba mänhdiɛ̈ ke mïthkiɛ̈ cɔ̈kpiny bï riɛl. Ɣɛn cï rot bɛ̈n yök cït kë nɔŋ këdïït thieek cï jat piny ë ɣanɔm. Duɔ̈ɔ̈r ë ye ɣɛn duur ë yiëth, acï käkiɛ̈ bɛ̈n rac ëbën, ku acïn këpiɛɛth ca bɛ̈n yök thïn. Ëmën, ɣɛn door Yekoba keye Nhialicdiɛ̈n wën ɣa kuɔny ë käkiën jöör ɛn yiic ëbën. (Nyuuth 21:3, 4) Ɣɛn mit puɔ̈u apɛi ëmën ë wɛ̈t ye ɣɛn aluaŋ Yekoba ku cä ben ya luaŋ ë yiëth! Yen ee ɣa gël ku gäm ɛn dɔ̈ɔ̈r bïï ɣɛn ya rëër ke ɣa lääu nɔm.

Acïï THINJI THATO lueel, “ɣɛn ee yɔ̈p Nhialic mïn ɣɔn koor ɛn.”

RUƆ̈Ɔ̈N Ë DHIËTH YEN: RUƆ̈Ɔ̈N TIƐM TÖK KU BUƆƆT KADHOŊUAN KU THIËRDHÏC KU TÖK [1951]

PAAN Ë DHIËTH YEN THÏN: JAPAN

ANYÏKÖL: BƐ̈NY Ë KÄK Ë JƆŊ YE CƆƆL CINTO

KÄ CÏ RÖT LOOI Ë PÏÏRDIƐ̈ YIC: Ɣɛn ë diët paan ye cɔɔl Fukuoka Prefecture. Kɔc ë ke dhiëth ɛn aa ke nhiar duɔ̈ɔ̈r; Aacï ɣɛn bɛ̈n piɔ̈ɔ̈c ɣɔn koor ɛn ba jɔŋ ye cɔɔl Cinto ya door. Ke ɣa ye dhɔ̈ɔ̈ŋ thiin koor, ee ya takic, yeŋö bï ɣɛn luäkbei ku ee ya nhiaar aya ba kɔc kɔ̈k kony ë käken dhal keekiic. Aŋoot ke ya takic e dhaman wään tɔ̈u ɣɛn ë thukulic, dupiööc ee cï ɣok thiëëc ëbën ë pathilic ku lueel, yeŋö bäk looi nhiäk të le week dït? Go mïth ke rɛ̈ɛ̈r ë pathilic ke ɣɛn lueel, akɔɔrku buk ya thanytïïth. Ku ɣɛn acï bɛ̈n lueel, kë tɔ̈u ɣanɔm, ee ba Nhialic luɔ̈ɔ̈i. Keek ëbën, aacï ɣɛn bɛ̈n dɔl guöp.

Wään cïï ɣɛn thök ɣön ë thiëër ku rou [12], ɣɛn cï bɛ̈n lɔ thukul ye kɔc piɔ̈ɔ̈c thïn bï raan ya abun. Ye dhaman kënë, ɣɛn cï bɛ̈n rɔ̈m ke bɛ̈ny ë käk ë duɔ̈ɔ̈r ë Cinto, ku yen ee ye dhamande nɔ̈k ke kuen buŋ cï miɔɔc kɔ̈u ë këcöl. Ë kööl tök, acï ɣɛn bɛ̈n thiëëc, “Thato, nadɛ̈ ŋic ë buŋ kënë?” Ɣɛn cï buŋ kënë bɛ̈n tïŋ kɔ̈u, guɔ ŋic, ku lɛ̈k en “ee Baibol.” Go lueel, “kuat ë raan ëbën nhiar en bï ya bɛ̈ny ë duɔ̈ɔ̈r ë Cinto, adhil buŋ kënë ya kueen.”

Ëtɛ̈ɛ̈n, ɣɛn cï bɛ̈n jäl ku la Baibol ɣɔɔc. Baibol kënë aca bɛ̈n ŋiɛc ya tɔ̈ɔ̈u ku ya nyin ŋiɛc tïït ë yen. Ku ɣɛn kën dhaman bɛ̈n yök bïï ɣɛn ye ya kueen ë wɛ̈t ye ɣɛn rëër ke ɣa kuen käk ë thukul. Wään cïï ɣɛn thök ë thukul, aca bɛ̈n jɔɔk ba ya lɔ luui ë yïŋ ë duɔ̈ɔ̈r ë Cinto yic, ke ɣa ye bɛ̈ny ë käk Cinto. Këdiën ɣɔn ca kuany ke ɣa ye meth ba looi acï rot bɛ̈n tiɛŋ tëde.

Acä jä bɛ̈n yök nɔn ë cïï yen piɛth ba ya bɛ̈ny ë Cinto, ë wɛ̈tŋö, acie yen kën kaar ba looi. Bäny juëc ë käk ë Cinto aa cie nhiëër ë nyuɔ̈th kɔcken mackë keek. Ku kɔc juëc apɛi ë ke yiic, acïn nïïm gääm. Acïï bänydït tök ke yiic bɛ̈n lɛ̈k ɣɛn: “ku ba tiam ë tënë, ee wɛ̈t ba ya jam ë biäk ë piöc ë mɛnh ë raan. Ku jam ye kɔc jam ë wɛ̈t ë gääm, ee cï pëën.”

Käken ke yekë ke looi kä, aacï ɣɛn bɛ̈n puɔ̈l ba duɔ̈ɔ̈r ë Cinto maan ëbën. Cɔk aa nɔn ë le ɣɛn tueŋ ke ɣa lui ë yïŋ duɔ̈ɔ̈r ë Cinto yic, aca bɛ̈n gɔl ba akut kɔ̈k ë duɔ̈ɔ̈r caathiic ëbën ba tïŋ nɔn ye keek yith. Ku keek ëbën, acïn yiny ca bɛ̈n yök thïn. Wën je ɣɛn lɔtueŋ ke ɣa ciɛɛth kanithat yiic ku tiëŋ kärɛc yekë ke looi, kënë acï ɣɛn bɛ̈n puɔ̈l ba ɣapuɔ̈u pälwei. Aca jä bɛ̈n yök ke cïn yiny tɔ̈u akut ë duɔ̈ɔ̈r kä yiic ëbën

TË CÏÏ BAIBOL PÏÏRDIƐ̈ BƐ̈N WAARIC THÏN: Ë ruɔ̈ɔ̈n tiɛm tök ku buɔt kadhoŋuan ku thiërbɛ̈t ku bɛ̈t [1988], ɣɛn cï bɛ bɛ̈n yök ke bɛ̈ny ë duɔ̈ɔ̈r ë Buddïth ku ben ɣa dɛɛt puɔ̈u ba Baibol ya kueen. Aca bɛ̈n yök kë ben ɣa math nyin cït man wään cïï ë bɛ̈ny ë duɔ̈ɔ̈r ë Cinto ɣa kaŋ math nyin ba Baibol ya kueen. Aca bɛ̈n gam ba looi yen këden cï lueel kënë. Wään cïï ɣɛn ye bɛ bɛ̈n jɔɔk ba Baibol ya kueen, aca jä bɛ̈n nhiaar. Ë dhaman däŋ, ɣɛn ye Baibol kueen agut bï piny bak awu run.

Kë ca bɛ̈n kueen ë Baibol acï ɣɛn bɛ̈n gɔɔt puɔ̈u ku nhiaar ba ya lɔ̈ŋ tënë Yekoba. Aca bɛ̈n jɔɔk ba ya lɔ̈ŋ ë lɔ̈ŋ cï gɔ̈t buŋ ë Mathayo 6:9-13. Röök kënë, aca bɛ̈n ya beeric ë thɛɛ karou agut dhaman wään ŋoot ɛn ke ɣa lui ke ɣa ye bɛ̈ny ë duɔ̈ɔ̈r ë Cinto.

Ɣɛn aa nɔŋ nɔm thiëc juëc apɛi ë käkiën ke yake kueen yiic. Ee dhaman kënë, ɣɛn acï thiëëk ku ee ŋiɛc nɔn ye Ciëëtke Yekoba kɔc piɔ̈ɔ̈c ë Baibol ë wɛ̈tŋö, aa ke cï tiiŋdië kaŋ piɔ̈ɔ̈c ë Baibol. Ɣɛn cï tiiŋ töŋ ë Ciëëtke Yekoba bɛ̈n yɔ̈ɔ̈p cöök ku thiɛ̈ɛ̈c ë thiëc juëc arëët. Ku kë cï ɣɛn bɛ̈n gɔɔt puɔ̈u apɛi, ee wɛ̈t cïï yen thiëckiɛ̈ bɛ̈n dhuknïïm ëbën ë Baibolic. Tiiŋ kënë, acï bɛ̈n lɔ jam ke mony töŋ ë Ciëëtke Yekoba bï ɣɛn ya piɔ̈ɔ̈c ë Baibol.

Ku ëtɛ̈ɛ̈n, aca jä bɛ̈n jɔɔk ba ya lɔ amɛtmɛɛt ë Ciëëtke Yekoba yiic. Acïn kën ë ca deetic ye dhaman kënë, ku kɔc ke ca yök ëtɛ̈ɛ̈n, aa ciëëtke Yekoba ke cï kaŋ yök ke ɣɛn, ku keek, aa ca ke kuɔ̈c jääm. Cɔk aa nɔn ë cïï ɣɛn ke kuɔ̈c jääm, aa cï ɣɛn bɛ̈n muɔ̈ɔ̈th ku lorkë ɣɛn keke mit puɔ̈th.

Amɛtmɛɛtkä yiic, aca bɛ̈n piɔ̈ɔ̈c nɔn wïc ë Nhialic röör bïk nhiëër ku athɛ̈ɛ̈k ya nyuɔɔth ë bɛ̈ɛ̈ikeniic. Ye dhaman kënë, ɣɛn aa ye ɣanɔm tääu ë londiën ye ɣɛn bɛ̈ny ë käk ë Cinto, ku ɣɛn acie nhiëër ë nyuɔ̈th tiiŋdië ku mïthkiɛ̈. Ëtɛ̈ɛ̈n, aca jä bɛ̈n ŋic nɔn ë cïï ɣɛn tiiŋdië ë piŋ thok ku ɣɛn aa ye kɔcke ye duur ke ɣɛn piŋ thook.

Të wën je ɣɛn lɔ tueŋ ke ɣa piööc Baibol, ɣɛn cï kä juëc bɛ̈n piɔ̈ɔ̈c ë biäk ë Yekoba, ku käkë, aa cï ɣɛn puɔ̈l ba thiääk ke Yekoba. Ɣɛn cïï wël cï ke gɔ̈t ë buŋ Romai 10:13, bɛ̈n gɔɔt puɔ̈u. Aye lueel: “Cït man cï ë këcïgɔ̈ɔ̈r ye lueel an, “Raan ëbɛ̈n raan ë Bɛ̈nydït [Yekoba] cɔɔl rin ka bï kony wëi.” Ɣɛn ayɔ̈p Nhialic mïn wään ye ɣɛn meth ku ëmën, aca jä yök!

Ëtɛ̈ɛ̈n, ɣɛn cï rot jä bɛ̈n yök ke ɣa cïï ben ya raan ë Cinto. Tueŋ, ɣɛn ee cï diɛɛr, bïï kɔc kɔ̈k takic këdï të nyɛ̈ŋ ɛn duɔ̈ɔ̈r ë Cinto piny. Ë dhaman wään, ee ca dac lueel ë ɣapuɔ̈u, të le ɣɛn duɔ̈ɔ̈r ë yic yök, ke ɣɛn bï duɔ̈ɔ̈r ë Cinto nyäŋ piny. Ë ruɔ̈ɔ̈n tiɛm tök ku buɔt kadhoŋuan ku thiërbɛ̈t ku dhoŋuan [1989], aca bɛ̈n kuany ba këye piändiɛ̈ lɛ̈k ɛn looi. Ka yen, ɣɛn cï duɔ̈ɔ̈r ë Cinto bɛ̈n waan awu nyäŋ piny ku kan rot ë Yekoba ciin.

Nyɛ̈ɛ̈ŋ ë bïï ɣɛn Cinto nyääŋ piny, acie kënë piɔlic. Bänykiën ke duɔ̈ɔ̈r ë Cinto aacï puɔ̈th bɛ̈n riääk ku them kë bïk ɣa pëën ba duɔ̈ɔ̈r ë Cinto cïï nyɛ̈ɛ̈ŋ piny. Ku yen, ee rilic apɛi aya ba lɛ̈k kɔc ke dhiëth ɛn nɔn bïï ɣɛn duɔ̈ɔ̈r ë Cinto nyäŋ piny. Wën tɔ̈u ɣɛn dhëlic ke lɔ tënë kɔc ke dhiëth ɛn, Ɣɛn cï bɛ̈n riɔ̈ɔ̈c arëët ku ya puɔ̈u gut, ayïï cäth akɛ̈n bɛ bɛ̈n lëu aya! Ɣɛn cï bɛ̈n lɔ̈ŋ ë kë gäkic tënë Yekoba bï ɣɛn gäm riɛl.

Wën cïï ɣɛn ɣëët baai tënë kɔc ke dhiëth ɛn, ɣɛn cï bɛ̈n riɔ̈ɔ̈c apɛi ë wɛ̈tŋö, ee riilic arëët ba jam jɔɔk cöök. Wën cïï ɣɛn jä thök ë röök tënë Yekoba, ɣɛn cï këriëëc ëbën jä bɛ̈n laaric tënë wää. Aca bɛ̈n lɛ̈k en nɔn cïï ɣɛn Nhialic yic yök, ku akaar ba duɔ̈ɔ̈r ë Cinto nyäŋ piny ku ee yen la door. Wää acï puɔ̈u guɔ bɛ̈n riääk ë nyinic tëtöŋë. Kɔc kɔ̈k ruääi ke ɣɛn aacï bɛ̈nbɛ̈n baai ku themkë bïk jam ke ɣɛn ba ɣanɔm waar. Ee cä nhiar ba kɔcke paanda rac puɔ̈th, ku yen aya, ee ŋiɛc luui bïï raan Yekoba luɔ̈ɔ̈i, ee yen kën yic lëu bïï raan looi. Wään cïï dhaman lɔ, kɔcke paanda, aa cï këdiën ca kuany ba looi bɛ̈n theekic.

Acɔk aa nɔn cïï ɣɛn muɔ̈l lɔ tënë duɔ̈ɔ̈r ë Cinto; ke yen, ee ŋot ke këc jäl ë ɣanɔm. Londiën wään ya looi ke ɣa ye bɛ̈ny ë käk ë Cinto, ee nhiaar apɛi. Aca bɛ̈n them ba nɔm määr ë yen, ku ɣɔ̈n ke ye ɣɛn ke lɔ thïn ëbën, anɔŋ käk ke ye ɣa täk nɔm ë käk ë duɔ̈ɔ̈r ë Cinto.

Anɔŋ käŋ karou cï ɣɛn bɛ̈n kony ba tɛ̈ktɛ̈kdiën thɛɛr kënë tiaam. Këtueŋ, ɣɛn cï paandiɛ̈ bɛ̈n yɔ̈ɔ̈pic ëbën ë kä wën lëu bïk ɣɛn täk nɔm ë duɔ̈ɔ̈r ë Cinto, ku wën cïï ɣɛn ke yök, aa ca ke bɛ̈n cuöny ëbën. Ku keek, aa nɔŋiic buɔ̈k, thurat, ku jɔl ya kɔ̈k wën yeke ɣɔɔc ë wëu juëc. Kën ë rou, aca bɛ̈n them arëët ba mänh ril looi ke Ciëëtke Yekoba. Ku yen ë mänh kënë, acï ɣɛn bɛ̈n kony apɛi. Wën cïï ɣɛn ë käkë karou looi, go tɛ̈ktɛ̈kdiën rɛɛc wään jä jäl amääth.

KÄPIƐTH CA KE BƐ̈N YÖK: Ɣɛn acie dhaman ë bɛ̈ibei bïï ɣɛn rëër ke tiiŋdië ku mïthkiɛ̈, ku wɛ̈t ee kënë, aa cï bɛ̈n ya rëër ke kök nyïïn. Ku wën cïï ɣɛn ye jɔɔk ba ya rëër ke keek cït man cïï Baibol ye lueel, mänhda acï bɛ̈n riɛl apɛi. Wään cïï dhaman lɔ, tiiŋdië acï rot bɛ̈n mät ɣɛn buk Yekoba luɔ̈ɔ̈i ëtök. Ɣok ɣodhie, wëndië , ku nyandië ke muɔnyde, ɣok luui Yekoba ëtök ëmën.

Të tɛk ɛn ɣanɔm ë dhaman wään ye ɣɛn meth, wään cïï ɣɛn ye kuany ba Nhialic luɔ̈ɔ̈i ku kuɔny kɔc kɔ̈k, aca jä bɛ̈n ŋic nɔn cïï ɣɛn kënë kaar ëbën ë pïïrdiɛ̈ yic yök. Të tak ɛn ɣanɔm ë käpiɛth cïï Yekoba ke luɔ̈ɔ̈i ɣɛn, ɣɛn nyin löny ë pïu.

Acïï LYNETTE HOUGHTING lueel, “ee ŋiɛc nɔn nɔŋ en kë dak nyin ë pïïrdiɛ̈ yic.”

RUƆ̈Ɔ̈N Ë DHIËTH YEN: RUƆ̈Ɔ̈N TIƐM TÖK KU BUƆT KADHOŊUAN KU THIËRDHÏC KU BƐ̈T [1958]

PAAN Ë DHIËTH YEN THÏN: THƆ̈Ɔ̈TH APIRIKA

ANYÏKÖL: TƐ̈KTƐ̈K RAC Ë WƐ̈T Ë CÏÏ KƆC KE DHIËTH ƐN ƔA NYÄŊ PINY

KÄ CÏ RÖT LOOI Ë PÏÏRDIƐ̈ YIC: Ɣɛn aa dhiëth paan ë Germiston, ku paan thiin kënë, ee cïn käjuëc rɛc röt looi thïn. Ë wɛ̈t këc keek ye lëu bïk nyïïn tïït ë ɣɛn, kɔc ë ke dhiëth ɛn, aa cï ɣɛn bɛ̈n nyäŋ piny bï kɔc kɔ̈k ɣa lɔ̈k kuany ku mukkë ɣɛn ba dït. Wään cïï ɣɛn nɔŋ nïn kathiëër ku ŋuan [14], ɣɛn cï bɛ̈n kuany ë kɔc cï röt thiaak ku mukkë ɣɛn ba ya mɛnhden. Ku wën cïï ɣɛn ye jä bɛ̈n ŋic nɔn ë cïï kɔc ke dhiëth ɛn ɣa nyäŋ piny, ɣɛn cï bɛ̈n kuɔ̈c ya tak, ku tɛ̈ktɛ̈k rɛɛc kënë, acï ɣɛn bɛ̈n ya reem puɔ̈u apɛi. Aca jä bɛ̈n takic, kɔc muk ɛn kä, acie keek kɔc ke dhiëth ɛn, ku aa cie këdiën reem ɛn deetic.

Ku wään cïï ɣɛn nɔŋ run kathiëër ku dhetem [16], aca bɛ̈n jɔɔk ba lɔ të ye kɔc dek ë mɔ̈u thïn , ku mɔ̈n kënë, aye cɔɔl cocktail, ku tɛ̈ɛ̈n, ɣɛn cï bɛ̈n ya lɔ dier apäla ke mäthkiɛ̈ ku dɛɛiku ë kɔc diër ë kɔc nïïm. Ku wään cïï ɣɛn bɛ nɔŋ ruɔ̈ɔ̈n thiëër ku dhorou [17], aca bɛ̈n jɔɔk ba ya math ë tap. Awïc ba kɔ̈u thui cït man ë kɔc ë math ë tap yeke nyuɔɔth ë thuratiic. Ku wään cïï ɣɛn nɔŋ run kathiëër ku dhoŋuan [19], ɣɛn cï bɛ̈n lɔ luui paan ë Johannesburg, ku tɛ̈ɛ̈n, ɣɛn cï bɛ̈n la yök ke akut kɔc rac apɛi. Ku dhaman thiin koor, ɣɛn cï guɔ bɛ̈n piöc ë jam rac, ku ye tap yen ya jäl maath ë kööl thok ëbën, ku jäl dek ë mɔ̈u arëët ë thök ë yithbuɔɔ thok ëbën.

Na cɔk aa nɔn ye ɣɛn ë käkë looi, Ɣɛn ŋoot ke ɣa ril, ɣɛn aa ye pol ë kura nyïïr ku jɔl ya käjuëc kɔ̈k. Londiën ë ca tääu ë ɣanɔm ba looi ë pïïrdiɛ̈ yic, ee lon kɔmpiötar. Lon kënë ee ya looi ke ɣa tuc guöp apɛi ë wɛ̈t bïï kɔc ɣa ŋic, ku kë cï bɛ̈nbɛ̈n bei thïn, ɣɛn cï bɛ̈n nɔŋ wëu juëc arëët ku kɔc aa cï ɣɛn bɛ̈n ya tïŋ ke ɣa ye raan cï tiam. Cɔk aa nɔn ye kɔc kɔ̈k ɣa tïŋ këya, ɣɛn ee cïï puɔ̈u mit ë pïïrdiɛ̈ yic. Ë wɛ̈tŋö, ee nɔŋ kën ë dak nyin ë pïïrdiɛ̈ yic.

TË CÏÏ BAIBOL PÏÏRDIƐ̈ BƐ̈N WAARIC THÏN: Wën cïï ɣɛn piööc ë Baibol bɛ̈n jɔɔk cöök, aca ja bɛ̈n ŋic, Yekoba ee Nhialic ë Nhiëër. Aca jä bɛ̈n ŋic aya nɔn cïï yen nhiëërde nyuɔ̈th ɣok ë kueer cïï yen ɣo gäm Baibol. Ee rot looi cït awereŋ cï gɛ̈t ɛn bï ɣɛn ya nyuɔ̈ɔ̈th ë pïïrdiɛ̈ yic. (Yithaya 48:17, 18) Aca jä bɛ̈n deetic, ku ba käpiɛth yök ë nhiëër ë Yekoba yic, akɔɔr ɛn ba käjuëc waar ë pïïrdiɛ̈ yic.

Ku töŋ ë wïc ba waar ë pïïrdiɛ̈ yic, aa kɔc rɛc ë ke määth ke ɣɛn, aa ke wïc ba ke puɔ̈l ba cïï ben cath ke keek. Ɣɛn cïï wël cï ke gɔ̈t ë buŋ Kɛ̈ŋ 13:20 bɛ̈n dɛɛt puɔ̈u, aye lueel: “Raan ë cath ke raan ŋic käŋ abï käŋ ŋic, Ku raan ë cath ke raan kuc käŋ abï käŋ kuc aya.” NWT. Wëët tɔ̈u ee cöök kënë yic acï ɣɛn bɛ̈n kony ba mäthkiɛ̈n thɛɛr nyäŋ piny ku jä bɛn jɔɔk ba määth ke Ciëëtke Yekoba.

Ku töŋ ë rilic apɛi ba puɔ̈l, ee ye mäthë tap; ë wɛ̈tŋö, ee cï ɣɛn ŋic guöp arëët. Ku wën cïï ɣɛn jä lɔtueŋ ke ɣa pɛ̈l mäthë tap amääth, ku däŋ rilic acï jä bɛ bɛ̈n nhial wën cïï ɣɛn mäthë tap puɔ̈l, ɣɛn cï guöp bɛ̈n dït apɛi ku kënë, ee cä nhiar! Acï të cït ruɔ̈ɔ̈n thiëër [10] bɛ̈n nyaai ku ba dït ë guöp kënë jä dhuɔ̈k nyin piny. Ku ee ŋiɛc aya, päl bïï ɣɛn mäthë tap puɔ̈l, ee yen këtöŋ thiekic lëu ba looi. Ɣɛn cï bɛ̈n lɔtueŋ ke ɣa rɔ̈ɔ̈k tënë Yekoba, ku acï ɣɛn bɛ̈n gäm riɛl bïï ɣɛn ye tiaam.

KÄPIƐTH CA KE BƐ̈N YÖK: Ëmën, ɣɛn rɛ̈ɛ̈r ke ɣa piɔl guöp ku ɣɛn mit puɔ̈u aya. Ɣɛn cie bɛ kat ë käk ë pinynɔm cök cït man, bï ɣa ŋic rin ke ɣa ye raan nɔŋ wëu juëc. Kën ë ɣɛn miëët puɔ̈u apɛi, ee wɛ̈t ye ɣɛn yiny ca piɔ̈ɔ̈c ë Baibolic rɔm ke kɔc kɔ̈k. Ku këpiɛɛth cï bɛ̈nbei thïn, ɣɛn ku tiiŋdië ku mäthkiɛ̈ karou, ɣok ëbën, ɣo luui Yekoba ëtök. Ë dhaman wään këc kɔc ke muk ɛn guɔ thou, aca keek bɛ̈n lɛ̈k thön piɛɛth tɔ̈u ë Baibolic bïï kɔc cï thou röt jɔt ë thuɔɔu yic bïk bɛ pïïr ë paraditho yic ë pinynɔm ë tënë.

Cut cïï ɣɛn rot cuöt Yekoba, acï ɣɛn bɛ̈n kuɔny ba tɛ̈ktɛ̈k rɛɛcdiën wään cïï kɔc ke dhiëth ɛn ɣa nyäŋ piny tiaam. Ku kën ë ɣɛn miëët puɔ̈u apɛi, ee wɛ̈t cïï Nhialic ɣa mat ë kɔcke yiic rɛ̈ɛ̈r ë pinynɔm ëbën. Ke yiic, ɣɛn cï wärkiɛ̈, märkiɛ̈, wɛ̈tamäthkië ku nyïïrakäckiɛ̈ yök thïn ëtɛ̈ɛ̈n.—Mak 10:29, 30.

 [Picture on page 12]

Ciëëtke Yekoba aa cï ɣɛn nyuɔ̈th nhiëërdït arëët,

 [Picture on page 13]

ka wär duɔ̈ɔ̈r wään ye ɣɛn jɔŋ ye cɔɔl Cinto door