Thɔ̈ɔ̈ŋë yicda, wun ë meth ajam kek wënden thiin koor nɔŋ run kadhorou. Go lueel, “Wään thɛɛr, Nhialic acï pinynɔm cak ku jɔl ya këriëëc ëbën tɔ̈u thïn, cït man akɔ̈l, pɛɛi, ku jɔl ya kuɛl.” Go dhɔ̈ɔ̈ŋ thiin kënë yenɔm kaŋ tak ku jɔl wun thiëëc, “Wää, yeŋa ë cak Nhialic?”

Go wun dhuknɔm ku lueel, “acïn raan ë cak Nhialic.” “Ee tɔ̈u ë dhaman thok ëbën.” Ku dhuŋnɔm piɔlic cïï wun ye dhuknɔm kënë, acï ye guɔ bɛ̈n tiiŋ puɔ̈u. Ku wën cïï yen jäl lɔtueŋ ke diët, thiëc kënë aŋoot ke këc jäl yenɔm. Acï yic bɛ̈n riɛl apɛi tënë yen bï deetic, ye këdï lëu bïï Nhialic rëër thïn ke cïn jɔ̈k ë cöökde, ku pinynɔm anɔŋ jɔ̈ɔ̈k ë cöökde. Ku kënë acï ye bɛ̈n gɔ̈i, ‘ye tëno ë bïï Nhialic thïn?’

Ye këdï ye Baibol thiëc kënë dhuknɔm? Aye Baibol dhuknɔm të cït të cïï wun ye dhuɔ̈knɔm thïn tueŋ. Acïï Mothith gɔ̈t: Yïn Yekoba, “ɣɔn kënë kur kɔn cak, ku ɣɔn kënë pinynɔm kɔn bɛ̈n, Yïn ee Nhialic tɔ̈u athɛɛr, ku Yïn bï tɔ̈u aɣet athɛɛr.” (Diɛt 90:1, 2) Ku acïï raan käk ë Nhialic tïŋ cɔl Yithaya lueel: “Cïï ŋic? Kɛ̈në piŋ? Bɛ̈nydït [Yekoba] ee Nhialic tɔ̈u athɛɛr”! (Yithaya 40:28) Ku ee yen kë cïï Juda gɔ̈t aya nɔn nadɛ̈ Nhialic ee tɔ̈u “akölriëëc ëbën.”—Juda 25. LËK YAM

Aye cök cuk ke kueen kä nyuɔɔth nɔn ye Nhialic “Melik tɔ̈u aɣet athɛɛr,” cït man cïï Paulo ye lueel. (1 Timotheo 1:17) Kënë, ee ye nyuɔɔth nɔn ye Nhialic tɔ̈u thɛɛr, të cɔk ɣok ɣonïïm tak ë dhamandïït cïï Nhialic tɔ̈u, ka cuk lëu buk deetic. Ka yen, alëu bï rëër aɣet athɛɛr. (Nyuuth 1:8) Wɛ̈t ee Yen rëër aɣet athɛɛr, aye nyuɔɔth nɔn ye yen Nhialic Awärjäŋ.

Ye wɛ̈tŋö ye ɣok ye yök kërilic apɛi buk deetic? Ee wɛ̈t dhamandan ye ɣok pïïr akoor, ku acï thöŋ ke dhaman Yekoba. Ë wɛ̈t ye Yekoba tɔ̈u aɣet athɛɛr, tënë Yen, ruɔ̈ɔ̈n tiɛm tök ee ya akäl tök. (2 Petero 3:8) Jɔ thɔ̈ɔ̈ŋic da: Nadɛ̈ lëu bï kɔ̈m thiin cɔl gɔt ë pïïr ë nïn kathiërdhïc [50], pïïr ye mɛnh ë raan pïïr ë ruɔ̈ɔ̈n thiërdhorou [70] awu ruɔ̈ɔ̈n thiërbɛ̈t [ 80] deetic? Acïï lëu bï deetic! Ku ee yen ë wɛ̈t ye Baibol ŋiɛc laaric, dhaman ye mɛnh ë raan pïïr aciekic, ka thöŋ ke dhaman ye gɔt pïïr të thööŋ ë yen ke dhaman Yekoba. Ayïï tɛ̈ktɛ̈kda acï thöŋ ke tɛ̈ktɛ̈kde. (Yithaya 40:22; 55:8, 9) Ka yen, acïï lëu bï ɣok gɔ̈i të nɔŋ en kä wën cïï mɛnh ë raan keek ë deetiic tënë Yekoba.

Cɔk aa nɔn ee yen yic riɛl buk deetic yen ë rëër ye Nhialic rëër athɛɛr, kekë ye Baibol lueel alëu bï kɔc kuɔny bï deetic. Të nɔŋ en raan ë cak Nhialic, ke raan kënë, ee yen Aciëk. Aye Baibol ŋiëc lääric ɣook, Yekoba ee yen cï “käŋ cak kedhie.” (Nyuuth 4:11) Aŋicku aya, ë dhaman thɛɛr wään këc ë käŋ guɔ cak, pinynɔm ee liu. (Cäk 1:1, 2) Ye tëno bïï yen thïn? Raan ë cak pinynɔm, alëu bï kaŋ rëër thïn. Ku yen, ee tɔ̈u ë dhaman thɛɛr wään këc këriëëc ëbën guɔ cak, cït man Wënden töŋ nhiɛɛr ku jäl ya maläikat. (Jop 38:4, 7; Kolothai 1:15) Kënë ee ye nyuɔɔth, Ee yen raan töŋ ë rɛ̈ɛ̈r yetök ë dhaman wään këc käŋ guɔ cak. Ka yen, acïn raan ë cak En; acïn kënë arɛ̈ɛ̈r thïn, wën lëu bï ye cak.

Pïïrdan rëër ɣok thïn ëmën, ku jɔl aa kä cï ke cak ë pinynɔm ëbën, aa ye nyuɔɔth nɔn ye Nhialic tɔ̈u aɣet athɛɛr. Raan ë cak të ye piny rot wiëëc thïn, ku jɔl aa raan ë looi lööŋ wën mac pinynɔm, alëu bï dhiɛl rëër thïn aɣet athɛɛr. Ka yen, alëuku buk lueel, ee yen ë cak këriëëc pïïr ë pinynɔm ëbën.—Jop 33:4.