Cït man cïï ɣok ye tïŋ abër tueŋic, kë töŋ ë ye Yecu looi ë pïïrde yic ëbën, ee ye “kɔc wɛ̈ɛ̈t ku guïïr [piööc] keek wëlpiɛth ke ciɛɛŋ [Bääny] de Nhialic.” (Luk 8:1) Yecu ee ye riɛldït tääu thïn ku ye cath ë bɛ̈ɛ̈i ke Yithrɛɛl yiic ëbën, bï kɔc lɔ piɔ̈ɔ̈c ë wëlpiɛɛthke Bääny ë Nhialic. Käk ke cïï Yecu ke looi ë londen ë piööcic, aacï ke gät ë buɔ̈k kaŋuan yiic yeke cɔɔl Gothpol, ku buɔ̈k kä yiic kaŋuan, Yecu acï jam ë biäk ë Bääny ë Nhialic të cït ayic buɔɔt [100] le tueŋ. Ku wël juëc jam ë biäk e Bääny ë Nhialic kä, aa yeke yök ë wël ke cïï Yecu ke lueeliic, ku keek ë wëlkä aa lik të thööŋ ë keek ke wël juëc ke cïï Yecu ke lueel ë biäk ë Bääny ë Nhialic këc ke gät piny!—Jɔn 21:25.

Ye wɛ̈tŋö ye Bääny ë Nhialic yic thiɛk apɛi tënë Yecu wään tɔ̈u yen ë pinynɔm? Kë töŋ ë riil yen yic tënë Yecu, ee ŋic nɔn cïï Nhialic ye kuany ke ye yen bï ya Bɛ̈ny. (Yithaya 9:6; Luk 22:28-30) Cɔk aa nɔn ë ŋic Yecu yen nɔn cïï Yekoba ye kuany ke ye yen bï ya bɛ̈ny, ka cie yen kë cïï yenɔm bɛ̈n tääu thïn ku akëc rot bɛ̈n ya lɛɛc. (Mathayo 11:29; Mak 10:17, 18) Yecu ee cie kɔc piɔ̈ɔ̈c ë wëlpiɛɛthke bääny ë Nhialic ë wɛ̈t kɔɔr en bääny. Kë tueŋ cïï Yecu yenɔm bɛ̈n tääu thïn, ee kë bïï bääny ë Nhialic luɔ̈ɔ̈i kɔcken nhiɛɛr keek, cït man Wun tɔ̈u nhiaal ku jɔl ya kɔcken ye buɔɔth cöök.

Yecu anhiar Wun tɔ̈u paannhial ë piände ëbën. (Kɛ̈ŋ 8:30; Jɔn 14:31) Ku yen aya, anhiar kït piɛth ke Wun, cït man, nhiëër, kuany ë nyin, ku lacök. (Nyöŋ de Löŋic 32:4; Yithaya 49:15; 1 Jɔn 4:8) Yic pacɔ̈k, Yecu amɛɛn bï lueth yeke luɛɛl ë Wun guöp piŋ, cït man luenh ye kɔc lueel, Nhialic acie ë mɛɛmda tïŋ ku ee yen ye bɛ̈ɛ̈i awu anhiɛɛr bï ɣo tïŋ ke ɣo mam. Ku kënë, ee yen këtöŋ ë nhiɛɛr ë Yecu yen bï “wëlpiɛɛthke Bääny ë Nhialic” rɔm ke kuat ë raan ëbën, ee ŋic Yecu ë dhaman bï bɛ̈n tueŋ, Bääny kënë, ee yen bï rinkë wun lɔɔk ë kärɛc cï ke luɛɛl ye guöp ëbën. (Mathayo 4:23; 6:9, 10) Ye këdï bïï yen kënë looi?

Yekoba abï Bäänyde luɔ̈ɔ̈i bïï yen käpiɛth luɔ̈i mɛnh ë raan ëbën tɔ̈u pinynɔm. “Ku abï pïïu ke kenyïïn weec ë kenyïïn kedhie” kɔc wën nɔŋ gääm tënë Yen. Yekoba abï käk kɔc cɔl adhiau nyaai ëbën bïk liu, “ku thuɔɔu acïï bï be nu [tɔ̈u],” ayï jiɛthëpiɔ̈u, ku dhiëëu, ku arɛɛm, acïkï bï bɛ nu [tɔ̈u].” (Nyuuth 21:3, 4) Nhialic abï Bäänyde luɔ̈ɔ̈i bïï yen mɛɛm ku kä dhal mɛnh ë raan nyaai ë pinynɔm ëbën. a

Ka yen, acïï lëu bï ɣo gɔ̈i yen wɛ̈t ye Yecu ye nhiaar bï kɔc lɛ̈k ë wëlpiɛɛthke Bääny ë Nhialic! Ee ŋic Yecu nɔn bïï Bääny riɛldït ë Wun ku käc piände nyuɔɔth. (Jakop 5:11) Ee ŋic Yecu aya nɔn bïï Bääny käpiɛth looi tënë kɔc nhiɛɛr keek, kɔc wën nɔŋ gääm ku yekë Nhialic door ë kueer ye gam.

Ë dhaman wään ŋoot ë Yecu ke këc guɔ bɛ̈n ë pinynɔm, ee ciëŋ paannhial ke Wun. Nhialic acï Wënde luɔ̈ɔ̈i bïï yen këriëëc ëbën cak, cït man, kuɛl juëc cï paannhial thɔ̈ɔ̈ŋic ku jɔl ya pinynɔmdan piɛɛth cï thiäŋ ke lääi cieŋ en yic ëbën. (Kolothai 1:15, 16) Ë käjuëc cï ke cakiic ëbën, Yecu “anhiar” mɛnh ë raan apɛi.—Kɛ̈ŋ 8:31. NWT

Yecu ee kɔc lɔ piɔ̈ɔ̈c ë wëlpiɛth ë wɛ̈t nhiɛɛr en keek. Wään jɔɔk ë Yecu londen ë piööc cöök, ee cï ŋiɛc laaric tënë kɔc ëbën nadɛ̈ wɛ̈t ë bïï yen ë pinynɔm, ee bï kɔc bɛ̈n “lɛ̈k wëlpiɛɛthke Bääny ë Nhialic,” kɔc nhiar en bïk piŋ. (Luk 4:18) Yecu acï käjuëc looi bï kɔc kuɔny ka wär kä cï ke lɛ̈k kɔc. Yecu acï käk ye nyuɔɔth nɔn nhiɛɛr ɛn kɔc looi. Cït man, wään cïï Yecu akutdïït ë kɔc piŋ en tïŋ keke wïc kuɔny, go Yecu “piɔ̈u kok ke keek, ku tɔ kɔc dem.” (Mathayo 14:14) Wään cïï mony cï tuaany ë tuany rac arëët ye gam ye puɔ̈u nɔn nadɛ̈ alëu bïï Yecu kuɔny bï dɛɛm, go Yecu nyin kuany ë yen ku kony bï dɛɛm ë wɛ̈t nhiɛɛr en yen ku lueel: “Awiëc! Piaalë [guöp].” (Luk 5:12, 13) Wën cïï Yecu mäthde Meri tïŋ ke dhiau ë wɛ̈t cïï mänh ë ye cɔɔl Ladhorou thou, go Yecu “keŋ ë yepiɔ̈u,” ku “jiɛth piɔ̈u,” ku “dhiɛɛu.” (Jɔn 11:32-36) Ku tɛ̈ɛ̈n, Acï këdïït gäi bɛ̈n looi bï Ladhorou jɔt ë thuɔɔu yic cɔk aa nɔn cïï yen nïn kaŋuan nɔ̈k ë raŋic!—Jɔn 11:38-44.

Ku ee ŋic Yecu, kuɔɔny cï gaam kënë, acïï bï rëër athɛɛr. Ku ee ŋic aya kɔc wën cï ke kuɔny ëbën bïk dɛɛm, aabï bɛ tuaany ku kɔc wën cï ke jɔt ë thuɔɔu yic ëbën, aabï bɛ thou. Ku yen, ee ŋic Yecu aya nɔn yen Bääny ë Nhialic yetök yen nɔŋ riɛl bï käkë nyaai ëbën ku cïï kë röt bɛ looi agut athɛɛr. Ku ee yen wɛ̈t ë këc Yecu kädït ë jäŋ gɔ̈i looi kapɛ̈c; ee lɔ aya bï kɔc lɔ piɔ̈ɔ̈c ë “wëlpiɛɛthke Bääny ë Nhialic.” (Mathayo 9:35) Ku käk ë jäŋ gɔ̈i cïï Yecu ke looi kä, aa ye nyuɔɔth nɔn bïï Bääny ë Nhialic ë käkë looi ë pinynɔm ëbën ë dhaman bï bɛ̈n tueŋ. Tïŋ kä cïï Baibol ke thɔn ka bï röt looi ë dhaman bï bɛ̈n tueŋ.

• Aba ciën tuɛnytuɛɛny.

  Ee dhaman kënë, “nyïïn ke cɔɔr abïk daai, ku miŋ abï piŋ. Ŋɔl abï kɛɛc nhial ku cöŋ [diëër], ku kɔc cïï jam lëu abïk kïïu në miɛtëpiɔ̈u.” Ku däŋ piɛth apɛi, “acïn raan bï bɛ dok [jam] an: ‘de guöp juäi [tuany].’”—Yithaya 33:24; 35:5, 6.

• Thuɔɔu abï liu.

  “Kɔc piɛthpiɔ̈ɔ̈th abïk piny lɔ̈ɔ̈k lak [löök], ku abïk rëër thïn aɣet athɛɛr.”—Diɛt 37:29.

  “Ku Bɛ̈nydït [Yekoba Nhialic] Awärjäŋ abï thuɔɔu riɔ̈ɔ̈k aɣet athɛɛr! Abï pïïu wɛɛc wei ë kɔc nyïïn kedhie.”—Yithaya 25:8.

• Kɔc cï thou aa bï ke jɔt ë thuɔɔu yic

  “Kööl abɔ̈, kööl bï kɔc nu [tɔ̈u] ë rɛ̈ŋ yiic rölde piŋ kɔc kedhie agokï bɛ̈n biic [bei].”—Jɔn 5:28, 29.

  “Ku yɛn ŋäth Nhialic, ayï keek aya, ee Nhialic en ŋäthkï, nɔn bï jönërɔt ë kɔc cï thou nu, kɔc piɛthpiɔ̈ɔ̈th ayï kɔc rac piɔ̈ɔ̈th.” —Luɔi de Tuuc 24:15.

• Kɔc ëbën aa bï nïïm nɔŋ bɛ̈ɛ̈i ku loilooi piɛth.

  “Kɔc abïk ɣööt yïk ku rëërkï thïn në gupken, abïk duumkɛn ke tiim ke enap com ku ciɛmkï kakɛn cï luɔk. Acïkï bï yïk ku lɔ kɔc kɔ̈k rɛ̈ɛ̈r thïn, ku acïkï bï com ku lɔ kɔc kɔ̈k ke cam. . . . Abïk . . . kakɛn cïk looi cam në miɛtëpiɔ̈u.”—Yithaya 65:21, 22.

• Abï ciɛ̈n tɔŋ tɔɔŋ bï bɛ tɔ̈u.

  ‘Abï tɔɔŋ dɔ̈m kɔ̈ɔ̈c ë pinynɔm ëbɛ̈n.’—Diɛt 46:9.

  ‘Juöör acïkï tɔŋ bï bɛ aa lɛɛr tënë juöör kɔ̈k, ku aacïï tɔŋ bï bɛ ya piɔ̈ɔ̈c.’—Yithaya 2:4.

• Acïn cɔŋ bï bɛn tɔ̈u.

  ‘Piny abï kakɛn cï luɔk bɛ̈ɛ̈i, Nhialic, Nhialicda abï wo thieei.’—Diɛt 67:6.

  “Pinynɔm [abï] de rɛɛp juëc ëbɛ̈n, . . [ku] kur [aabï] nïïm thiäŋ në rap.”—Diɛt 72:16.

• Ŋɔ̈ɔ̈ŋ abï liu.

  “Ku aŋäth de kɔc cïn käŋ acïï bï dhɔ̈ŋic aɣet athɛɛr.” —Diɛt 9:18.

  “Ee kɔc kuanynyïïn ee yen cɔɔl luök, kekë kɔc cïn käŋ kɔc ye rɛɛc. Ee piɔ̈u kok kekë kɔc kɔ̈c ku kɔc kuanynyïïn, ee kɔc cïn käŋ kony wëi.”—Diɛt 72:12, 13.

Käpiɛth cïï Bääny ë Nhialic ke thɔn bï röt looi ë dhaman bï bɛ̈n tueŋ kä, aa keek ë Bääny ë Nhialic looi bï yic thiɛk tënë Yecu. Wään tɔ̈u Yecu ë pinynɔm, ee ye nhiaar bï jam ë biäk ë Bääny ë Nhialic tënë raan ëbën nhiaar en bï piŋ, ë wɛ̈tŋö, ee ŋic Bääny ë Nhialic, ee yen bï kä dhal mɛnh ë raan yeku ke tïŋ ke loi röt yeköölë cɔ̈kpiny.

Nadɛ̈ nhiar käpiɛth cïï Baibol ke lueel ë biäk ë Bääny ë Nhialic? Na nhiaar keek, ke ye këdï bïï yïn käjuëc ŋic ë biäk ë Bääny Nhialic? Yeŋö lëu ba looi ba athiɛɛi yök ë Bääny ë Nhialicic? Awereŋ akär aa awereek kä yiic, abï thiëc kä dhuknïïm