Ɣɛn ee dhiëth paan thiin ye cɔɔl Thakoni, ku paan thiin kënë, aye cɔɔl German Democratic Republic (GDR). Ee dhaman kënë, pïïr ee piɛth wään rëër ɛn baai, ku kɔc ke dhiëth ɛn aa ke cï ɣɛn ŋiɛc piɔ̈ɔ̈c ë ciɛɛŋ piɛth. Ë wɛ̈t mɛc paan Germany akuma ye lueel kɔc abï ke ya thɔ̈ɔ̈ŋ nïïm, kɔc juëc apɛi aa ke cie duɔ̈ɔ̈r ë tïŋ ke thiekic. Tën ɣɛn, ee cä gam nɔn tɔ̈u Nhialic. Wään cïï ɣɛn naŋ ruɔ̈ɔ̈n thiëër ku bɛ̈t [18], anɔŋ käŋ karou cï pïïrdiɛ̈ bɛ̈n waaric: gääm ë ye lueel Nhialic aliu, ku gääm ë ye lueel kɔc abï ke ya thɔ̈ɔ̈ŋ nïïm.

Ye wɛ̈tŋö ë nhiɛɛr ɛn gääm ye lueel kɔc abï ke ya thɔ̈ɔ̈ŋ nïïm? Ee wɛ̈t ë nhiaar ɛn en bï kɔc ya rëër keke thöŋ nïïm ëbën. Ku yen, ee ya gam aya bï käŋ ya tek keke thöŋ nyïïn ë wɛ̈tŋö, kënë, alëu bï kɔc thɔ̈ɔ̈ŋ nïïm, bï ciën raan nɔŋ käjuëc arëët ku cïn raan ŋɔ̈ŋ apɛi. Ka yen, ɣɛn cï bɛ̈n luui ke akuma ye lueel kɔc abï ke thɔ̈ɔ̈ŋ nïïm. Wään cïï ɣɛn naŋ ruɔ̈ɔ̈n thiëër ku ŋuan [14], Ɣɛn cï dhamandït bɛ̈n ya nɔ̈k ke ɣa lui ke akut ë piny guiir bï ciën acuɔl, ku ɣɛn aa lui aya ke cirka awereek guiir bïk bɛn ya jedït. Kɔcke madïna thiin cɔl Aue aa cï puɔ̈th bɛ̈n miɛt ke ɣɛn, ku wɛ̈t ee kënë, aacï ɣɛn bɛ̈n gäm miɔ̈c. Cɔk aa nɔn ë koor ɛn, ke ɣɛn cï rot bɛ̈n ŋic ke kɔcdït ke thiɛɛtha ë paan ë Germany [GDR]. Ee ya takic nɔn cïï ɣɛn këpiɛth kuany ba looi ku ee ya lueel, pïïrdiɛ̈ apiɛth.

Ë kaam thiin koor, pïïrdiɛ̈ acï rot guɔ bɛ̈n waar. Ë ruɔ̈ɔ̈n tiɛm tök ku buɔɔt kadhoŋuan ku thiërbɛ̈t ku dhoŋuan [1989], pänydïït ë Berlin acï bɛ̈n lööny ku akumade ëbën, ku akumatdït ke ye piɔ̈ɔ̈c nɔn bïï kɔc ya thɔ̈ɔ̈ŋ nïïm paan Europe, aacï bɛ̈n riääk ëbën. Ku kä cï rot looi kä ëbën, aacï ɣɛn bɛ̈n gɔ̈i. Ë kaam thiin ciekic, acä bɛ̈n ŋic nɔn dït ë yaaŋ apɛi paan ë Germani [GDR]. Cït man, kɔc ke cie yen ë gam nɔn bïï kɔc ya thɔ̈ɔ̈ŋ nïïm, aacï ke kuɔ̈c bɛ̈n ya ciëëŋ cït ke ye alɛi. Ye këdï ë looi ee kënë rot? Ku na ɣook, ɣok kɔc ë ye gam nɔn bïï kɔc ya thɔ̈ɔ̈ŋ nïïm, nadɛ̈ cuk ye gam kɔc ëbën aa thöŋ nïïm? Nadɛ̈ gääm ë ye lueel kɔc aa bï ke ya thɔ̈ɔ̈ŋ nïïm ye kë ye thɔ̈ɔ̈ŋic? Ɣɛn cï bɛ̈n ya diɛɛr arëët.

Ka yen, ɣɛn cï ɣanɔm bɛ̈n geer, ku tääu ɣanɔm ë kën ë diɛtiic ku thuur. Wën cïï ɣɛn ye lëu ba lɔ thukul ye kɔc piɔ̈ɔ̈c thïn ë kën diɛt, ee tɔ̈u ɣapuɔ̈u ke ɣa bï lɔ jaama aya. Ka yen, kë ca bɛ̈n tääu ɣanɔm ba looi, ee kën ë diɛt. Ku tɛ̈ɛ̈n, ɣɛn cï ciɛɛŋ piɛɛth ë cïï kɔc ke dhiëth ɛn piɔ̈c ɣɛn ë dhaman wään ye ɣɛn meth bɛ̈n puɔ̈l. Kë töŋ cï yic jä bɛ̈n thiɛk apɛidït ë pïïrdiɛ̈ yic, ee wɛ̈t ye ɣɛn këdiën nhiaar looi, cït man, ba ya thut ë nyïïr juëc ë dhaman tökic. Kën ë diɛt, thuur, ku jɔl ya pïïrdiën ye ɣɛn kuat ë këriëëc ëbën kaar looi, akëc diɛɛrdiën ye ɣɛn diɛɛr bɛ̈n dhuɔ̈k nyin piny. Agut cï thuratkiën ke ya ke thuur, aa cï ye bɛ̈n nyuɔɔth nɔn ë ye ɣɛn riɔ̈ɔ̈c, ku riɔ̈ɔ̈c kënë, acï ɣɛn bɛ̈n puɔ̈l ba rot ya thiëëc. Bï pïïr yïndï e dhaman bï bɛ̈n tueŋ? Ye wɛ̈tŋö ë ciɛk ë Nhialic pïïr?

Ku wën cïï ɣɛn dhuŋnɔm e thiëckiën ke tɔ̈u ɣanɔm yök, ɣɛn cï bɛ̈n gäi. Ë kööl tök thëëi ë thukulic, ɣɛn ku mïthke thukul, ɣok aa cï nyuc ke ɣo jiëëm kë bï rot looi ë pïïr bï bɛ̈n tueŋic. Mandy a ee tɔ̈u ë thukul ke ɣɛn, ku yen ee raan töŋ ë Ciëëtke Yekoba. Ee dhaman kënë yic, acï ɣɛn bɛ̈n gäm wëët dik apɛi. Acï bɛ̈n lɛ̈k ɛn “Andreas” “Na wïc ku ba dhuŋnɔm ë thiëc ë biäk ë pïïr bï bɛ̈n tueŋ ŋic, ke yï kuen Baibol.”

Cɔk aa nɔn këc yen ɣa tiiŋ puɔ̈u yen kën cï lueel, aca bɛ̈n lɔc ba dhuŋnɔm ë thiëckiɛ̈ yɔ̈ɔ̈p ë Baibolic. Mandy acï ɣɛn liëp buŋ ë Danyel cöökdïït 2, kë ca bɛ̈n kueen thïn, acï ɣɛn bɛ̈n gɔ̈i. Cöök ca kuen kënë, ajam ë biäk akumatke pinynɔm cïï mɛnh ë raan ke kuum, ku kuumden acï pïïr ë mɛnh ë raan waaric ë dhaman tueŋ ku jɔl ya köölë aya. Mandy acï ɣɛn bɛ̈n nyuɔ̈th cök kɔ̈k ke Baibol jam ë biäk ë pïïr bï bɛ̈n tueŋ. Ku tɛ̈ɛ̈n, ɣɛn cï adhuknïïm ë thiëckiɛ̈ jä bɛ̈n yök! Yeŋa gɛ̈t wël bï röt tiɛŋ kä, ku yeŋa lëu bï jam ë biäk kä bï röt looi tueŋ ku tiiŋkë röt tëden? Nadɛ̈ cuk lëu buk lueel Nhialic atɔ̈u?

Mandy acï kɔc cï röt thiaak karou ke ye Ciëëtke Yekoba bɛ̈n thiëëc Horst ku tiiŋde Angelika bïk ɣɛn kony ba Baibol deetic. Aca jä guɔ bɛ̈n ŋic Ciëëtke Yekoba aa keek kɔc nɔŋ nïïm duɔ̈ɔ̈r ë yic, wɛ̈tŋö aa rinkë Nhialic Yekoba luɔ̈ɔ̈i. (Diɛt 83:18; Mathayo 6:9) Aca bɛ̈n piɔ̈ɔ̈c nɔn cïï Yekoba mɛnh ë raan cak ke bï pïïr athɛɛr ë paraditho yic ë pinynɔm. Diɛt 37:9 aye lueel: “Piny abï lɔ̈ɔ̈k lak [löök] në kɔc ee Bɛ̈nydït [Yekoba] ŋɔ̈ɔ̈th.” Ɣɛn cï puɔ̈u bɛ̈n miɛt arëët, wɛ̈tŋö, pïïr athɛɛr kënë, acï gäm raan ëbën, kɔc wën ë lööŋke Baibol gam ku ye keke tääu ë pïïrden yic.

Ka yen, aca bɛ̈n them apɛi ba pïïrdiɛ̈ waar ku ya lööŋke Baibol tääu ë pïïrdiɛ̈ yic. Ke ɣa ye raandïït wën ŋic ke ɣa ye ket ë diɛt, kënë acï ɣɛn bɛ̈n puɔ̈l ba ya nhiam awu ba rot ya jat nhial, ka yen, ee wïc ɛn ba rot piɔ̈ɔ̈c ba rot ya kuɔɔr piny. Ku yen, acï yic bɛ̈n riɛl arëët ba ciɛɛŋdiën thɛɛr wään ye ɣɛn kë tɔ̈u ɣapuɔ̈u looi puɔ̈l. Ëmën, ɣɛn mit puɔ̈u apɛi ë wɛ̈t ye Yekoba kɔc ye them bïk lööŋke Baibol tääu ë pïïrdenic nyuɔ̈th käc ë puɔ̈u ku liɛɛr ë puɔ̈u!

Wään cïï ɣɛn naŋ ruɔ̈ɔ̈n thiëër ku bɛ̈t [18], käŋ karou acï pïïrdiɛ̈ bɛ̈n geeric, cït man, gääm ë ye lueel kɔc aa bï ke ya thɔ̈ɔ̈ŋ nïïm ku gääm ë ye lueel Nhialic aliu; ku tɛ̈ɛ̈n Baibol acï pïïrdiɛ̈ jä bɛ̈n waaric. Kë ca piɔ̈ɔ̈c ë Baibolic ë biäk pïïr bï bɛ̈n tueŋ, acï diɛɛrdiɛ̈ bɛ̈n dhuɔ̈k nyin piny ku gɛ̈m ɛn miɛt ë puɔ̈u ë pïïrdiɛ̈ yic. Ë ruɔ̈ɔ̈n tiɛm tök ku buɔt kadhoŋuan ku thiërdhoŋuan ku diäk [1993], ɣɛn cï bɛ̈n luɔ̈ɔ̈i baptïth ke ɣa ye raan töŋ ë Ciëëtke Yekoba, ku ruɔ̈ɔ̈n tiim karou [2000], ɣɛn cï Tabitha bɛ̈n thiaak, ku yen aya, ee ye raan töŋ ë Ciëëtke Yekoba. Ɣok aa dhamandït nɔ̈k ke ɣo kony kɔc kɔ̈k bïk Baibol ŋic. Kɔc juëc ke yeku piɔ̈ɔ̈c, aa nɔŋ gääm cït käkiɛ̈, cït man, gääm ye lueel bï kɔc ya thɔ̈ɔ̈ŋ nïïm ku gääm ye lueel Nhialic aliu. Ɣɛn puɔ̈u miɛt apɛi të cïï ɣɛn kɔc kɔ̈k kuɔny bïk Yekoba Nhialic ŋic.

Ë dhaman tueŋ wään cïï ɣɛn ye jɔɔk ba ya lɔ amɛtmɛɛt ë Ciëëtke Yekoba yiic, kɔc ke dhiëth ɛn aacï puɔ̈th bɛ̈n riääk ke ɣɛn arëët. Mïn dhaman ye ɣɛn lɔ amɛtmɛɛt ë Ciëëtke Yekoba yiic, Acïï kɔc ke dhiëth ɛn bɛ̈n tïŋ nɔn cïï pïïrdiɛ̈ ye yic ŋiɛc waar. Ku töŋ cï ɣɛn miëët puɔ̈u apɛi, ee wɛ̈t ye keek kuen ë Baibol ku aa lɔ amɛtmɛɛt ë Ciëëtke Yekoba yiic ke ɣɛn tök.

Ɣɛn ku tiiŋdië Tabitha, ɣok aa mit puɔ̈th apɛi ë thiëŋda yic ë wɛ̈t ye ɣok ye them buk wëët ë Baibol ë biäk thiëëk ya tääu pïïrda yic. Cït man ë wëët ye lueel, bï raan ya rëër ke raan töŋden cïï keek röt thiaak ku cïï be lɔ yäp ë diäär kɔ̈k aɣeer. Ku wëët kënë, acï thiëŋda bɛ̈n kuɔny bï lɔ tueŋ ke ril—Ɣeberuu 13:4.

Ëmën, ɣɛn cie bɛn riɔ̈ɔ̈c ku ɣɛn cie bɛn diɛɛr ë biäk ë pïïr bï bɛ̈n tueŋ. Ku ëmën, ɣɛn ë rot yök ke ɣa ye raan töŋ kɔcke Yekoba cï gam rɛ̈ɛ̈r ë pinynɔm ëbën, wën cï mat ku aa ciëŋ ë dɔ̈ɔ̈r. Ee paan ë Yekoba kënë yic, ɣok ë röt ŋiɛc ciëŋ ku ɣok ë röt tïŋ ke ɣo thöŋ ëbën. Ku ee yen kë ca gam ku akaar ba looi ë pïïrdiɛ̈ yic ëbën.