Kɔc jam ë yith aa lëu bï ke ya theek ë kɔc ë ke dhiëth keek, mäthken, ku bänyken ke luɔi. Aa lööŋ theekiic, ku aacie kenïïm ë waar ë këden cïk lueelic, ku aa yith lueel ë dhaman thok ëbën.

Të ye këriëëc ëbën ye looi ya yic ë dhaman thok ëbën, ke yïn lëu ba nɔmlääu yök ku ye kɔc yï theek.

Acïï Tharai lueel, “kueer piɛɛth wën lëu bïï kɔc ke dhiëth yïn yï gam nɔn ye yïn raan piɛth, ee ba nyuɔ̈th keek nɔn ye yïn raan cï dït ku ye nyin tïït ë rot, ku kënë, alëu ba looi të rëër yïn ke keek awu të rëër yïn yïtök.”

WËËT Ë BAIBOL: “Thɛmkï röt nɔn rɛ̈ɛ̈r wek ë gämic ëgɔk [apiɛth], caathkï röt.”—2 Korinthoi 13:5.

Të wïc yïn en bï kɔc yïn ya ŋɔ̈ɔ̈th awu ba kɔc bɛ cɔl athek yïn, ke kuɛɛrkä aa lëu bï yï kuɔny.

Ye puɔ̈u ɣɛɛr. Kɔc kɔ̈k acïï lëu bïk yï gam ke yï ye raan piɛth të ye yïn jam ë lueth. Të ye yïn jam ke yï ɣer puɔ̈u ë dhaman thok ku ye awɛ̈ɛ̈cku gam, ke kɔc aa lëu bïk yï dac gam ke yï ye raan piɛth.

Acïï Kaiman lueel, “apiɔlic bï raan yic lueel të le käŋ tueŋ ke piɛth. Ku na ye yith lueel ë biäk ë kärɛckun ca ke looi yiic ëbën ku ye ke gam, ke kɔc aa lëu bïk yï gam ke yï ye raan piɛth.”

WËËT Ë BAIBOL: “Ku athemku duëërku këpiɛth aa looi në akööl thook ëbɛ̈n.”—Ɣeberuu 13:18.

Ye ŋiɛc luui bï kɔc yïn ya ŋɔ̈ɔ̈th. Ë kuɛ̈n töŋ ë cïï kɔc cï piɔ̈c looi paan ë Amerika, Acïk bɛ̈n yök të cït raan thiërdhorou ku bɛ̈t ë buɔɔtic [78%], aa keek kɔc yeke gam keke ye ŋiɛc luui, ku aa ke gam keek ë wɛ̈t ye keek ŋiɛc luui ku yeke ŋɔ̈ɔ̈th.” Të piööc yïn rot ëmën ke yï ŋoot ke yï koor ba ya raan ye ŋɔ̈ɔ̈th, ka lëu bï yï kuɔny nhiäk të le yïn dït.

Acïï Thara lueel, “aye kɔc ke dhiëth ɛn tïŋ të ye ɣɛn käkiɛ̈ lëu ë luɔi ɣatök ku ya käkiën baai looi keke cïï ɣɛn bɛ täk nɔm ë dhaman thok ëbën. Të ye ɣɛn kä cïk ke gäm ɛn looi ëbën, ka ɣɛn gäm nɔmlääudït ku gamkë ɣɛn nɔn ye ɣɛn raan piɛth.”

WËËT Ë BAIBOL: “Aŋiɛc nɔn bï yïn këdï gam, . . . ku aŋiɛc nɔn bï yïn kë wär kë luɛɛl looi ayadäŋ.”—Pilemon 21.

Ye puɔ̈u liɛɛr. Dït ye raan dït bï käŋ ya lëu ë luɔi yetök, acïï thöŋ ke dït ye raan dït ye guöp bï ya tïŋ ë kɔc kɔ̈k. Ku ee yen ë wɛ̈t kɔɔr ë riënythii liɛɛr ë puɔ̈u të le keek tueŋ ke diët bï ke ya gam ë kɔc kɔ̈k nɔn ye keek kɔc piɛth.

Acïï Brandon lueel, “awïc dhaman bï kɔc ke dhiëth yïn ku kɔc kɔ̈k yï gam nɔn ye yïn raan ë käŋ lëu ë luɔi yïtök. Alëu bï rot lëu të ye yïn lɔtueŋ ke yï lëu käŋ ë luɔi yïtök ë dhaman bääric.”

WËËT Ë BAIBOL “Yen dam wek . . . guöm de kajuëc [liɛɛr ë puɔ̈u].”—Kolothai 3:12.