Të ye kɔc cï röt thiaak röt theek, ka röt nyuɔ̈th nhiëër të nɔŋ en ke cï ke wääc thook. Acïï buŋ ye cɔɔl Ten Lessons to Transform Your Marriage lueel, “kɔc cï röt thiaak aa cïï lëu bïk ke cï ke wääc thook puɔ̈l bï ke tekiic.” Keek aa lɔtueŋ keke jiëëm kë cï ke wääc thook yic ë kamken. Të jiɛɛm raan tök, ke raan tök yenɔm pälpiny bï piŋ ë kuer athɛ̈ɛ̈k, ku kënë ee ke kuɔny bïk luui ëtök keke cï ke yiic mat.

WËËT Ë BAIBOL: “Nhiëër . . . acïï ka ke yenguöp ee kɔɔr.” —1 Korinthoi 13:4, 5.

Acïï Micah lueel, “ku ba nyuɔ̈th tiɛŋdië nɔn theek ɣɛn en, ee wɛ̈t ba ya leec ku ya tïŋ ke thiekic ɣa nyin, ku cä luui kë wën lëu bï yen rac puɔ̈u awu thiëŋda racic.”

Të cïï kɔc cï röt thiaak röt ë nyuɔ̈th athɛ̈ɛ̈k, ke jamden alëu bï yic naŋ teer ku jiëëm ye kɔc ke gup jääm, ku jɔl ya män ë röt. Acïï kɔc ë yäp athöriic lueel, kït cït käkë, alëu bïk thiëëk dhiɛl teem kɔ̈u.

Acïï Brian lueel, “të ye raan tiiŋde jääm guöp ë wël wën cï piɛth, ka kënë alëu bï tiiŋde puɔ̈l bï röt ya tïŋ ke cï yic thiek, ku kënë alëu bï thiëŋden racic awu teem kɔ̈u.

TAK YNƆM WËLKÄ

Them ba yïnɔm tääu piny ku tïŋ të ye week jiɛɛm thïn ku të ye week luui thïn yithbuɔ yic. Ku jɔl rot thiëëc:

• Ye ayicdï cïï ɣɛn raandiën cïï ɣok röt thiaak jääm guöp, ku ye ayicdï cïï ɣɛn ye leec käken cï ke looi yiic?’

• ‘Ye kuɛɛr kou cïï ɣɛn raandiën cïï ɣok röt thiaak nyuɔ̈th athɛ̈ɛ̈k?’

JÄÄMKË KÄKË YIIC WEK RAANDUN CÏÏ WEEK RÖT THIAAK

• Ye loilooi kou ku ye wël kou lëu bïk kɔc cïï röt thiaak kuɔny bïk röt ya nyuɔ̈th athɛ̈ɛ̈k?

• Ye loilooi kou ku ye wël kou ye nyuɔɔth nɔn cïï kɔc cïï röt thiaak röt ë nyuɔ̈th athɛ̈ɛ̈k?

KÄ BÏ YÏN KUƆNY

• Gät kuɛɛr kadiäk nhiaar keek piny, bïï raandun cïï week röt thiaak yï ya nyuɔ̈th athɛ̈ɛ̈k thïn. Ku lɛ̈k raandun cïï week röt thiaak bï kë cït kënë looi aya. Ku jälkë awereekuön cä ke gɔ̈t wääciic, ku na cäk looi këya, ke jälkë them apɛi bä kë athɛ̈ɛ̈k nyuɔɔth ë ɣɔ̈n wën cäk ke gät piny yiic ëbën.

• Gät kït nhiar keek ë biäk raandun cïï week röt thiaak piny. Ku jɔl lɛ̈k en nɔn nhiɛɛr yïn kïtken kä.

Acïï Megan lueel, “ku ba nyuɔ̈th muɔnydiɛ̈ nɔn theek ɣɛn en, aya nyuɔɔth ë loilooikiën ya ke looi yiic nɔn thiek yen yic tënë ɣɛn ku anhiaar bï puɔ̈u miɛt. Athɛ̈ɛ̈k acä nyuɔ̈th muɔnydiɛ̈ kädït ya ke looi yiic kapɛ̈c, aya nyuɔ̈th athɛ̈ɛ̈k aya käthii piɔliic yiic, cït man loilooi thii ya ke looi ku jɔl ya wëlkiën ya ke lueeliic.”

Thökde, acie wɛ̈t ba ya takic nɔn cïï yï nyuɔ̈th athɛ̈ɛ̈k awu këc yï nyuɔ̈th athɛ̈ɛ̈k, ee wɛ̈t bï raandun cïï week röt thiaak rot ya yök ke cï nyuɔ̈th athɛ̈ɛ̈k.

WËËT Ë BAIBOL: “Yen dam wek piɔ̈n ë dap kok, cït kɔc cïï Nhialic lɔc, kɔc ɣeriic ku nhiaar ke, ku damkï dhuëëŋ, ku piɔ̈n koor, ku kuur ee raan rɔt kuɔɔr piny, ku rëër ëmääth, ku guöm de kajuëc.”—Kolothai 3:12.