Diäär ku röör cï röt thiaak ku nhiarkë röt ë thiëŋdenic, aa lëu bïk thiëŋden ya tïŋ ke cïn ke ben ye teem kɔ̈u, ku kënë alëu bï dɔ̈ɔ̈r bɛ̈ɛ̈i thiëŋdenic. Tik ku Moc ku thek kë röt thiëŋdenic, ayekë dhiɛl gam ke puɔ̈th nɔn cïn en kë lëu bï thiëŋden teem kɔ̈u cɔk aa nɔn ril käŋiic.

Kɔc kɔ̈k cï röt thiaak aa röt mac thiëŋdenic, wɛ̈t ye keek riɔ̈ɔ̈c kë bïï kɔc kɔ̈k lueel të teem kek thiëŋden kɔ̈u. Ku thiëŋ wën lëu bï ŋiɛc lɔtueŋ apiɛth, ee thiëŋ nɔŋic nhiëër ku athɛ̈ɛ̈k.

WËËT Ë BAIBOL: “Moc, ë cïï tiiŋde ciec [päl].”—1 Korinthoi 7:11.

Acïï Micah lueel, “të nhiɛɛr week röt thiëŋdunic, ke we duökë riäŋ puɔ̈u päl bï miɛt piändun racic. Ye raan awänyde gam ku yakë awɛ̈ɛ̈ckuön dac päl piny. Yakä kärɛc wën röt looi thiëŋdunic tïŋ ke ye kä lëu bïk nhiëërdun racic ku acie ka lëu bïk thiëŋdun teem kɔ̈u.

Të cïï käriliic nhiëër kɔc cï röt thiaak racic, ayekë guɔ takic ke nïïm, ‘nɔn cïï keek bï bɛn rëër ëtök thiëŋdenic’ ku keek alëu bïk kuɛɛr bïï keek ke puɔ̈k yɔ̈ɔ̈p.

Acïï Jean lueel, “kɔc kɔ̈k aa röt thiaak ku tɛ̈ɛ̈ukë kenïïm, na lɔ käriliic röt looi, ka lëu bïk thiëŋden teem kɔ̈u. Të cïï kɔc röt thiaak ku ye ke guɔ takic kenïïm nɔn bïï keek thiëŋden teem kɔ̈u, aye kënë nyuɔɔth thiëŋden ee cïnic nhiëër mïn jɔ̈ɔ̈k keek ye cöök.”

TAK YÏNƆM WËLKÄ

Na cï teer bɛ̈n nhial . . .

• Nadɛ̈ ye rot yök ke yï dhiɛɛu puɔ̈u wei ë wɛ̈t cïï week röt thiaak?

• Nadɛ̈ ye takic dhaman däŋ ke yï wïc raan dɛ̈t, wɛ̈tŋö raandun cïï wek röt thiaak acï ben piath?

• Nadɛ̈ ye wël cït käkë lueel dhaman däŋ “Yïn nyääŋ piny”awu “ɣɛn la wïc raan dɛ̈t nhiaar ɛn”?

Na nɔŋ thiëc töŋ ye gam ee thiëc kä yiic awu yeke gam ëbën, kënë ee yen dhaman bïï week nhiëërdun looi bï riɛl.

JÄÄMKÄ THIËC KÄ YIIC WEK RAANDUN CÏÏ WEEK RÖT THIAAK

• Nadɛ̈ cï nhiëërda nyin dhuk piny thiëŋda yic? Ku na cï nyin dhuk piny, ke ye wɛ̈tŋö?

• Ye käŋö buk ke looi ëmën buk nhiëërda looi bï riɛl?

KÄ BÏ YÏN KUƆNY

• Them ba raandun cïï wek röt thiaak ya gät awereŋ nɔŋic wëlke nhiëër ë dhaman thok ëbën.

• Ye nhiëër nyuɔ̈th raandun cïï wek röt thiaak ë kueer bïï yïn thuratke ya tääu yï lɔ̈ɔ̈m tëdun ë luɔi awu telapundu nyin.

• Ye raandun cïï wek röt thiaak yuöp ë dhaman thok ëbën të rëër yïn tëdun ë luɔi awu të cïï week rɛ̈ɛ̈r ëtök.

WËËT Ë BAIBOL: ‘Kë cïï Nhialic matic, ë cïn raan tek ee yic.’—Mathayo 19:6.