Jam piɛth alëu bï rot lëu ë kamkuön we mïthku, të ye week kë tɔ̈u we puɔ̈th rɔm.

Aye kɔc nɔŋ mïth yök ke rilic bïk ya jam ke mïthken të cïï keek dït bïk ya riënythii. Wään koor ë mïthku, aa ke ye yïn lɛ̈k këriëëc ëbën tɔ̈u ë ke puɔ̈th, ku wään cïï keek ya riënythii, jamden acï nyin bɛ̈n dhuk piny. Ka yen, acïï kɔc ke dhiëth keek bɛ ŋic yeŋö tɔ̈u ke puɔ̈th. Ee rot looi ke yï cït ke kääc ë wɛ̈ɛ̈r awu wäär alɔŋ tuï ku mïthku aa kääc ë wɛ̈ɛ̈r alɔŋë. Ku na cïï mïthku jɔɔk bïk cïï ye bɛn jam ke yïn, ke yen ë dhaman kɔɔr yïn en ba ya jam ke keek kan kënë!

Ye rëër ke yï cï rot guiir ba ya jam ke mïthku. Them ba ya jam we keek të cïï keek yï thiëëc, cɔk aa nɔn ye piny wakɔ̈u ë wɛ̈ɛ̈ric.

Acïï Lisa lueel, “të ye yen rot looi bï mïthku yï thiëëc wakɔ̈u, ka lëu ba lueel, ‘ɣɛn rɛ̈ɛ̈r ke yïn mïn wën aköl, ku yïn këc jam, ku ëmën, yïn wïc ba jam!’ Ye këdï lëu bïï ɣok mïthkuɔ ya pëën ë dhaman wïc keek yen bïk jam ke ɣok? Nadɛ̈ nɔŋ raan cïï ye nhiar bï ya jam ke mïthke?”

Acïï Herbert lueel, “cɔk aa nɔn nhiar ɣɛn en ba dac nin, ke dhaman piɛth bïï ɣɛn jam ke mïthkië, ee wakɔ̈u ë wɛ̈ɛ̈r ciɛlic.”

WËËT Ë BAIBOL: “Ë cïn raan ë piathde kɔɔr etök, ë ŋɛk ë ye piath de ŋɛk kɔɔr.”—1 Korinthoi 10:24.

Them bï ciën kë rɛc dhamandun ye week jam we mïthku yic. Ee cïï mony töŋ nɔŋ mïth lueel: “ë dhaman däŋ të jiɛɛm ɛn ke mïthkië, ɣɛn ë rot yök ke ɣa tak käjuëc yiic, ku käkë aa cie ɣɛn puɔ̈l ba ɣanɔm ŋiɛc tääu piny apiɛth ba kë lueel mïthkië piŋ. Ka tɛ̈ɛ̈n, aye mïthkië guɔ ŋic nɔn cïï ɣɛn nɔm tɔ̈u ë jamic.

Na ye TV ku telapun yï rac nɔm, ke thiök keek ëbën. Ku jɔl yïnɔm tääu piny ba kë lueel mïthku piŋ, ku them ba kë lueel mïthku ya tïŋ kë thiekic cɔk aa nɔn ye yïn ye yök ke cïï piɛth.

Acïï Maranda lueel, “akɔɔrku buk mïthkuɔ ya dɛɛt puɔ̈th bïk ŋic nɔn nadɛ̈ käken yeke lueel ëbën, aa thiekiic arëët tënë ɣok. Na cuk loi këya, ka cïk lëu bïk bɛn nhiaar bïk ya jam ke ɣok.”

Acïï Anthonï lueel, “na cï mɛnhdu kë cïï nhiar lueel, ke yï duk puɔ̈u ë guɔ riääk.”

WËËT Ë BAIBOL: “Yak röt tiit awu yakë we nïïm tääu piny në pïŋ aa wek piŋ.”—Luk 8:18.

Yakë jam ke mïthkuɔ̈n të rëër week ëtök. Ë dhaman däŋ, mïth aa kë tɔ̈u ke puɔ̈th jäl lueel të liu kɔc ë ke dhiëth keek thïn.

Acïï Nikole lueel, “të rëër ɣok ë riäi yic, ee yen dhaman piɛɛth wën yeku yök bïï ɣok jäl jam ke mïthkuɔ.”

Dhaman ye kɔc cam baai, ee kɔc baai mat nïïm bïk rëër ëtök.

Acïï Robin lueel, “dhaman ë cäm aköl , ee yen dhaman wën ye ɣok jäl jam ë kä cï röt luɔ̈ɔ̈i ɣok, ye kärɛc awu ye käpiɛth. Ku dhaman kënë, ee ɣok puɔ̈l buk ɣo yiic mat ku konyku röt ë käriliic wën jöör ɣook.”

WËËT Ë BAIBOL: “Wek mïthëkɔckuɔn nhiaar, raan ëbɛ̈n ë yeyïc mɔth ë pïŋ, ku ye rɔt gɔ̈ɔ̈u në jam.”—Jakop 1:19.