Kɔc ë luui arëët aa cie jai ë luɔi. Keek aa luui ke tuc gup bïk röt ya kony ë käken ke pïïr ku konykë kɔc kɔ̈k aya, cɔk aa nɔn cïï kɔc kɔ̈k londen yekë looi nhiar.

Cɔk aa nɔn cïï ɣok loilooi kɔ̈k nhiar, pïïr acï yic piɔl. Ë pinynɔm, acïï kɔc juëc nhiar bïk ya luui apɛi. Ku të ye ɣok luui arëët, ke ɣok aa lëu buk käkuɔn ke pïïr yök.—Wɛ̈ɛ̈t cï Määtic 3:13.

Acïï Reyon lueel,“të ye yïn luui ke yï tuc guöp awu apɛi, ke yïn lëu ba käkun ke pïïr yök ku ye puɔ̈u miɛt. Ku miɛt ë puɔ̈u ya yök kënë, acï ɣɛn kuɔny ba luɔɔi nhiaar. Të nhiɛɛr yïn luɔɔi, kënë alëu bï yï kuɔny bï kɔc yï ŋic ke yï ye raan ë ŋiɛc luui apɛi.”

WËËT Ë BAIBOL: ‘Lɛ̈th ë guöp awu tuc ë guöp ee raan kuɔny.’—Kɛ̈ŋ 14:23.

Kuɛɛr kä aa lëu bïk yï kuɔny ba luɔi ya tïŋ ke piɛth ku ye nhiaar.

Piɔ̈ɔ̈cë rot ba käŋ ŋiɛc ya looi apiɛth ku ye luɔɔi nhiaar. Cït man, të looi yïn loilooi baai, ku lon cï yiëk yïn ë thukulic, awu londun ye looi tëdun ë luɔi, ke yï tɛ̈ɛ̈u yïpuɔ̈u thïn, ku ŋic looi bï piath. Na ye luɔi looi të ye yen luɔɔi thïn, ke yï tïŋ kuɛɛr bïï yïn ke ye dac ya looi bï thök. Të ye yïn luɔɔi ŋiɛc looi apiɛth, kënë alëu bï yïn ya miëët puɔ̈u ë dhaman looi yïn en.

WËËT Ë BAIBOL: ‘Raan ŋic luɔide looi, abï kɔ̈ɔ̈c ë bäny nïïm, acïï bï kɔ̈ɔ̈c ë kɔc cie bäny nïïm.’—Kɛ̈ŋ 22:29.

Kë lëu ba muk yïnɔm. Të ye yïn loilooiku ŋiɛc looi apiɛth, kënë alëu bï kɔc kɔ̈k kuɔny aya. Cït man, të ye yïn ŋiɛc luui apɛi ë loilooikun baai yiic, kënë, alëu bï kɔc kɔ̈k yiëk nɔmlääu baai bïk kɔ̈k ya looi.

WËËT Ë BAIBOL: “Raan yïn raan däŋ käŋ, yen aye thieei [puɔ̈u miɛt apɛi] awär raan ë yïnë käŋ.”— Luɔi de Tuuc 20:35.

Ye käjuëc looi. Ë wɛ̈t bïï yïn ya kɔ̈ɔ̈c ë kä lik cï ke lɛ̈k yïn ba ke looi yiic, ye kɔ̈k mat thïn ba ke looi aya. Ku na ye looi këya, ke yïn bï käjuëc looi ë wɛ̈t nhiɛɛr yïn keek ë pïïrdu yic, ku acie wɛ̈t cïï yï thany thïn ba ke looi.—Mathayo 5:41.

WËËT Ë BAIBOL: “Ku acïn kë duɛ̈ɛ̈r looi të kɛ̈n ɛn këde piɔ̈ndu piŋ . . . abï aa këde yïnpiɔ̈u etök.”—Pilemon 14.

Ye käŋ thɔ̈ɔ̈ŋ nyïïn. Kɔc ë luui apɛi, aacie adakrööt, awu aacie luui arëët aya ë dhaman bääric abïk nïïm määr ë pïïrden. Aa dhaman ë luɔi ku dhaman ë lɔ̈ŋ thɔ̈ɔ̈ŋ nyïïn.

WËËT Ë BAIBOL: “Ku ayadäŋ, aŋuän bä dɛ kë koor ku rëër adïu, në luɔi bï raan aa cool ë luɔɔi në cin kedhie, ee cum de yom cök.”—Wɛ̈ɛ̈t cï Määtic 4:6.