Të ye kɔc cï röt thiaak luui ëtök ë thiëŋdenic, kë keek, aa cït kɔc karou kuath riän nhial wën röt kuɔny. Të cïï käriliic röt looi, yakë tak ë kë bï week kuɔny “wedhie” ku acie kë bï “raan tök” kuɔny.

WËËT Ë BAIBOL: “Acïkï be aa rou, ayek guöp tök.”—Mathayo 19:6.

Acïï Krithtopher lueel, “moc ku tik aa adhil ya luui ëtök bï thiëŋden tiam.”

Të cïï kërac rot looi baai, moc ku tik ku cï kë luui ëtök, aa lëu bïk kenïïm tääu ë kärɛc cïk ke wuöciic. Ku kënë acïï lëu bï kë kuɔny bïk kërɛɛc cï rot luɔ̈i keek cɔ̈kpiny.

Acïï Alɛkdhandra lueel,“lon ye kɔc luui ëtök ke cï ke yiic mat, ee thiëëk puɔ̈l bï lɔtueŋ. Ɣɛn ku muɔnydiɛ̈, na ɣok cie luui ëtök ke ɣo cï ɣo yiic mat, ke ɣo lëu buk cït kɔc rɛ̈ɛ̈r ɣɔ̈n tök ke ɣo këc röt thiaak, ku ɣok aya, ɣok cït kɔc karou rɛ̈ɛ̈r ɣɔ̈n tök, ku acie tök yen loi kë.

TAK YÏNƆM EE KÄKË

• Nadɛ̈ ya wëu ya ke looi tïŋ keke ye käkiɛ̈ “ɣatök”?

• Të bïï yen ë dhaman ye ɣɛn lɔ̈ŋ baai, nadɛ̈ ya rot mɛɛc wei tënë raandiën cïï ɣok röt thiaak?

• Nadɛ̈ ya rot mɛɛc wei tënë kɔc ruääi ke raandiën cïï ɣok röt thiaak?

JÄÄMKË KÄKË YIIC WEK RAANDUN CÏÏ WEEK RÖT THIAAK

• Ye ɣɔ̈n kou ye ɣok ke luui thïn ëtök ë thiëŋda yic?

• Ye ɣɔ̈n kou wïcku keek buk ke cɔ̈kpiny?

• Ye käŋö kɔɔrku keek buk ke looi, buk tëdan ye ɣok luui thïn cɔ̈kpiny?

KÄ BÏ YÏN KUƆNY

• Thɔ̈ɔ̈ŋë yicda, week aa thuëëc ë kura, ku wek cï we yiic tek. Yeŋö ba looi aguɔkë röt mat tën tök?

• Ë wɛ̈t bïï yïn ya tak ‘ye këdï bïï ɣɛn tiam?’ apiɛth ba ya tak ‘ye këdï bïï ɣok tiam?’

Acïï Ethan lueel, “acïï piɛth bäk ya teer, yeŋa nɔŋ nɔm yic ku yeŋa cïn nɔm yic. Kënë acïï lëu bïï dɔ̈ɔ̈r bɛ̈ɛ̈i ku män ë yic ë thiëŋdunic.”

WËËT Ë BAIBOL: “Ë ŋɛk cïï ka ke yenguöp ee ŋic kapäc, e ye ka ke kɔc kɔ̈k ŋic ayadäŋ.”—Pilipoi 2:3, 4.