AWEREŊ KƆC KE DHIËTH MÏTH
7: Lööŋ
YEŊÖ WƐ̈TDENIC
Lööŋ wɛ̈tdenic, aa lööŋ wën ye raan ke kuany bïï yen ke rot mac ë pïïrde yic. Cït man, nadɛ̈ ye them ba puɔ̈u ya ɣɛɛr ë këriëëc ëbënic? Na yen tëde, ka ye dhiɛl nhiaar bï mïthku puɔ̈th ya ɣɛɛr aya.
Lööŋ aa nɔŋiic wël kɔc wɛ̈ɛ̈t ë të ye käŋ luɔi thïn ë pïïric. Cït man, të bïï raan luɔi ya nhiaar thïn, të bïï raan guöp ya tuc thïn, ku jɔl ya të bïï raan käŋ ya thɔ̈ɔ̈ŋ nyïïn thïn, käkë aa lëu bïï raan ke piɔ̈ɔ̈c ke ŋoot ke koor.
WËËT Ë BAIBOL: “Ye meth wɛ̈ɛ̈t ke koor, ke bï ya mɛnh [piɛth] wadäŋ.”— Kɛ̈ŋ 22:6.
YE WƐ̈TŊÖ YE LÖÖŊ YIIC THIƐK?
Ëmën cïï piööcdïït ë pinynɔm lɔ ke juak ye nyin yeköölë, lööŋke pïïr aa thiekiic apɛi. Acïï Karan lueel, “kärɛc lëu bïk pïïr waaric aa lëu bï ke guɔ yök telapun nyin.” “Mïthkuɔ alëu bïk rëër ɣo lɔ̈m ku keek aa ɣoi kë wën cï piɛth ë telapun nyin.”
WËËT Ë BAIBOL: ‘Kɔc cï dït ë käk ë wëi yiic. . . aa këpiɛth pɔ̈c bei në këracic.’—Ɣeberuu 5:14.
Lööŋ ɣo kuɔny të luui ɣok aa thiekiic aya. Lööŋkä aa nɔŋiic ciɛɛŋ piɛɛth ë raan (cït man të jiɛɛm raan kek raan ka lëu bï lueel “yïn ca lɔ̈ŋ nyin” awu “yïn ca leec”) ku ye nhiëër nyuɔ̈th kɔc kɔ̈k—ku yen ciɛɛŋ piɛɛth kënë, akɔɔr bï määr yeköölë, wɛ̈tŋö kɔc aa nhiaar telapuun apɛi awär nhiëër nhiɛɛr keek kɔc.
WËËT Ë BAIBOL: ‘Ku acït man kɔɔr wek kë bï kɔc kɔ̈k aa luöi wek, ke yak kë luööi keek ayadäŋ.’ —Luk 6:31.
YEŊÖ LËU BA LOOI?
Tääu lööŋ mɛc yïn ke rot piny. Acïï kɔc yäp ë wël lueel, riënythii ku cï ke ŋiɛc wɛ̈ɛ̈t ku piööc keek, ka lëu bïk jai ku meec kë röt wei luɔi käk ë baliic.
KË BÏÏ KUƆNY: Luel kä loi röt bïï week ke jam jɔɔk cöök ë biäk lööŋ ke pïïr. Cït man, të nɔŋ en kä cï ke caal ë wɛ̈t mɛɛn kɔc röt, ka lëu ba lueel: “Ee kërac apɛi ba kɔc kɔ̈k ya tïŋ ke ye riäŋ puɔ̈ndïït rɛc cït ë kënë ya nyuɔ̈th kɔc kɔ̈k. Ye takic yeŋö kɔc looi bïk puɔ̈th ya riääk këya?”
Ee cïï Brandon lueel “ee yic riɛl apɛi tënë mïth bïk këpiɛth looi, wɛ̈tŋö aa kuc kërac ku këpiɛth.”
Piɔ̈ɔ̈c mïth ciɛɛŋ piɛth. Kënë alëu bï mïth thii kor kuɔny bïk ŋiɛc ya jam, cït man, alëukë bïk ya lueel, “yïn ca lɔ̈ŋ nyin” awu “yïn ca leec” ku yekë diɛɛr ë kɔc kɔ̈k aya. “Të ye mïth mat ë kä ye kɔcdït ke looi yiic, cït man, kä yeke looi baai, kä yeke looi ë thukulic, awu kä yeke looi paanden rëër kek thïn. Kënë abï ke kuɔny bïk kɔc kɔ̈k ya luɔ̈ɔ̈i käpiɛth,” ee yen kë cïï buŋ ye cɔɔl Parenting Without Borders lueel kan kënë.
KË BÏÏ KUƆNY: Ye mïthku yiëk loilooi bïk ke ya looi ku kënë abï ke kuɔny bïk kɔc kɔ̈k ya luɔ̈i käpiɛth.
Acïï Thära lueel “na ye mïth mat ë loilooi yeke looi baai yiic, kënë alëu bï ke kuɔny ë dhaman bï bɛ̈n tueŋ bïk ya luui kapɛ̈c. Të ye keek loilooiken yekë ke looi lëu ë luɔi, kënë abï ke kony ë dhaman bï bɛ̈n tueŋ bïk lɔtueŋ ë pïïric.”