Pɛ̈lëpiny awäc wɛ̈tde yic, ee ba kërɛɛc cïï raan luɔ̈ɔ̈i yïn puɔ̈l ëbën ku cïï ben takic. Ku yen, pɛ̈lëpiny awäc acie yen nyuɔɔth nɔn cïï raan nɔm määr ë kërac cï luɔ̈i yen.

WËËT Ë BAIBOL: “Yak rëër apiɛth ëtök, yak röt pɔ̈l wapäc, të de en raan de nɔm gööny [awäc] kekë raan däŋ, acït man cï Kërtho we pɔ̈l, ke we ye röt pɔ̈l aya.”—Kolothai 3:13.

Acïï Aron lueel, “të nhiɛɛr yïn raan, kë yïn cïï lëu ba yïnɔm tääu ë kä thii rɛc ye ke looi yiic, yïn lëu ba yïnɔm tääu ë käpiɛth ye ke looi yiic.”

Na ye rëër ke yï cï puɔ̈u riääk, ka lëu bï yï yiëk arɛɛm ë nɔm ku arɛɛm ë guöp, ku alëu bï thiëŋdun racic aya.

Acïï Julia lueel, “ë dhaman däŋ, muɔnydiɛ̈ ee ɣa lɛ̈k malec të nɔŋ en këdïït cï ɣa rac puɔ̈u ku ee cie yic ë pial tënë ɣɛn ba päl piny. Ku yen, aca bɛ̈n pälpiny, ku ɣɛn cï rot bɛ̈n gɔ̈k ë wɛ̈t ë këc ɣɛn ye dac pälpiny. Ku Kënë, ee cie thiëŋda ŋiɛc cɔl lɔtueŋ.”

TAK YÏNƆM WËLKÄ

Ë dhaman däŋ, ku cï raandun cïï week röt thiaak yï rac puɔ̈u ë wɛ̈t kë cï lueel awu kë cï looi, ke yï thiëc rot ee thiëckä:

• ‘Nadɛ̈ ya puɔ̈u guɔ riääk ë këthiin piɔlic yic?’

• ‘Nadɛ̈ ye këden cï looi kënë këdïït rac arëët, awu ye këthiin piɔlic ba guɔ pälpiny?’

JÄÄMKË KÄKË YIIC WEK RAANDUN CÏÏ WEEK RÖT THIAAK

• Ye dhaman yïndï yeku nɔ̈k buk röt jäl päl awɛ̈ɛ̈ckuɔ?

• Yeŋö lëuku buk looi buk röt dac ya päl awɛ̈ɛ̈ckuɔ?

KÄ BÏ YÏN KUƆNY

• Të cïï raandun cïï week röt thiaak yï rac puɔ̈u, kë duk ye takic nɔn ë cïï yen ye tääu yenɔm ke bï yï luɔ̈i kërac.

• Them ba kërɛɛc cïï raandun cïï week röt thiaak luɔ̈i yïn pälpiny, ku muk yïnɔm ɣook ëbën, “wok ee cool ë wäc käŋ wodhie.”—Jakop 3:2.

Acïï Kimberly lueel, “apiɔlic buk awɛ̈ɛ̈ckuɔ pälpiny të nɔŋ ɣok gup awɛ̈ɛ̈c ɣodhie, ku arilic buk awäc pälpiny të ye yen raan tök yen cä awäc looi. Bï raan awäc gam awu bï raan awäc pälpiny, keek kedhie, aa wïc koor ë röt piny.”

WËËT Ë BAIBOL: “Dapkï mat wekë raan dɛ wek ater.”—Mathayo 5:25.