Kïn ë raan nyuɔɔth wɛ̈tde yic, aa cie rinke raan awu të ye kɔc ye tiëŋ thïn yetök. Kïn ë raan nyuɔɔth anɔŋic lööŋ mɛc ë raan ke rot, kä ye raan ke gam, ku jɔl ya të ye raan luui thïn. Yic pacɔ̈k, kïn ë raan nyuɔɔth ee yen kɔc kuɔny bï kɔc yï ŋic, ye raan yïndï.

Të ŋic yïn kïndun piɛɛth wën yï nyuɔɔth, ke yïn lëu ba kɔ̈ɔ̈c ke yï ril ku gël gäämdu kɔ̈u, ku cïï kɔc kɔ̈k päl bïk yï muɔ̈ɔ̈r.

Acïï Adrian lueel, “kɔc juëc, aa cït raan cï cuëc adök wën ye cuööthkɔ̈u alɛ̈th ë dukɛ̈ɛ̈niic bïï alɛ̈th ya ɣaac wei. Aa cie kuany alɛ̈th bïk ke cieŋ, aa yeke cuööth kɔ̈ɔ̈th.”

Acïï Courtney lueel, “ɣɛn cï rot piɔ̈ɔ̈c ba kën yic ya looi cɔk aa nɔn cïï yen yic piɔl ba looi. Yic adil, alëu ba lɛ̈k yïn ye yïïŋa keek mäthkië, ë tëden ye keek luui thïn ku të ye ɣɛn luui thïn të rëër ɣɛn ɣo keek.

WËËT Ë BAIBOL: “Warkë rɔ̈t ë kueer bïï wek tɛ̈ktɛ̈kdun geeric, aguɔkë piath ë Nhialic nyuɔ̈th rɔ̈t ku kë ye gam ku luɔiden lɔjik.”—Romai 12:2. NWT

Tak yïnɔm, wïc ba ya raan yïndï ëmën ku kɔr ba ya raan yïndï ë dhaman bï bɛ̈n tueŋ ë kueer bïï yïn käkun riil yïn ke thïn ku käkun niɔp yïn ke thïn ŋic ku jɔl ya käkun yeke gam. Kueer piɛɛth bïï yïn ye jɔɔk cöök, ee ba thiëc kä kaŋ dhuknïïm.

Riɛl: Ye käŋö ŋic keek ë luɔi? Ye ɣɔ̈n kou riil ɣɛn ke thïn? (Cït man: Nadɛ̈ ya dhaman muk nɔn? Nadɛ̈ ya rot duut? Nadɛ̈ ya luui apɛi? Nadɛ̈ ya kɔc miɔɔc?) Ye käpiɛth kou ya ke looi?

KË BÏÏ KUƆNY: Nadɛ̈ ye yic riɛl tënë yïn ba käpiɛth ca ke looi cïï ye takiic? Thiëc kɔc ke dhiëth yïn ku mäthku, ye ɣɔ̈n kou ye keek yï tïŋ ke yï ril thïn, ku ye wɛ̈tŋö.

WËËT Ë BAIBOL: “Raan ëbɛ̈n ë ŋɛk ë ye luɔide yenguöp thɔ̈ɔ̈ŋ ë yepiɔ̈u, yen abï en dɛ të bï en rɔt leec në këde yen etök, ku acie në këde raan däŋ”—Galatai 6:4.

Kä niɔp yïn ke thïn: Ye ɣɔ̈n kou niɔp ɣɛn ke thïn kaar ba ke cɔ̈kpiny ë pïïrdiɛ̈ yic? Ye nɛn yen lëu bïï ɣɛn them ba lööny ë këracic? Ye ɣɔ̈n kou lëu bïï ɣɛn ke rot ya duut thïn arëët?

WËËT Ë BAIBOL: “Të luel wok en, an, cïn kërɛɛc cath ke wook, ke wok ee röt math, ku acïn yic cath ke wook.”—1 Jɔn 1:8.

Käkiën ya ke gam: Ye lööŋ kou ya ke luɔ̈ɔ̈i ë pïïrdiɛ̈ yic, ku ye wɛ̈tŋö? Nadɛ̈ ya gam nɔn tɔ̈u ë Nhialic? Ye käŋö cï ɣɛn kuɔny ba gam nɔn tɔ̈u ë Nhialic? Ye loilooi kou ya ke tïŋ ke cïï piɛth, ku ye wɛ̈tŋö? Yeŋö ya gam ɣa puɔ̈u ëbën ke bï rot looi ë dhaman bï bɛ̈n tueŋ?

WËËT Ë BAIBOL: “Ku yöŋ yïn käŋ yökiic [pɛlënɔm] abï yï gël.”—Kɛ̈ŋ 2:11.