Kë ca tääu yïnɔm ba looi acie cït nyuɔ̈th, ee kë wën ye nhiaar ba looi. Kë cïï raan tääu yenɔm bï looi anɔŋic bï kaŋ nyuc piiny bï takic të bïï yen ye luɔi thïn ku yɔ̈ɔ̈p kuɛɛr kɔ̈k bïï yen ke ye looi ku acie kueer tök.

Kä cïï raan ke tääu yenɔm bï ke looi aa lëu bïk yiic ciëk awu aa lëu bïk yiic bɛ̈ɛ̈r, cït man, (aa lëu bïk nïn awu yithbuɔ) nyaai, (pɛ̈ɛ̈i awu ruɔ̈ɔ̈n). Kä dït wën ca ke tääu yïnɔm ba ke looi alëu bïk röt lëu të kɔŋ yïn ye jɔɔk käthii cekiic ba ke looi.

Të cïï yïn kä ca ke tääu yïnɔm ba ke looi thöl ë luɔi, kënë abï yï kony ba rot ya ŋɔ̈ɔ̈th, ku looi mänhdu bï riɛl ke kɔc kɔ̈k, ku juɛk miɛt ë piändu yic.

Ye rot ŋɔ̈ɔ̈th: Të cïï yïn käthii wën ca ke tääu yïnɔm ba ke looi lëu ë luɔi, kënë alëu bïï puɔ̈l ba rot ya ŋɔ̈ɔ̈th nɔn bïï yïn kä dït kɔ̈k ca keek kuany lëu luɔ̈i aya. Ku kënë, alëu bï yï kony aya ba rot ya ŋɔ̈ɔ̈th ba käriliic yï yök tiaam.

Määth: Anhiɛɛr kɔc kɔ̈k bïk ya määth ke kɔc wën nɔŋ kä cïk ke tääu kenïïm bïk ke looi, kɔc wën rɛ̈ɛ̈r ke cï röt guiir bïk käken cïk ke tääu kenïïm looi të cït tëden. Kueer töŋ wën thiekic bïï ɣok mänhda looi bï riɛl, ee wɛ̈t buk ya luui ëtök ke kɔc cï kuany kä thöŋ kek kä cuk ke kuany.

Miɛt ë puɔ̈u: Të cïï yïn käkun ca ke tääu yïnɔm ba ke looi thöl ë luɔi, ke yïn ë puɔ̈u miɛt.

Acïï Kiritopa lueel, “anhiaar ba kuany kä ba ke looi. Aa ɣɛn kuɔny ba rëër ke ya lui ë dhaman thok ëbën. Të cïï yïn këdun ca tääu yïnɔm thöl ë luɔi, ke yïn puɔ̈u miɛt ku jɔl yï puɔ̈u tɔɔŋ ku jɔl lueel ‘Ɣaiwä, aca thöl ë luɔi! Ɣɛn cï këdiën ca kuany ba looi thöl ë luɔi.’”

WËËT Ë BAIBOL: “raan ë yom woi acie com, ku raan ee diɛɛr arëët ë luäät acï bï tem” —Wɛ̈ɛ̈t cï Määtic 11:4.

Luɔ̈i kuɛɛr kä bïï yïn käkun ca ke kuany thöl ë luɔi.

Kuëny käkun wën wïc ba ke looi bei. Gät käkun ca ke kuany ba ke looi piny, ku yiën keek dhaman bïï yïn ke thöl ë luɔi, ku kuany ye töŋ no ba kaŋ looi tueŋ agut të bïï yïn ke thöl ë luɔi.

Guiir rot. Loi käkë, ba käkun ca ke kuany thöl ë luɔi:

• Ye dhaman bïï yïn ke thöl ë luɔi bɛ̈ɛ̈i bei.

• Ye kuɛɛr yïndï ba ke luɔ̈ɔ̈i bïï yïn ke thöl ë luɔi.

• Ku ye yïnɔm tak ye käriliic yïndï lëu bïk yï jöör ee lon kënë yic, ku ye këdï bïï yïn ke tiaam.

Jɔk luɔi cöök. Du kɔŋ tïït ke yï cï luɔi jɔk cöök, wɛ̈t tiit yïn këriëëc ëbën bï kaŋ tɔ̈u ëbën, ku ba luɔi jäl jɔɔk cöök. Ye rot thiëëc, ‘Ye këtöŋ no ba kaŋ looi tueŋ ba këdiën ca tääu ɣanɔm thöl ë luɔi?’ Ku jɔl looi. Ye käkun ca ka thöl ë luɔi gätpiny ku muk keek yïnɔm.

WËËT Ë BAIBOL: ‘Täŋ de raan ŋic luɔi ee tiam.’—Kɛ̈ŋ 21:5.