Wɛ̈t ye cɔɔl “wëët” wɛ̈tde yic, ee ba raan ya piɔ̈ɔ̈c awu ba wɛ̈ɛ̈t. Ë dhaman däŋ, anɔŋic bï meth cɔ̈k nɔm piny ë wɛ̈t ë kärɛcken ye ke looi. Ë dhaman däŋ aya, anɔŋic bï meth piɔ̈ɔ̈c të bïï yen ŋiɛc ya luui thïn, ago ŋiɛc ya kuany ë kä bï ke looi ë pïïrde yic.

Ë run juëc wään cï lɔ, wëët ë ye mïth wɛ̈ɛ̈t ee cï nyin dhuk piny ë wɛ̈tŋö, kɔc ke dhiëth mïth aa ke ye riɔ̈ɔ̈c, të wëët keek mïthken, ke mïthken aa bï röt ya yök keke cïï yiic thiek. Ku yen, kɔc kɔ̈k nɔŋ mïth aa cï lööŋ tääu piny bïï keek mïthken ya piɔ̈ɔ̈c ku gëlkë keek.

Acïï Pamela lueel, “mïth aa kɔɔr bï ke ya lɛ̈k bïk ya luui käpiɛth, ku kënë alëu bï ke kuɔny bïk dït keke ye kɔc ŋic käŋ. Mïth ku cï keek ë wɛ̈ɛ̈t, alëu bïk cït riän wïïr cïn nɔm raan kuath en wën lëu bï rot ya dɛɛny ku alëu bï ye yic kuöm piny.”

Duk lööŋ ca ke tääu piny ë waariic. Na cïï meth lööŋkun ca ke tääu piny ë buɔɔthiic, ke kuum awu that.

Acïï Kristine lueel, “ë dhaman thok ëbën, ɣɛn mïthkiɛ̈ leec ë wɛ̈t ye keek kɔc theek ee pinynɔm rɛɛc cïï kɔc röt ë bɛn theek thïn kënë yic. Lɛ̈c ye mïth leec, ee ke kuɔny bïk kä cïk ke wuɔ̈ɔ̈c dac ya gam të wëët yïn keek.”

WËËT Ë BAIBOL: “Të de yen kë com raan, ke yen abï tem aya.”—Galatai 6:7.

Ye käŋ thɔ̈ɔ̈ŋiic. Të wëët yïn mɛnhdu, ye kaŋ kɔ̈ɔ̈c ku takic, le run kadë, yeŋö lëu bï lëu ë luɔi, ye kërɛɛc ŋö cï looi? Wëët alëu bï meth kuɔny të dui yïn en awu të thɛt yïn en dhaman wën nɔŋ en kërɛɛc cï looi. Cït man, Të ye yen telapun kuɔ̈c luɔ̈ɔ̈i, ka lëu bï nyaai ye ciin. Ku kë ba muk yïnɔm aya, duk këthiin cïï meth wuɔ̈ɔ̈c ë guɔ tääu yïnɔm abï ciët kë nɔŋ këdïït rɛɛc cï looi.

Acïï Wendell lueel, “aya them ba kaŋ takic nɔn cïï mɛnhdiɛ̈ awäc looi ke ŋic awu ke cïï ŋic. Na nɔŋ awänydït ye meth cool ke beeric ë dhaman thok ëbën, ku të nɔŋ en awäny thiin cï looi ë kööl tökic, ka lëu ba päl piny.”

WËËT Ë BAIBOL: “Duökï mïthkun ee jut awu cut gup ë jam, ke ke cïï piɔ̈ɔ̈th bï bäp awu pälwei.”—Kolothai 3:21.

Ye nhiëër nyuɔ̈th mïthku. Alëu bï yic pial tënë mïth bïk wëët gam ku tääukë ë luɔɔi yic të ye kɔc ke dhiëth keek ke nyuɔ̈th nhiëër.

Acïï Danyel lueel, “të cïï wënda awäc looi, Ayeku leec bï ŋic nɔn nhiɛɛr ë ɣok en ë wɛ̈t käpiɛthken cï ke looi thɛɛr wään. Ayeku laaric tënë yen nɔn cïï awänyden cï looi yen bï rac guöp të le yen tueŋ ke war rot, ku ayeku lɛ̈k en aya nɔn bïï ɣok ye kuɔny.”

WËËT Ë BAIBOL: “Nhiëër ee käŋ guum anande, ku apiɛth piɔ̈u.”—1 Korinthoi 13:4.