Aye Baibol lueel: “Kɔc pïïr ayek ŋic nɔn bï kek thou ku kɔc cï thou acïn kë yek ŋic.” (Wɛ̈ɛ̈t cï Määtic 9:5; Diɛt 146:4) Ke yen, të cïï ɣok thou, acïn tëdɛt ye ɣok bɛn lɔ pïïr thïn. Kɔc cï thou aacie tak, acïn ke yeke looi ku acïn të ye reem ke gup.

‘Yïn bï yïnɔm bɛ dhuɔ̈k ë tiɔp yic’

 Ee cï Nhialic laaric yeŋö rot looi të cïï ɣok thou wään jiɛɛm en ke raan tueŋ ë kɔŋ cak, Adam. Ë wɛ̈t ë këc Adam Nhialic theek, aacïï Nhialic bɛn lɛ̈k en: “Yïn aa cuɛ̈ɛ̈c abuui, ku yïn bï yïnɔm bɛ puɔ̈k abuuidu [awu dhuɔ̈k ë tiɔp] yic.” (Cäk 3:19) Dhaman wään këc Nhialic Adam guɔ “cuëëc në tiɔɔm ë piny,” Adam ee liu. (Cäk 2:7) Ke yen tëde aya, wään cïï Adam thou, ee cï dhuk ë tiɔpic ku acïn tëdɛ̈t cïï yen bɛn lɔ pïïr thïn.

 Ke yen këtöŋ ë rot looi tënë kuat raan ë thou ëbɛ̈n yeköölë. Aye Baibol lueel: Mɛnh ë raan ku läi “aake bɔ̈ në abuui yic, ku abïk bɛ lɔ ë abuui [awu tiɔp] yic kedhie.”—Wɛ̈ɛ̈t cï Määtic 3:19, 20.

Thuɔɔu acie yen ë thök këriëëc ëbɛ̈n

 Baibol ee thuɔɔu dac thɔ̈ɔ̈ŋ ke nïn. (Diɛt 13:3; Jɔn 11:11-14; Luɔi de Tuuc 7:60) Raan wën nin apɛi acie ŋic yeŋö loi rot ë ye lɔ̈ɔ̈m. Ke yen tëde aya, kɔc cï thou acïn kë yekë ŋic. Ka yen, aye Baibol piööc nɔn nadɛ̈ ke Nhialic alëu bï kɔc cï thou bɛn puɔ̈ɔ̈c ë nïnic ku bïk bɛn pïïr aya. (Jop 14:13-15) Cït man cïï Nhialic kɔc jat nhial ë thuɔɔu yic ɣɔn thɛɛr, thuɔɔu acie yen ë thök këriëëc ëbɛ̈n.