SHIRONGWA 07

Weni a kara Jehova?

PLAY

Weni a kara Jehova?

Opo wa ghayadaranga kuhamena Jehova Karunga, nke vyayango mumaghano ghoye? Uye munene ntani ure natwe yira momo da kara ntungwedi ndi? Ndi kumughayara ashi uye nkondo ngundu ngoli kwato makuyuvho yira maruvadi? Weni a kara nani Jehova? MuNkango dendi Bibeli, Jehova a shingonona nkedi dendi ntani ashi uye a kara nashinka koye.

1. Morwanke twa piliranga kumumona Karunga?

“Karunga ghuye Mpepo.” (Johannes 4:24) Jehova kapi a kara narutu rwapanyama. Ghuye Mpepo, kwa tunga muliwiru, livango twa piranga kumona.

2. Nkedi munke a kara nado Jehova?

Mpiri momo twa piranga kumumona Jehova, ghuye Muntu ogho a karo nankedi da renkitango va mu hore ovo va mu yivo. Bibeli kughamba ashi: “Jehova kwa hora uhungiki ntani kapi nga shuvilira ovo va kwatererango kwendi.” (Pisalme 37:28) Uye nka ‘kutekura nashihoro shashinene nankenda,’ shinene ovo va nyandango. (Jakobus 5:11) “Jehova kwa kara pepi novo va ndundumano mudimutjima ntani kuparura ovo vahupuro.” (Pisalme 34:18) Wa vi yiva ashi Jehova kuvhura vimuguvite ndi vimuhafite virughana vyetu ndi? Muntu ogho a ruwanango vyavidona kuguvita Jehova. (Pisalme 78:40, 41) Ngoli, ogho a ruwanango vyaviwa kumuhafita.—Varura Vishegho 27:11.

3. Weni Jehova a neghedanga ashi a tu hora?

Shihoro kuna kara nkedi yaJehova ya kahuro ko. “Karunga ndje shihoro.” (1 Johannes 4:8) Jehova kwa shorora shihoro shendi kupitira muBibeli namuvininke ovyo a shita. (Varura Virughana 14:17.) Pashihonenito, ghayadarako tupu omo a tu shita. Ghuye a tu pa mantjo tu kenge maruvara ghamawa ghavininke, matwi tu yuvhe ngaro ntani liraka tu makere ndya. Jehova ana shana tu hafere liparu.

TEDA KO

Kushonge ghu yive ovyo a rughanitanga Jehova a rughane vininke vyakutetukita. Ntani kenganka omo Jehova a shorora nakuneghenda nkedi dendi dadiwa.

4. Mpepo yakupongoka kuna kara nkondo daKarunga

Yira momo twa rughanitanga mavoko ghetu, Jehova naye kurughanita mpepo yendi yakupongoka. Bibeli ya neghenda ashi mpepo yakupongoka kapishi muntu, ngoli nkondo odo a rughanitanga Karunga a rughane vininke. Varura Lukas 11:13 ntani Virughana 2:17 makura timwitirenu mapuro ghano:

Karunga nga “poghomwena” mpepo yendi yakupongoka kovo vamurombango. Weni una kughayara, mpepo yakupongoka muntu ndi nkondo daKarunga? Nke ghuna kughambera ngoli?

Jehova kurughanita mpepo yendi yakupongoka a rughane vininke vyakutetukita. Varura Pisalme 33:6 ntani 2 Petrus 1:20, 21 makura timwitirenu lipuro lino:

Ndjira munke dimwe Jehova a rughanitanga mpepo yendi yakupongoka?

5. Jehova a kara nankedi dadiwa

Moses kwa kalire mukareli wamulimburukwi waKarunga, ngoli a shanine kuyiva nawa Mushiti wendi. Mpo ngoli a tantilire Jehova ashi: “Ndenke ni yive ndjira doye, mposhi ni ku yive.” (Exodus 33:13) Jehova makura a negheda Moses nkedi dendi dimwe. Varura Exodus 34:4-6 makura timwitireni mapuro ghano:

Nkalito dendi munke dimwe Jehova a neghedire kwaMoses?
Dinipo nkedi daJehova wa hora po?

6. Jehova kufera mbiri vantu

Vahebeli vantu vaKarunga, kwa kalire vapika muEgipte. Weni a kuyuvire Jehova kuhamena ruhepo rwavo? Tegherera AUDIO makura kwama livaruro olyo ndi varura Exodus 3:1-10. Makura timwitirenu mapuro ghano.

AUDIO: Jehova a kalire nashinka kuruhepo rwavo (2:45)

Vinke ghuna kushongere mo mulivaruro lino omo Jehova a ku yuvanga kuhamena ruhepo rwavantu? —Kenga velise 7 na 8.
Weni ghuna kughayara, Jehova shiri ana shana kuvatera vantu ntani a kara nankondo dakuvirughana ndi? Nke ghuna kughambera ngoli?