Jehova ana shana u mu yive nawa. Morwanke? Mbyovyoshi, ntjene u yive nawa nkalito, virughana nashitambo shendi, ngavi kurenkita u shane kukara muholi wendi. Shiri kuvhura u kare muholi waKarunga? (Varura Pisalme 25:14.) Nke ngoli ghu ruwana mposhi u kare muholi wendi? Bibeli ya tapa malimbururo kumapuro ogho ntani ya shingonona ovyo vya karare mulyo ngudu kukara muholi waJehova.

1. Nke ana kutaterera Jehova u rughane?

“Shuwenena pepi naKarunga, naye makura a shuwenene pepi nove.” (Jakobus 4:8) Nke vina kutanta ovyo? Jehova kuna kukuyita u kare muholi wendi. Vamwe kuvaditopera kuvikwata lighano omo u vhura kukara uholi namuntu wa dira kumona rumwe, yira Karunga. Ngoli, muBibeli Jehova atu shorwera navintje ovyo tuna hepa kuyiva mposhi tu vhure kushuwenena pepi naye. Opo tu varura mbudi yaKarunga muBibeli, uholi wetu naye kunkondopara mpiri momo twa pira kumumona.

2. Nke Jehova a karera ashi ndje muholi ghoye po wamunene?

Kundere ko ogho a kuhoro ngudu kupitakana Jehova. Ghuye ana shana u hafe nakudukira kwendi kehepano una hepa mbatero. Kuvhura ghu “mu twike vinka vyoye navintje, mbyovoshi ghuye kukufera mbiri.” (1 Petrus 5:7) Jehova a kuwapaikira kehepano kuvatera nakushengawida nakutegherera ndapero davaholi vendi.—Varura Pisalme 94:18, 19.

3. Nke ana kutaterera ko Jehova kuvaholi vendi?

Jehova kwa hora vantu navantje, ngoli “ghuye kukukwata uholi waunene namuhungami.” (Vishegho 3:32) Jehova kuna kutaterera vaholi vendi va shetekere ko kurughana vininke vyaviwa ntani va shwenene po kurughana vyavidona. Vamwe kuvhura va kuyuve ashi udito ngudu kutikita mo dimuragho daJehova. Ngoli, Jehova nkenda ntani kutukwata lighano. Ghuye kutambura keheghuno a mu horo ngudu ntani a shetekerangoko kurughana vyaviwa.—Pisalme 147:11; Virughana 10:34, 35.

 TEDA KO

4. Abraham kwa kalire muholi waJehova

Shishorokwa shamuBibeli shaAbraham (kwa mu twenyinenka ashi Abram) kutupa ko maukenu ovyo vya tantanga kukara muholi waKarunga. Varura kuhamena Abraham mwaGenesis 12:1-4. Makura timwitirenu mapuro ghano:

• Vinke Jehova a pulire Abraham a rughane?

• Nke Jehova a twenyidilire Abraham?

• Nke Abraham a rughanine opo Jehova a mu pire mpangera?

5. Ovyo Jehova a tatereranga ko kuvaholi vendi

Atwe kutaterera vininke kuvaholi vetu.

• Vininke munke vimwe wa shana va kurughanene vaholi voye?

Varura 1 Johannes 5:3 makura timwitirenu lipuro lino:

• Nke Jehova a tatereranga ko kuvaholi vendi?

Mukurenkashi tu limburukwe Jehova, twa hepa kutjindja nkalito yetu. Varura Jesaya 48:17, 18 makura timwitirenu lipuro lino:

• Morwanke Jehova a tatereranga ashi vaholi vendi va ture po makutjindjo?

 6. Ovyo a rughanenanga Jehova vaholi vendi

 LIKAMO

Jehova ana shana a kare Muholi woye ntani nga ku vatera u shuwenene pepi naye.

Livyukuruko

• Weni Jehova a vateranga vaholi vendi?

• Morwanke Jehova a tanteranga vaholi vendi va ture po makutjindjo?

• Weni ghuna kughayara, udito kukara uholi naJehova ndi? Morwanke ghuna kughambera ngoli?