SHIRONGWA 09

Shuwenena pepi naKarunga mundapero

PLAY

Nove kukuyuvha ashi ghuna hepa mavyukito muliparu ndi? Wa kara namapuro ghamulyo ghuna hepa malimbururo ndi? Ghuna hepa lishengawido ndi? Ghuna shana kushuwenena pepi naJehova ndi? Ndapero kuvhura yi kuvatere kuvihepwa navintje ovyo. Nkedi munke yayiwa yakuraperera? Karunga kutegherera ndapero davantu navantje ndi? Nke ngoli u rughana mposhi a yuve ndapero doye? Toko tu kenge.

1. Kware tu raperera ntani nke tu twenya mundapero detu?

Jesus kwa shongire ashi tu raperere tupu kwaShetu wamuliwiru. Jesus naye ka rapereranga kwaJehova. Ghuye kwa ghambire ashi: “Rapererenu weno: ‘Shetu wamuliwiru . . . ’” (Matheus 6:9) Ntjene atu raperere kwaJehova, atwe kunkondopeka uholi wetu naye.

Atwe kuvhura kuraperera kuhamena kehevino. Ngoli mukurenkashi Karunga a limburure ndapero detu, twa hepa kuraperera kukuwa nakupanga kwendi. “Kehevino tuna kushunginda kukuwa nakupanga kwendi [Karunga], ngatu yuva.” (1 Johannes 5:14) Jesus a tapire shihonenito shavininke ovyo tu twenya mundapero detu. (Varura Matheus 6:9-13.) Kughupa ko tupu kutwenya kuhamena vinka vyetu, tuna hepanka kupandura Karunga kovyo atu rughanena ntani kumushungida a vatera vapeke.

2. Vinke twa hepa kutwenya mundapero detu?

Bibeli kutukorangeda tu “rupwitire Karunga navintje vyakumushima detu.” (Pisalme 62:8) Mpongoshi, ndapero detu dina hepa kutunda kumushima. Kuvhura kuraperera kuyiyuruka ndi munda yamushima ntani mwa kehe ukaro wakunegheda lifumadeko kwaJehova. Kuvhura kuraperera kehe ruvede ntani kehekuno una kara.

3. Weni Karunga a limbururanga ndaperero detu?

Ghuye kulimburura mumarupe ghakukushuva-shuva. Jehova atu pa Nkango dendi Bibeli omo tu vhura kuwana malimbururo kumapuro ghetu. Kuvarura Nkango daKarunga kuvhura “kurenkita muntu a piro ndunge, a kare nandunge.” (Pisalme 19:7; varura Jakobus 1:5.) Karunga kuvhura atu pe mbiri yamumushima ntjene tuna kara namaudito. Ntani nka, Ghuye kuvhura a rughanite vakareli vendi va tu pe mbatero ntjene tuna yi hepa.

TEDA KO

Kushonge u yive omo u vhura kuraperera munkedi oyo yihafito Karunga ntani konakona u kenge omo u wanena mo uwa mundapero.

4. Karunga a tura po vihepwa vyandapero

Vinke vi renkito Karunga a tambure ndapero detu ndi a dire kuditambura? Kengera VIDIYO.

VIDIYO: Karunga kutegherera ndaperero nadintje ndi?—Karuha (2:42)

Jehova ana shana tu raperere kwendi. Varura Pisalme 65:2 makura timwitirenu mapuro ghano:

Weni ghuna kughayara, “Muyuvi wandapero” ana shana u raperere kwendi ndi? Morwanke una kughambera ngoli?

Ntjene tuna shana Karunga a yuve ndapero detu, twa hepa kushetekera ko kuparuka kukuwa nadimuragho dendi. Varura Miga 3:4 ntani 1 Petrus 3:12 makura timwitirenu lipuro lino:

Nke tu rughana mposhi Jehova a tegherere ndapero detu?

Pavita, mbunga mbiri nadintje kuvhura di raperereshi di kakete. Kuvhura ngoli Karunga a limburure ndapero davo ndi?

5. Ndapero detu da hepa kutunda kumushima

Vantu vamwe kwa va shonga va kwate mumutwe ndapero odo va tjanga mumbapira. Ngoli mo Karunga ana shana tu raperere ndi? Varura Matheus 6:7 makura timwitirenu lipuro lino:

Nke u rughana mposhi u dire “kuvyukuruka kughamba vininke vyakukufana” mundapero doye?

Kehe liyuva, kuvhura u ghayadare ko shininke shashiwa shina kushorokero makura tapa mpandu kwaJehova. Virughane kehe liyuva, makura kuuhura washivike ngau nongonona ashi una raperere kuhamena vininke ntambari wa hana kuvyukuruka.

Sha washihoro ana shana monendi a mu ghambite kutundilira kumushima. Jehova ana shana tu raperere kwendi kutundilira kumushima

6. Ndapero kuna kara ushwi a tu pa Karunga

Weni ndapero yi tu vatera shinenepo kuna kupita mumaudito? Kengera VIDIYO.

VIDIYO: Ndapero kutuvatera tu kudidimikire maudito (1:32)

Bibeli ya twenyidirashi ndapero kuvhura kutuvatera tu kuyuvhe mbiri mumushima ntani tu kare tuna kutura. Varura Fillipi 4:6, 7 makura timwitirenu mapuro ghano:

Mpiri momo ndapero ya piranga kughupapo kehapano maudito ghetu, mulyo munke wakaro mo mundapero?
Vininke munke una shana kutwenya mundapero doye?

Maukenu nka ghamweya

Nkango “amen” kutantashi “vi kare ngoli” ndi “uhunga.” Kutunda pa kare, “amen” kwa yi ghambanga kulishayero lyandapero. —1 Histoli 16:36.

7. Kutulire po ruvede rwandapero

Pamaruvede ghamwe atwe kuviyauka ngudu makura kukuvhurama kuraperera. Weni Jesus a kengire mulyo wandapero? Varura Matheus 14:23 ntani Markus 1:35 makura timwitirenu mapuro ghano: